Ադրբեջանը լեգիտիմացնում է իր օրակարգի անգամ անտրամաբանական էլեմենտները. Կարեն Բեքարյան (տեսանյութ)

Ադրբեջանը լեգիտիմացնում է իր օրակարգի կարևորագույն խնդիրների անգամ անտրամաբանական էլեմենտները, քանի որ չունի իրական հակադրություն թե՛ Հայաստանի կողմից, թե՛ Հայաստանի տարած աշխատանքի շնորհիվ բարեկամ երկրների կամ համանախագահ երկրների կողմից: Այս մասին «Տողերի արանքում» հաղորդաշարի հերթական թողարկման եթերում նշել է վերլուծաբան Կարեն Բեքարյանը:

Վերլուծաբանն ուշադրություն է հրավիրել այն փաստի վրա, որ չնայած ԵԱՀԿ-ն ամրագրել է, որ Ղարաբաղյան հակամարտության արդարացի կարգավորումը պետք է հիմնված լինի երեք հիմնարար սկզբունքների՝ ինքնորոշման իրավունքի, տարածքային ամբողջականության, ուժի և ուժի սպառնալիքի կիրառման բացառման վրա, Բաքվում ԵԱՀԿ գործող նախագահը չխոսեց Ադրբեջանի կողմից փաստացի ուժի կիրառման մասին:

«Կարո՞ղ է արդյոք ԵԱՀԿ գործող նախագահը լինել Բաքվում, ապա գալ Երևան՝ խոսքով և գործողությամբ չանդրադառնալով գերիների խնդրին: Նա ի՞նչ անելիք ունի Երևանում, եթե իր հետ Բաքվից Երևան չեն ժամանում մեր գերիների որոշակի խմբաքանակ»,-նշել է Կարեն Բեքարյանը՝ հավելելով, որ այս մակարդակի ցանկացած այցից առաջ կա դիվանագիտական խորքային աշխատանք հանդիպումների, օրակարգի հետ կապված:

«Մենք ֆիքսո՞ւմ ենք այդ աշխատանքի որևէ դետալ, և այս պարագայում մեր ակնկալիքները և իրականությունը կարո՞ղ են իրար հետ հատվել», - ընդգծել է նա:

Կարեն Բեքարյանն ուշադրություն է հրավիրել նաև այն փաստի վրա, որ Ադրբեջանը, ինչպես նաև Թուրքիան շարունակում են Հայաստանի հետ խոսել ուժի սպառնալիքի լեզվով. «Ադրբեջանն ու Թուրքիան միասին Հայաստանին փորձում են ինչ-որ կերպ «մոտիվացնել», և Հայաստանին ուղղված ամեն հայտարարություն սկսվում է «եթե Հայաստանն իրեն խելոք պահի» արտահայտությամբ»,-ասել է Բեքարյանը և հարց բարձրացրել՝ ներկա պահին Ադրբեջանն իրականացնում է լայնամասշտաբ զորավարժություններ, սա հակամարտությունը «լուծած» և կառուցողական երկրի կեցվա՞ծք է:

Կարեն Բեքարյանի խոսքով՝ Փաշինյանն այս ամենին որևէ կերպ չի հակազդում և զբաղված է բացառապես սեփական աթոռը պահելու գործով: Ինչ վերաբերում է արտաքին քաղաքական գերատեսչությանը, ապա Բեքարյանի կարծիքով՝ վերջին շրջանում ԱԳՆ-ն կյանքի նշաններ է ցույց տալիս. խոսում է Ղարաբաղի կարգավիճակի, ինքնորոշման իրավունքի, տարածքային որոշակի խնդիրների մասին:

«Այլ իշխանության դեպքում պետք է սա ողջունեինք, բայց այս ընթացքում մենք այնքան բան ենք տեսել, որ այս քայլերը ողջունելուց առաջ փորձում ենք հասկանալ մարտահրավերները. մենք երեք տարի ապրում ենք իրավիճակում, երբ այս երկիրը քանդվում է նույն արտաքին քաղաքականության տեսանկյունից և պատրաստում է պարտություն, իսկ ԱԳՆ-ն լուռ էր», - նշել է նա:

Այս համատեքստում Կարեն Բեքարյանն ուշադրություն է հրավիրել ԱԳ նախարարի հայտարարության վրա, համաձայն որի՝ Հայաստանում տեղի ունեցածը ռազմական հեղաշրջման փորձ չէ:  «Դա բացահայտ հակադրում էր վարչապետին, սակայն մինչև օրս ԱԳՆ-ից չեղավ արձագանք, անմիջապես մեկ օրվա ընթացքում ԱԳ նախարարի հեռացման խնդիր չդրվեց նախագահի սեղանին, չտեսանք այն էպոպեան, որը տեսնում ենք միշտ, երբ պետական կառավարման համակարգից որևէ մեկը ինչ-որ բառ հակառակ էր ասում վարչապետի պաշտոնը զբաղեցնողին», - նշել է նա:

Մանրամասները՝ տեսանյութում: