Աբրահամ Ռուսսոն Հայաստանում իրականացնում է վաղեմի երազանքը

Ռուսաստանյան շոու բիզնեսի հայազգի սակավաթիվ երգիչներից Աբրահամ Ռուսսոն  օրերս հերթական անգամ Հայաստանում էր: Նրան պատահաբար հանդիպեցի Քանաքեռում գտնվող Սուրբ Աստվածածին ռուսական ուղղափառ եկեղեցում, որտեղ նա հետաքրքրությամբ զրուցում էր քահանայի հետ կրոնական հարցերի շուրջ, մասնավորապես այն մասին, թե երբվանից և ինչպես է հայ եկեղեցին առանձնացել ուղղափառ եկեղեցուց: Զրույցի ավարտին երգչին մի քանի հարց ուղղեցի` սկսելով նրա այցելության նպատակներից:

- Աբրահամ, այս անգամ Ձեզ ի՞նչն է Հայաստան բերել:

- Եկել եմ այստեղ տեսահոլովակ նկարահանելու: Իղձերիցս մեկը հայերեն երգերի ալբոմ ունենալն է: Արդեն տասը տարի փորձում էի այն իրականացնել, սակայն, ցավոք, չէր ստացվում: Այս պահին հայերեն երկու նոր երգ ունեմ և որոշեցի նրանցից մեկի տեսահոլովակը Հայաստանում նկարահանել. կարծում եմ` դա ամենաճիշտ որոշումն է: Այստեղ նաև երկու համերգ ունեմ (մեկը Գյումրիում` տեղի «Նոստալջի» ընկերության հրավերով - հեղ.): Այնպես ստացվեց, որ այս օրերին ինձ հրավիրեցին ելույթ ունենալու նաև կորպորատիվ մի հավաքույթի:

- Հետաքրքիր է` ո՞վ է այդ կորպորատիվի պատվիրատուն:

- Կներեք, չեմ կարող անունը տալ: Ես պարտավոր եմ դա գաղտնի պահել:

- Իսկ ի՞նչ հայերեն երգերի մասին է խոսքը, կմանրամասնեք:

- Երկու երգերս էլ նոր են, երաժշտության հեղինակը ես եմ: Մեկը «Սարերի ջեյրան աղջիկն» է, որն արդեն հնչում է ռադիոեթերից, իսկ երկրորդ երգի մասին, որի տեսահոլովակը նկարահանում ենք, չեմ ուզում մանրամասնել, քանի դեռ աշխատանքն ավարտին չենք հասցրել: Ռուսաստանում կարգն այնպես է, որ երգը պետք է մի երկու ամիս հնչի ռադիոեթերով, որից հետո նոր միայն տեսահոլովակ նկարահանվի: Բայց Հայաստանում մի քիչ ուրիշ է` երգի ու տեսահոլովակի պրեմիերան միաժամանակ կլինի: Այս պահին դեռևս այս երկու երգն եմ ձայնագրել, բայց աստիճանաբար պետք է ավելացնենք` ալբոմում կլինի 8-10 երգ: Ի դեպ, արդեն ընթացքի մեջ է երրորդ երգը: Ամերիկահայ մի լավ գործիքավորող կա, նա հիմա աշխատում է այդ երգի վրա:

- Հաճախ եք եկեղեցի այցելում: Այսօր նկատեցի, որ հետաքրքրված եք կրոնի հարցերով: Ի դեպ, ինչո՞ւ եք այցելել ռուսական ուղղափառ եկեղեցի, այլ ոչ թե հայ առաքելական:

- Ես ուղղափառ քրիստոնյա եմ: Հավատքն ինձ համար առաջին տեղում է այս կյանքում: Առհասարակ հայ ազգը, որն առաջինն է ընդունել քրիստոնեությունը որպես պետական կրոն, պետք է հավատքը առաջին տեղում պահի: Մենք հին քրիստոնյաներ ենք, եթե այսօր կորցնենք մեր հավատքը, ապա կկորցնենք մեր ազգությունը: Ես Ամերիկայի իմ տանն առանձին եկեղեցի ունեմ, որտեղ բոլոր եկեղեցական տոներին մեր կողմից հրավիրված վարդապետը ծառայություն է մատուցում: Երբ Հայաստան եկա, ցանկացա գալ այս ռուսական ուղղափառ եկեղեցին: Ի դեպ, այստեղ բոլոր քահանաները հայ են:

- ԱՄՆ-ը Ձեր հիմնական բնակության վա՞յրն է դարձել:

- Ընտանիքս հիմա Ամերիկայում է ապրում, Նյու Ջերսիյում: Բայց իմ աշխատանքը հիմնականում Ռուսաստանի հետ է կապված: Տարին մեկ-երկու անգամ էլ Հայաստան եմ գալիս: Սա իմ հայրենիքն է: Ես շատ եմ սիրում Հայաստանը: Մեծ հաճույք եմ ստանում Երևանում զբոսնելիս, համեղ կերակուրներ ճաշակելիս: Շատ ուրախ եմ, որ մոտ 10 օր պիտի այստեղ մնամ:

- Այս օրերին հայաստանցիների համար կարևոր քաղաքական իրադարձություններ են տեղի ունենում: Քաղաքականությամբ հետաքրքրվում եք:

- Ես քաղաքականությունից հեռու մարդ եմ: Թողնենք քաղաքականությունը քաղաքական գործիչներին, բայց աղոթենք նրանց համար, որ մեզնից էլ ուժ առնեն ու լավ կառավարեն այս աշխարհը: Մի բան կասեմ` նա, ով իր ազգը կսիրի, լավ կկառավարի: Նա, ով իր անձը կսիրի, միայն իր անձին ու գրպանին կծառայի: Հույս ունեմ` կգա ժամանակ, երբ բոլորն էլ ազգի ծառաները կդառնան:

Զրուցեց  Գագիկ Աղաբալյանը
TV Մոլ