Շրջված արմենները. հարցազրույց Նեմրա ռոք խմբի հետ

Մեկ ընդհանուր գաղափարի շուրջ համախմբված երեք ռոքասերներ ստեղծեցին Նեմրա ալտերնատիվ ռոք խումբը: Ովքե՞ր են նրանք, որտեղի՞ց են գալիս և ո՞ւր են գնում. այս և մի շարք այլ հարցերի պատասխաններ Tert.am Youth-ը փորձեց պարզել խմբի անդամներից:

- Ինչպե՞ս ձևավորվեց խումբը: Որո՞նք էին Նեմրայի առաջին քայլերը

Վան Եղիազարյան (վոկալ, սոլո կիթառ) - 2011 թվականին, երբ ես նոր էի ձեռքս վերցրել կիթառը և արդեն ունեի գրած մի քանի երգ, եղբորս՝ Վասպուրի և մեր նախկին հարվածային գործիքներ նվագողի՝ Գեղամի հետ որոշեցինք խումբ ստեղծել և ընդհանուր ծանոթի միջոցով ծանոթացանք Մարիաննայի հետ: Մեր համատեղ ստեղծագործական գործունեությունը սկսեցինք ավելի ուշ` 2012-ին, քանի-որ Մարիաննան մեկ տարով բացակայեց երկրից: Երբ վերադարձավ, սկսեցինք փորձերը: Երկար էինք պատրաստվում համերգային ծրագրին: Առաջին քայլերը դժվար էին, քանի որ չունեինք սեփական փորձատեղ, բացի իմ կիթառից չունեինք այլ երաժշտական գործիքներ, իսկ Վասպուրն ընդհանրապես առաջին անգամ էր իր ձեռքը բաս կիթառ վերցնում: Փոխարենն ունեինք թարմ գաղափարներ և նվագելու մեծ ցանկություն: Մեր առաջին համերգը տեղի ունեցավ Ստոպ Ակումբում: Սպասելիքները արդարացված էին` հանդիսատեսը մեզ ջերմ ընդունեց:

-Ի՞նչ է նշանակում Նեմրա:
 

Մարիաննա Կարակեյան (ստեղնաշարային գործիքներ, բեք վոկալ) - Եթե շրջված կարդաք մեր խմբի անունը, կիմանաք, թե ինչու : Մեզ` հայերիս, կոչում են արմեններ: Քանի որ ցանկանում էինք այնպիսի անուն ընտրել, որը մեր խմբի անունից բացի այլ բան չնշանակի, այդ պատճառով կես լուրջ-կես կատակ առաջարկեցի շրջել «Արմեն» անունը և խումբը կոչել Նեմրա:  Տղաներին դա դուր եկավ:

-Ի՞նչ գործունեություն եք ծավալել այս 2 տարիների ընթացքում:

Վասպուր Եղիազարյան (բաս կիթառ, բեք վոկալ): - Ստեղծել ենք խումբը, ստեղծել և ձայնագրել ենք երգեր, նկարահանել ենք տեսահոլովակներ, հանդես ենք եկել մենահամերգներով, մասնակցել տարբեր փառատոնների և բարեգործական համերգների, ինչպես նաև առաջին անգամ ներկայացրել ենք Հայաստանը Բուրյաթիայի Voice of The Nomads ամենամյա միջազգային փառատոնին՝ 2015 թ. hուլիսի 11-ին, որտեղ ներկայացանք մեկ ժամանոց ծրագրով և շատ ջերմ ընդունելության արժանացանք:

Ո՞ր երգիչներից կամ խմբերից եք ոգեշնչվում: Կա՞ ինչ-որ երգիչ կամ խումբ, ում հետ կցանկանայիք նույն բեմում ելույթ ունենալ։

 

Վան - Իհարկե կան երգիչներ և խմբեր որոնցից ոգեշնչվում ենք՝ The Beatles, Radiohead, The Doors, SOAD, Led Zeppelin և այլն: Կարծում եմ՝ հետաքրքիր կլիներ Radiohead-ի հետ միասին նույն բեմում գտնվելը, քանի որ նրանք յուրահատուկ մթնոլորտ ու տրամադրություն են ստեղծում բեմում, հիանալի կլիներ այդ մթնոլորտի մի մասը կազմել, չնայած ոճային ոչ մի ընդհանրություն չունենք:

-Հայկական ռոք խմբերից որո՞նց եք նախապատվություն տալիս:

Վասպուր - Հավանում ենք Լավ Էլի, The Beautified Project, The Bambir խմբերին ։

-Մարիաննա, հե՞շտ է աշխատել տղաների հետ. կոնֆլիկտներ չե՞ն լինում։

Մարիաննա - Տղաների հետ ընդհանուր առմամբ հեշտ է աշխատելը, լինում են դեպքեր, երբ տարաձայնություններ ենք ունենում, սակայն դա կապված չէ նրա հետ, որ ես աղջիկ եմ, նրանք՝ տղա։ Երաժշտության մեջ ամեն մեկս ունենք մեր պատկերացումներն ու մոտեցումները և քննարկումների արդյունքում գալիս ենք ընդհանուր հայտարարի:

-Ո՞րն է ձեր առանձնահատկությունը, որով տարբերվում եք այլ ռոք խմբերից :

Վան - Մեր առանձնահատկությունը մեր ստեղծած NEMRA մոլորակն է, ուր տեղափոխում ենք մարդկանց՝ մեր երգերի միջոցով: Կուզենայի առանձնահատկություններից նշել անկեղծությունը թե՛ բեմի վրա, թե՛ երգերը ստեղծագործելիս: Սակայն չենք փորձում ճիգեր գործադրել ինչ-որ մեկից ինչ- որ բանով տարբերվելու համար, այլ անում ենք այն, ինչ մեզ դուր է գալիս:

-Ըստ հանդիսատեսի արձագանքի՝ ո՞րն է ձեր ամենասիրված երգը ։
 

Վասպուր - Կարծում եմ՝ I Dont care-ը, սակայն դա ինդիվիդուալ է, ամեն երգ ունի իր առանձին լսարանը, և այդ փաստը նույնպես կարող ենք առանձնահատկությունների մեջ դասել:

-Այսօր խումբն ի՞նչ անելիքներ ունի
 

Մարիաննա - Այժմ ավարտին են մոտենում մեր առաջին ալբոմի ձայնագրությունները, ինչպես նաև դրան զուգահեռ ձայնագրում ենք այլ երգեր, որոնք այս տարվա ընթացքում կներկայացնենք տեսահոլովակներով:

-Պատմեք ձեր վերջին տեսահոլովակի մասին:

Վան - Train of Despair երգը, որի համար նկարահանվել է տեսահոլովակը, գրել է Մարիաննան, տեսահոլովակի ռեժիսորը Ինա Աբրահամյանն է: Երգը հուսահատության մասին է, ու չնայած սկիզբը մռայլ է, բայց վերջում լուսավոր է: Տեսահոլովակը նկարելիս Ինան ըմբռնել է տրամադրությունը, ընտրել է համապատասխան գունային գամման և սիմվոլների միջոցով ներկայացրել մարդու ենթագիտակցականի և իրականության կապը:

Պատրաստեց՝ Լենա Մինասյանը