Ինչպես են նշել Վարդավառը Գառնիում ու Գեղարդում (լուսանկարներ)

Ինչպես նախորդ երկու տարիներին, այս տարի ևս Վարդավառը ընդգծված կերպով տոնվեց Գեղարդում և Գառնիում, որին մասնակից էր նաև Tert.am Life-ը:

Սփյուռքահայ և հայաստանաբնակ երիտասարդները հնարավորություն ունեցան ծանոթանալու տոնի իրական արմատներին՝ «Վարդավառ միջազգային փառատոնի» շնորհիվ:

«Վարդավառ» միջազգային փառատոնին ամեն տարի մասնակցում են նաև հարյուրավոր եվրոպացի երիտասարդներ, ինչը մեծապես նպաստում է հայկական մշակույթի, ավանդույթների տարածմանն ու Հայաստանի իմիջի ձևավորմանն այլազգիների շրջանում:

«Այսպիսով մենք փորձում ենք աշխարհին ներկայացնել հայկական մշակույթը և երիտասարդության շրջանում պահպանել ազգային-հոգևոր արժեքները»,- մեզ հետ զրույցում ասաց Երիտասարդական ակումբների դաշնության նախագահ, փառատոնի ղեկավար` Ատոմ Մխիթարյանը:

Փառատոնի այս տարվա խորագիրն էր «Ազգային ավանդական խաղեր». «Երիտասարդ խաղավարների միջոցով վեր հանեցինք այն խաղերը, որոնք մեր նախնիներն են խաղացել»,- նշեց փառատոնի ղեկավարը: Ինչպես նախորդ տարիներին, այս տարի ևս փառատոնը մեկնարկեց Գառնիում մարզային տաղավարների բացմամբ, որտեղ յուրաքանչյուր մարզ ներկայացավ Վարդավառը նշելու իր առանձնահատուկ ավանդույթներով: Շատ կարևոր մի հանգամանք պետք է առանձնացնել՝ բոլոր տաղավարների ներկայացուցիչները երիտասարդներ էին։

Գառնիից տեղափոխվեցինք Գեղարդ։

Գեղարդի վանքային համալիրում տեղի ունեցավ Տիրոջ Պայծառակերպությանը նվիրված Սբ. Պատարագ, որի ընթացքում պատարագիչը ջուր ցողեց ներկաների վրա: Այնուհետև տեղի ունեցավ մատաղի և երիտասարդության օրհնության արարողակարգը, որից հետո ազգային երգ ու պարի ներքո այն բաժանվեց փառատոնի մասնակիցներին:

Արդեն երեկոյան Գառնիում «Ակունք» ազգագրական երգ ու պարի համույթի, երիտասարդ դերասանների և կատարողների մասնակցությամբ մեկներկեց Վարդավառի ծիսակատարության բեմադրությունը։

Արարողակարգը գրեթե ավարտվել էր և Tert.am Life-ի անձնակազմը պատրաստվում էր ճանապարհ ընկնել Երևան, սակայն փոքրիկ բացահայտում՝ «Պիտի ջահել լինես ու այսքան պարելու, երգելու, ջրելու ու ջրվելու ցանկություն ունենաս։ Երանի այս ջահելներին։ Այսօր հիշեցի, որ ամուսնուս հետ Վարդավառի տոնին եմ ծանոթացել։ Ջրեց ինձ ու մի լավ կռվեցինք։ Ջրի դույլով հարվածել եմ նրան։ Հետո արածիցս շատ եմ ամաչել։ Կռվեցինք, բայց հետո հորիցս ձեռքս խնդրեց։ Փաստորեն՝ այս տոնը նաև սիրելու տոն է»,- ամփսոսանքով, ամոթխած ժպիտով ու կարոտով Tert.am Life-ին պատմեց գաթա վաճառող տիկին Վերժինեն։

                                                                                                               Անահիտ Կասամանյան