Կոլումբիայում առաջարկել են սպանել Պաբլո Էսկոբարի «կոկաինային» գետաձիերին՝ պատճառաբանելով, որ դրանք լուրջ վտանգ են ներկայացնում

Կոլումբացի գիտնականները Telegraph-ի հետ զրույցում նշել են, որ տխրահռչակ նարկոբարոն Պաբլո Էսկոբարի, այսպես կոչված, «կոկաինային» գետաձիերը արագորեն բազմանում են և վտանգ ներկայացնում երկրի էկոհամակարգի համար: Այս մասին գրում է «ՌԻԱ Նովոստի» գործակալությունը:

Աֆրիկյան կենդանիները Կոլումբիա են բերվել 1980-ականներին, երբ թմրավաճառ Պաբլո Էսկոբարը նրանց մաքսանենգ ճանապարհով տեղափոխել է իր անձնական կենդանաբանական այգի: Մեդելինյան կարտելի ղեկավարի մահից հետո կառավարությունը վերահսկողություն է հաստատել նրա ունեցվածքի վրա: Բացատրվում է, որ կենդանիների մեծ մասին դուրս են բերել, բայց չորս գետաձի թողել են  լճակի մեջ, որտեղից նրանց հետնորդները տարածվել են Մագդալենա գետի ավազանում:

Փորձագետների հաշվարկներով, այժմ երկրում կա 80-100 գետաձի, բայց մինչև 2040 թվականը դրանց թիվը կարող է հասնել գրեթե 1500-ի, որից հետո աֆրիկյան կենդանիների ազդեցությունը շրջակա միջավայրի վրա կդառնա անդառնալի, և դրանց թիվը հնարավոր չի լինի վերահսկել:

«Ոչ ոքի դուր չի գալիս գետաձիներին կրակելու գաղափարը, բայց մենք պետք է խոստովանենք, որ այլ ռազմավարություն չի գործում»,-ասել է բնապահպան Նատալի Կաստելբլանկո Մարտինեսը:

«Biological Conservation» ամսագրում կատարված ուսումնասիրության մեջ մասնագետը բացատրում է, որ ի տարբերություն կենդանիների բնական աֆրիկյան միջավայրի, որտեղ նրանց աճը սահմանափակվում է երաշտի և գիշատիչների կողմից գետաձիերի որսով, Մագդալենայի ավազանում կենդանիների այս տեսակը չունի բնական թշնամիներ և չկան եղանակայաին բավական չոր ժամանակահատվածներ, որի պատճառով գետաձիերի բազմացման մակարդակը կարող է նվազել:

Մասնագետը նշում է, որ կենդանիների մեզի և կղանքի քանակը մեծացնում է ջրի մեջ ֆոսֆատների և ազոտի կոնցենտրացիան, իսկ դրանից առաջացող մակաբույծներն ու հիվանդությունները կարող են փոխանցվել ինչպես կենդանական աշխարհին, այնպես էլ տնային կենդանիներին և նույնիսկ մարդկանց:

Բացի այդ, ինչպես գրում է բրիտանական հրատարակությունը, Աֆրիկայից եկած կենդանիները կարող են հարձակվել մարդկանց վրա: Մասնավորապես, անցյալ տարի կոլումբացի ֆերմերներից մեկը ջուր հավաքելիս գետաձիու հարձակմանն էր ենթարկվել: Գետաձին կծել էր նրա ոտքը և նետել էր օդ ՝ կոտրելով ոտքը, ազդրը և մի քանի կողոսկրեր:

Այնուամենայնիվ, տեղացիներն աֆրիկյան կենդանիներին համարում են ոչ պաշտոնական թալիսման: Նվերների խանութները Պուերտո Տրիունֆոյում վաճառում են գետաձու տեսքով կախազարդեր և նրանց պատկերով շապիկներ, իսկ կենդանիների իրավունքների պաշտպանները պաշտպանում են նրանց: Սակայն գիտնականներն ասում են, որ ակտիվիստները չեն տեսնում ամբողջական պատկերը, գրում է թերթը:

Բնապահպանները տարիներ շարունակ փորձում են ստերիլիզացնել գետաձիերին, բայց դա շատ ժամանակ և ջանք է պահանջում, և մատչելի ռեսուրսները շատ քիչ են:

Կառավարության բնապահպան Դեյվիդ Էչեվերրի Լոպեսը հրատարակությանը հայտնել է, որ ինքը կարող է տարեկան մոտ մեկ գետաձի կաստրացնել, մինչդեռ, ըստ գիտնականների, դրանց թվաքանակի աճը կազմում է տարեկան մոտ 10%:

Ըստ Կաստելբլանկո Մարտինեսի, ստերիլիզացման ծրագիրը կարող էր արդյունավետ լինել, եթե պաշտոնյաները վաղ շրջանում տրամադրեին բավարար ռեսուրսներ ծրագրի համար, բայց այժմ հնարավոր միակ տարբերակը կենդանիներին գնդակահարելն է: