Գոհ եմ, որ կյանքում կարողացել եմ իրականացնել իմ երազանքները. Հայաստանի պետական ջազ նվագախմբի երաժիշտ՝ Տիգրան Սանոյան

Երկար տարիներ աշխատել է Հեռուստատեսության և ռադիոյի էստրադային-սիմֆոնիկ նվագախմբում, մասնակցել է Շուշան Պետրոսյանի, Արամոյի և Էմմա Պետրոսյանի, Զարուհի Բաբայանի, Ալլա Լևոնյանի, Թաթա Սիմոնյանի, Արման Հովհաննիսյանի, Հարութ Փամբուկչյանի, Ռազմիկ Ամյանի, Մարտին Մկրտչյանի մենահամերգներին իբրև թմբկահար, Ազգային ռադիոյի ֆոնդի ձայնագրություններին:

Ե՞րբ եք սկսել Ձեր գործունեությունը` իբրև երաժիշտ:

Երաժշտական գործունեությունս սկսել եմ 1987 թ. Հեռուստատեսության և ռադիոյի «Արևիկ» մանկական վոկալ-գործիքային անսամբլում, որտեղ ձեռք եմ բերել փորձառություն, շփվել եմ ճանաչված երաժիշտների և երգահանների հետ` Ռուբեն Ղազարյան, Էմմա Միհրանյան, Ռոբերտ Պետրոսյան, Վալտեր Հովհաննիսյան և ուրիշներ:

Ստացե՞լ եք մասնագիտական կրթություն:

Սովորել եմ Ստեփան Ջրբաշյանի անվան երաժշտական դպրոցում, այնուհետև ավարտել եմ Խ. Աբովյանի անվան պետական մանկավարժական համալսարանի կուլտուրայի ֆակուլտետի փողային-էստրադային բաժինը: 

Ձեր աշխատանքային գործունեությունը միանգամից սկսել եք Հայաստանի պետական ջազ նվագախմբի՞ց:

Ո՛չ, մինչ այդ՝ 1997-2002թթ., աշխատել եմ Հեռուստատեսության և ռադիոյի էստրադային-սիմֆոնիկ նվագախմբում Երվանդ Երզնկյանի ղեկավարությամբ: Առիթ եմ ունեցել կատարելու Կոնստանտին Օրբելյանի, Ռոբերտ Ամիրխանյանի, Մելիք Մավիսակալյանի և այլ նշանավոր երգահանների ստեղծագործությունները: 2002թ. հրավիրվեցի Հայաստանի պետական ջազ նվագախումբ, որն այդ տարիներին ղեկավարում էր Արմեն Մարտիրոսյանը, իսկ այժմ` Արմեն Հյուսնունցը:

Ունե՞ք հատկապես հիշարժան համերգներ:

Այո՛, եղել են բազում հիշարժան համերգներ, բայց հատկապես կուզեի նշել Մոսկվայի Կրեմլի դահլիճում տեղի ունեցած Կ. Օրբելյանի ծննդյան 80-ամյակին նվիրված համերգը, նույն դահլիճում`վաստակավոր արտիստ Հարութ Փամբուկչյանի վերջերս կայացած համերգները, ԱՄՆ-ում Լոս Անջելեսի Սթեյփլս Սենթր կոչվող սրահում կայացած համերգը, ինչպես նաև Լոս Անջելեսում «Երգում է 70-ականների Երևանը» նախագծի շրջանակներում կայացած երեք համերգները:

Շա՞տ եք շրջագայել:

Այո՛, եղել եմ աշխարհի բազմաթիվ քաղաքներում, արևելյան և արևմտյան շատ ու շատ երկրներում, որտեղ ներկայացրել ենք հայկական էստարդային մշակույթը և արժանացել հանդիսատեսի ջերմ ընդունելությանը:

Գո՞հ եք Ձեր ընտրած մասնագիտությունից:

Անշուշտ, ես մանկուց սիրել եմ երաժշտի մասնագիտությունը և հատկապես հարվածային գործիքներ: Գոհ եմ, որ կյանքում կարողացել եմ իրականացնել իմ երազանքները: