«Փախիր կամ ամուսնացիր»-ը՝ ամբողջովին օրիգինալ սաունդթրեքներով

«Փախիր կամ ամուսնացիր» ֆիլմի կոմպոզիտոր Տիգրան Գրիգորյանը պատմում է ֆիլմի սաունդթրեքների ստեղծման մասին և բացատրում, թե, առհասարակ, ինչպիսին պետք է լինի կինոերաժշտությունը:

- Ինչպե՞ս ստացաք համագործակցության առաջարկը:

- «Պերսոնա Գրատա Գրուպ»-ի հետ իմ համագործակցությունն ավելի վաղ` դեռևս 2008 թվականից է կայացել, ուղղակի ավելի փոքր նախագծերում` հեռուստագովազդային շրջանակներում: Ամռանը Երևան ժամանելով (մոտ 3 տարի է, ինչ ապրում եմ Մոսկվայում)՝ հանդիպեցի գործընկերներիս հենց այն ժամանակ, երբ ընթանում էին ֆիլմի նկարահանումները: Անմիջապես համաձայնեցի հանդիսանալ ֆիլմի կոմպոզիտորը, քանի որ «Պերսոնա Գրատա Գրուպ»-ի հետ համատեղ յուրաքանչյուր աշխատանք շատ արդյունավետ է եղել և միշտ հաջողությամբ պսակվել, և կասկած չունեի, որ կրկին շատ որակյալ գործ ենք անելու:

Տիգրան Համբարձումյանը (ՊԳԳ տնօրենը) ոլորտի այն եզակի ներկայացուցիչներից է, ով մեծ կարևորություն է տվել նաև գովազդային հոլովակների երաժշտությանը, վերջինիս օրիգինալությանը: Այս առումով նա մեկ աստիճանով վեր է բարձրացրել Հայաստանի վերջին տասնամյակի գովազդային արտադրանքի որակը:

- Առհասարակ, ինչպիսի՞ն պետք է լինի լավ կինոորաժշտությունը: Կա՞ ինչ-որ չափանիշ:

- Կինոկոմպոզիտորն այն երաժիշտն է, ով իր գրած երաժշտությամբ ոչ թէ պետք է ներկայանա որպես անհատ՝ մոռանալով սյուժեն, ռեժիսուրան, դերասանական խաղը, այլ աշխատի զուգահեռ ֆիլմի դրամատուրգիայի զարգացման հետ՝ չգերիշխելով ռեժիսուրային։ Որպես կոմպոզիտոր՝ պետք է հաշվի առնես ոչ միայն բոլոր կերպարների խառնվածքը, այլև զգաս սյուժեի պատմության, ժամանակաշրջանի շունչը: Բացի այդ, կոմպոզիտորը պետք է հասկանա և ուսումնասիրի ֆիլմի անձնակազմից յուրաքանչյուրի աշխատանքը. նույնիսկ ֆիլմի գունաբաշխումը ազդում է երաժշտական գործիքների ընտրության վրա: Կարճ ասած՝ կինոերաժշտությունը ոչ թե կոմպոզիտորի սեփական փիլիսոփայությունն է, այլ նուրբ հոգեբանական մոտեցումը կինոյին։ Որպես օրինակ կարող եմ բերել ֆուտբոլիստին, ով և´ դարպասապահին է նայում, և´ խաղընկերներին, և՛ խաղահրապարարակին ու ամեն վայրկյան փորձում գտնել իր տեղն ու դերը այդ խաղում ….

