Առավոտս սկսվում է Քանյե Ուեսթի՝ «մեր փեսայի» երգերի ներքո սուրճ խմելով. Մհեր Խաչատրյան

Լրագրող, հումորիստ Մհեր Խաչատրյանը, ով այժմ նաև հաղորդավար է ու խաղում է սիթքոմում, խուսափում է պատասխանել անձնական բնույթի հարցերին: Նա Tert.am-ի հետ զրույցում պատմեց իր առօրյայի ու նախասիրությունների մասին:

-Կարոտո՞ւմ եք «Արմքոմեդին»:

-Ցանկացած տեղ, որտեղ եղել եմ ու այժմ չկամ, կարոտում եմ: «Արմքոմեդին» բացառություն չէ. այսօր էլ հետևում եմ գործունեությանը, ինչպես միշտ:

-Հարցազրույցներից մեկում նշել եք, որ սիրում եք փոփոխություններ, ու որպես դերասան ներկայանալը հերթական փորձություններից է: Հեշտությա՞մբ եք հաղթահարում:

- Դեռ չեմ փոշմանել: Սա մի ոլորտ է, որտեղ հայտնվելով՝ սկսում ես առավել լավ և այլ տեսանկյունից պատկերացնել հեռուստատեսությունը: Կուզեի ֆիլմերում ևս ինձ փորձել: Եթերում կուզեի տեսնել կինոնկարներ, որոնք մեր իրականությանն առավել մոտ կլինեն, հագեցած կլինեն կերպարների բազմազանությամբ: Մեր երկրում այնքան հետաքրքիր դեմքեր կան, որոնք դուրս են մնում էկրանից:

-Նշել եք՝ «Դոմինոյի» Ձեր կերպարը Ձեզ հետ բացարձակ կապ չունի: Դրանից շահո՞ւմ, թե՞ տուժում է կերպարը:                                                                    

-Բնականաբար՝ որքան տարբեր, այնքան դժվար: Բայց այսպես շատ հետաքրքիր է:

-Մասնագիտությամբ իրանագետ, կարիերայի ընթացքում՝ լրագրող, հումորիստ, հաղորդավար, դերասան: Էլ ի՞նչ կարելի է սպասել Մհեր Խաչատրյանից:

- Օ, չգիտեմ: Երևի՝ ամեն ինչ: Որպես իրանագետ՝ մեկ տարի աշխատել եմ Թեհրանում: Տիրապետում եմ պարսկերենին, բայց պիտի վատ բան ասեմ՝ սկսում եմ մոռանալ: Վերականգնելու մեթոդներ պիտի մշակեմ:

-Դուք բազմազբաղ եք, ամբողջությամբ կարողանո՞ւմ եք կառավարել Ձեր ժամանակն ու կյանքը:    

-Միշտ համարել եմ, որ մարդ եթե ուզենա, ամեն ինչի համար էլ ժամանակ կգտնի: Այսօր փորձում եմ ամեն րոպեն չկորցնել ու անիմաստ չվատնել. կես ժամի փոխարեն, եթե հնարավոր է, տասը րոպե մուտք գործել Facebook: Բայց երբ հոգնած տուն եմ մտնում, նախընտրում եմ նման թեթև բաներով զբաղվել: Կարելի է քնել վեց ժամ ու հասցնել ամեն բան:

-Իսկ ինչպե՞ս է բացվում ձեր առավոտը:

-Սուրճով, մեկ գլանակ ծխախոտով և «մեր փեսայի»՝ Ուեսթի (Kanye West) երգերը լսելով: Ի դեպ՝ լավ տրամադրություն է հաղորդում ու մոտիվացնում:

-Մհե՛ր, եթե հնարավորություն ունենայիք Ձեր դաստիարակման պրոցեսում փոխել ընդամենը մեկ բան, ի՞նչը կփոխեիք:

- Կուզեի մի քիչ ավելի քիչ ալարկոտ լինել: Աշխատանքի մեջ այն չի դրսևորվում, բայց կյանքում՝ այո:

-Օրինակ՝ պարսկերենը վերականգնելու մեջ և՞ս:

-Երևի՝ այո (ժպտում է-Tert.am): Եթե լինեի քիչ ալարկոտ ու կլինե՛մ քիչ ալարկոտ, հաստատ կստացվի: Պիտի սկսեմ պարսկերեն գրքեր, թերթեր կարդալ ու ֆիլմեր նայել:

- Ի դեպ, եթե ջրհեղեղ լինի ու Ձեզանից ակնկալվի փրկել երեքական ֆիլմ ու գիրք, որո՞նք կվերցնեիք Ձեզ հետ:

- Մանկության տարիներին շատ էի ազդվել Տարկովսկու «Հայելին» ֆիլմից, կվերցնեի նաև Փեննի Մարշալի «Զարթոնքը»: Շատ ֆիլմեր կպահեի՝ «Թռիչք կկվի բնի վրայով» ֆիլմը, «Կնքահայրը», «Ամադեյ»... Գեղարվեստական գրականությունից՝ Վիլյամ Սարոյանի «Մարդկային կատակերգությունը» , Ֆոլքների պատմվածքները, երրորդը՝ ինչ-որ տեխնիկական ձեռնարկ, օրինակ՝ ինչպես կառուցել տուն՝ ձեռքի տակ եղած նյութերով: Պետք կգա չէ՞. ջրհեղեղից հետո պիտի կարողանանք թե՛ տանիք ունենալ, թե՛ սոված չմնալ:

- Իսկ ո՞ւմ հետ կընթրեր Մհեր Խաչատրյանը, եթե ունենար ընտրության մեկ հնարավորություն:

-Մորս պապի՝ Հայկ Հովակիմյանի: Սովետի տարիներին եղել է հետախույզ: Ես նրան չեմ տեսել, բայց կենսագրությունը կարդալով՝ կարող եմ փաստել, որ շատ հետաքրքիր մարդ է եղել: Պատկերացրեք՝ Նախիջևանում է ծնվել, աշխատել երկաթգծում, բայց հասել մինչև ԿԳԲ-ի գեներալի պաշտոնի, տիրապետել յոթ-ութ լեզվի: ԱՄՆ է մեկնել որպես հետախույզ ու բերում տեղեկություններ, ինչի արդյունքում Սովետական Միությունն ունենում է ատոմային ռումբ: Կուզեի նրանից խորհուրդներ հարցնել, շատ բան սովորել:

-Իսկ եթե Դուք որևէ երեխայի իր ամբողջ կյանքի համար տալու լինեիք միայն մի խորհուրդ, ո՞րը կլիներ:        

-Լինել ազնիվ ինքն իր և շրջապատի առաջ: Հավատացեք՝ գիշերը հանգիստ խղճով քնելուց լավ բան չկա: