«Քարե դարդ».երկար սպասված սիթքոմը դիտեք հենց այսօր` ATV-ի եթերում

17:08 • 08.12.15

«Երևան Մոլ»-ի նորաբաց «Կինոպարկ» կինոթատրոնում տեղի ունեցավ «Քարե դարդ» սիթքոմի առաջին սերիայի փակ կինոդիտումը, ինչպես նաև դերասանների ասուլիսը։ Դիտմանը հրավիրված էին մի շարք հաղորդավարներ, դերասաններ և Vitamin Club-ի տղաները։

Սիթքոմի առաջին սերիան եթերում կլինի դեկտեմբերի 8-ին՝ ժամը 21:30-ին, ATV հեռուստաընկերությամբ։ Սցենարի հեղինակներն են Vitamin Club-ի նախկին սցենարիստներ Վան Գրիգորյանը և Գրիգ Գևորգյանը, ռեժիսորն է Վարդան Հակոբյանը։ Սիթքոմի սաունդթրեքը կատարել է երգչուհի Սիլվա Հակոբյանը։

Ներկաներից ArmComedy-ի հաղորդավար Սերգեյը, խոսելով իր տպավորությունների մասին ասաց.«Լավ խաղ էր ներկայի, իրականության և ավելի պրիմիտիվ հասարակության միջև։ Նոր մոտեցում էր, ցանկացած մոդեռն բան հետաքրքրություն է առաջացնում։ Պետք է միամիտի աչքերով նայել»։

«Որպես սկիզբ կարծում եմ, որ բավականին հետաքրքիր էր։ Ինչպես և բոլոր սիթքոմներինը, սկիզբը պետք է լինի փոքր-ինչ անհասկանալի, որոշ հարցեր անպատասխան պետք է մնան, որպեսզի զարգացումները հետաքրքրեն։ Սցենարիստներն ուժեղ սցենարիստներ են, կարծում եմ ծիծաղելի և զվարճալի սիթքոմ է ստացվել»,- նկատեց Vitamin Clumb-ի Գարիկը։

«Դա իմ մանկության երազանքներից է եղել, որ հայտնվեմ այդ ժամանակաշրջանում, որտեղ ամեն ինչ զարմանալի և տարօրինակ է։ Սցենարը տալիս է ֆանտազիաներն իրագործելու և իրադարձությունները շատ ծիծաղելի զարգացնելու լայն հնարավորություն»,- ասաց Արամ MP3-ին և հավելեց.«Կերպարները լավն էին, մաղթում եմ ողջ ստեղծագործական թիմին հաջողություն»։

««ՊանԱրմենիան Մեդիա Գրուպ»-ի աշխատակից լինելով շատ հպարտ եմ հայտարարում, որ մենք արտադրում ենք լավագույն սիթքոմերը։ Ամեն ինչ սկսվեց «Տնփեսայից» այսօր արդեն ունենք «Քարե դարդ»։ Այս սիթքոմի առանձնահատկությունն այն է, որ թեման յուրահատուկ է, երբեք նմանատիպ բան չի եղել հայկական եթերում։ Շնորհավորում եմ անձնակազմին ու ուզում եմ, որ լավ ռեյտինգ ունենան»,- ասաց «ՊանԱրմենինան Մեդիա Գրուպ» ընկերության միջազգային բաժնի մասնագետ, ինչպես նաև երգչուհի և հաղորդավարուհի Սյուզի Շահբազյանը։

«Քարե դարդ» սիթքոմի ղեկավար Վաչե Թովմասյանն էլ, խոսելով սիթքոմի մասին, նշեց. «Սա առաջին սերիան էր։ Մենք արդեն բազմաթիվ սերիաներ ենք նկարել ու իմ սուբյեկտիվ կարծիքով սա ամենաթույլերից էր, իսկ այն ինչ հիմա նկարում ենք այնքան ծիծաղելի է, որ ընդհատում ենք նկարահանումը, մի լավ ծիծաղում ենք հետո շարունակում։ Կարծում եմ ու հուսով եմ, որ հեռուստադիտողը հավանելու է»։