«Շատերը մտածում են, որ եթե մոդել ես ուրեմն ինչ-որ մեկի սիրուհին ես».  Թերեզա Մարտիրոսյանը մոդելային կարիերայի մասին (street photoshoot)

Tert.am Youth-ը street ֆոտոշարքի շրջանակներում մոդել Թերեզա Մարտիրոսյանի հետ իրականացրեց ֆոտոշարք և հարցազրույց` խոսելով մոդելային կարիերայի և անձնականի մասին:

Թերեզա, ինչպե՞ս սկսեցիք զբաղվել մոդելային կարիերայով և որքա՞ն ժամանակ է, ինչ այդ ասպարեզում եք:

-Մինչ 18 տարեկանս ապրել եմ Կապան քաղաքում, իսկ հետո, երբ ընդունվեցի  պետական կոնսերվատորիա, տեղափոխվեցի Երևան: Հենց այդ ժամանակ ընկերներիցս մեկի խորհրդով գրանցվեցի ATEX մոդելային գործակալություն և շուրջ 5-6 տարի արդեն այս ասպարեզում եմ:

Ըստ ձեզ` Հայաստանում մոդելային շուկայում առաջընթաց  նկատվո՞ւմ է։

-Եթե համեմատեմ 5 տարի առաջվա հետ, ապա, իհարկե, նկատվում է առաջընթաց: Բնականաբար, արտասահմանյան շուկայի հետ չենք կարող համեմատվել: Օրինակ` մեզ մոտ մոդելների ընտրության հարցը վիճելի է: Մեզ մոտ շատ քիչ են լինում ցուցադրություններ. դա ևս մեծ խնդիր է: Բացի այդ արտերկրում ամեն բան հստակեցված է, եթե ժամից ավել ես աշխատոնում, ապա դրա համար ավել գումար են վճարվում: Իսկ մեզ մոտ՝ ոչ:

Մոդելների մասին շատ կարծրատիպեր կան ինչպե՞ս եք վերաբերվում դրանց:

-Կարելի է ասել արդեն սովորել եմ: Բնականաբար արտերկրում չեն քարկոծում, երբ մոդելը ավելի համարձակ ֆոտոշարքերով է ներկայանում: Կամ շատերը մտածում են, որ եթե մոդել ես ուրեմն ինչ-որ մեկի սիրուհին ես և այլն: Իմ կարծիքով դեռ 20-30 տարի կլինեն այդ խոսակցությունները: Հատկապես, բարձրահասակ, շեկ մազերով աղջիկներին այլ կերպ են նայում: Բայց ես դրանից չեմ նեղվում. դա սովորական է դարձել ինձ համար: Այ, որ չնայեն ես ինձ վատ կզգամ (ժպտում է):

Հայաստանում կա՞ մրցակցություն մոդելային ասպարեզում:

-Մեզ մոտ չկա, քանի որ շուկան  փոքր է և բացի այդ բոլոր մոդելները ընկերուհիներ են: Իսկ արտերկրում կա:

Ի՞նչ դժվարությունների միջով եք անցել:

-Սկզբնական շրջանում շատ դժվար էր, երբ շատերը չէին ճանաչում ինձ և միայն քասթինգների միջոցով էի մասնակցում միջոցառումների: Բացի այդ քաղաքին այդքան էլ ծանոթ չէի: Մի տեղ գնալուց մի քանի ժամ պտտվում էի քաղաքով մինչ գտնում էի: Սկզբում ակցենտով էի խոսում: Ամեն ինչ ժամանակի ընթացքում հաղթահարեցի:)

Մասնագիտությամբ երաժիշտ եք, հնարավո՞ր է, որ միայն երաժշտությամբ սկսեք զբաղվեք:

-Այո, հնարավոր է, ինչո՞ւ ոչ: Մտադրություն ունեմ արտերկիր գնալու և մասնագիտությունս  այնտեղ շարունակելու: Մեզ մոտ կան մասնագիտություններ, որոնք սահմանափակ են և դու չես կարող առաջ գնալ և նոր ձեռքբերումներ ունենալ: Կարծում եմ, օպերային մշակույթը մեզ մոտ այդքան էլ զարգացած չէ: Իսկ մոդելային կարիերայով կզբաղվեմ այնքան ժամանակ, որքան կպահպանվեմ: Իսկ Հայաստանում դա երկար չի կարող տևել, քանի որ ես ինքս երեկոյան ժամերին եմ աշխատում, ուշ եմ քնում, սննդակարգս է խախտվում... Իսկ կազմվածքդ պահպանելու համար, պետք է ինքդ այդ ամենը կարգավորես և ժամանակ ունենաս նաև մարզասրահ գնալու համար: Բացի այդ, երբ ամուսնանամ միգուցե և էլ չզբաղվեմ մոդելային կարիերայով:

Իսկ կա՞ն մտադրություններ արտերկրում ապրելու և մասնավորապես որտե՞ղ:

-Եթե ստացվի արտասահմանում սովորել, ապա կգնամ, բայց ոչ ընդմիշտ: Նախընտրում եմ Գերմանիայում լինել:

Իսկ անձնականումում ի՞նչ նորություններ կան:

-Անձնական կյանքում երկար ժամանակ է, ինչ նորություն չունեմ: Դեռևս չեմ հանդիպել այն տղամարդուն, որին պատկերացնում եմ իմ կողքին: Իմ կողակիցը պետք է լինի արտաքնապես հմայիչ, թիկնեղ, իսկ բնավորությամբ` հանգիստ, ձայնը չբարձրացնի կնոջ վրա և ինքնասիրահարված չլինի:

Հանդիպե՞լ եք այնպիսի տղամարդու, որը ինքնասիրահարված է եղել:

-Այո, բայց դրա մասին չեմ ցանկանում խոսել:

Նյութը՝ Մելինե Տոնոյանի

Լուսանկարները՝ Կարեն Հովհաննիսյանի