- Որքա՞ն տևեց ստեղծագործական աշխատանքը, և ի՞նչ դժվարություններ եք ունեցել:

- Ստեղծագործական պրոցեսը տևեց մոտ 4 ամիս: Ընդհանրապես, այն, ինչ ստեղծագործական աշխատանքում համարվում է դժվարություն, ես դժվարություն չեմ համարում և կատարում եմ մեծ սիրով … Միակ իրական դժվարությունը կենդանի հաղորդակցման բացակայությունն էր. ստիպված էինք Skype-ով շփվել: Սակայն, կարևորն այն է, որ պրոդյուսերները՝ Տիգրան Համբարձումյանը և Մկրտիչ Արզումանյանը, շատ պրոֆեսիոնալ են մոտեցել կինոկոմպոզիտորի աշխատանքին, ինչն արդեն իսկ հեշտացրեց իմ գործը: Նրանք եզակիներից են հայկական հետսովետական կինոշուկայում, ովքեր, հասկանալով երաժշտության դերը կինոյում, կարևորեցին ֆիլմի ամբողջ երաժշտական ձևավորման օրիգինալությունը: Ֆիլմում ծայրից ծայր հնչում է հատուկ «Փախիր կամ ամուսնացիր»-ի համար գրված երաժշտություն, բացառությամբ՝ 1-2 կարճ դրվագների:

- Ինչպե՞ս գրվեցին սաունդթրեքները: Ի՞նչ ոճ և ուղղվածություն ընտրվեց:

- Նախ և առաջ մենք փորձել ենք ոչ թե ինչ-որ հիթային բան ստանալ, այլ հետևել սցենարի, կերպարների և բուն ֆիլմի թելադրանքին: Ռակետա մեքենայի պատմությունը մեզ հուշեց գրել 70-80-ականների ոճի ռետրո երաժշտություն՝ մատուցված ժամանակակից շնչով: Այս նպատակով համատեղել ենք ակուստիկ և էլեկտրոնային գործիքները, համեմել հատկապես շեփորների առանձնահատուկ հնչեղությամբ: Այդպիսով՝ գունային հետաքրքիր գամմա հաղորդեցինք ֆիլմին:

-Արդյո՞ք սա ֆիլմի սաունդթրեք գրելու Ձեր առաջին փորձն էր:

- Ո՛չ, առաջին անգամը չէր: Մինչ «Փախիր կամ ամուսնացիր» ֆիլմի առաջարկը, ես ռուսաստանյան 2 հեռուստասերիալի երաժշտության հեղինակ եմ եղել: Հիմա էլ արդեն Ռուսաստանի առաջին ալիքի համար նկարահանվող սերիալի երաժշտության առաջարկ ունեմ, որը մինչև այս տարվա վերջ պետք է հեռարձակվի:

- Խոսենք երգի մասին՝ «Դու հանելուկ ես»: Այն արդեն իսկ հասցրել է սիրվել, ինչպես և ֆիլմը. ո՞րն է գաղտնիքը:

- Այն նախ և առաջ օրիգինալ է: Օրիգինալ է հենց նրանով, որ կարողացել ենք հինը նորովի մատուցել: Եվ հետո, Մկրտիչ Արզումանյանին որպես փայլուն դերասան բոլորս էինք ճանաչում, բայց այն, որ նա նաև փայլուն երգում է` ոչ բոլորը գիտեին: Ես վստահ եմ, որ դա շատ գեղեցիկ անակնկալ էր հանդիսատեսի համար: Ինչ խոսք, Իվետա Մուկուչյանն էլ հոյակապ ձայնային տվյալներով երգչուհի է, և այս դուետը, կարծում եմ, իրոք ստացված է:

«Փախիր կամ ամուսնացիր» ֆիլմը հետսովետական շրջանի եզակի հայկական ֆիլմերից է, որը պատրաստվել է պրոֆեսիոնալ մոտեցմամբ. հատուկ գրվել են կինոերաժշտություններ ամբողջ ֆիլմի համար: Շնորհակալ եմ Տիգրան Համբարձումյանին և Մկրտիչ Արզումանյանին իրական ԿԻՆՈ ստեղծելու համար, որը տարբերվեց «կլուբային» կամ, այսպես ասած, սքեթչային կինոներից: Հուսանք, որ մեր կինոշուկայում էլ ավելի շատ կլինեն նման աշխատանքները:

Աղբյուրը՝ emporium.am