Նազենին, Սոֆին, Աստղիկը, Լուսինեն և շատ ուրիշներ Արամ Նիկոլյանի «Այնթափ» հավաքածուի ցուցադրությանը (լուսանկարներ)

Դիզայներ Արամ Նիկոլյանը երեկ` սեպտեմբերի 7-ին, ներկայացրեց «Այնթափ» նոր հավաքածուն:

Tert.am Life-ի հետ զրույցում դիզայները նշեց, որ այս հավաքածուն նույնպես հայական մշակույթի վերածնունդն է:

« «Այնթափ» հավաքածուն փաստում է, որ 21-րդ դարում հայական բազմաշերտ մշակույթը նույնպես կարող է նորաձև լինել: Այս հավաքածուն շարունակությունն է «Ուրֆա» հավաքածուի: « «Այնթափ»-ում զետեղված են սև ու սպիտակ զգեստներ, քանի որ պարզ և ճոխ ասեղնագործությունն այդ գույների վրա են լավ երևում: Որոշ զգեստներ ձեռքի աշխատանքներ են, որոշներն էլ մեքենայով կարված: Ինձ համար շատ կարևոր էր, որ ժամանակակից տեխնիկայով ստանամ հայկական մշակույթը»,-ասաց Արամը:

«Այնթափ. վերածնված արժեքներ» հավաքածուի ցուցադրությանը, որի հիմքում ազգային մշակույթի տարերն են, հրավիրված էին մի շարք հայտնի մարդիկ` Նազենի Հովհաննիսյանը, Սոֆի Մխեյանը, Աստղիկ Սաֆարյանը, Լուսինե Թովմասյանը, Դիանա Շատվերյանը, Արամ MP3-ին, Արսեն Գրիգորյանը, Նունե Եսայանը, Անահիտ Սիմոնյանը, Էրիկ Անթարանյանը, Ավետ Բարսեղյանը և շատ ու շատ ուրիշներ:

Արամի խոսքով` Եվրոպայից, Ռուսաստանից, Միացյալ Նահանգներից հրավերներ ունի. «Երբ «Ուրֆա» հավաքածուն ցուցադրեցի արտերկրում, բավական լավ ընդունվեց: Այս ոլորտում նոր բան ասելը դժվար է, իսկ երբ դու անդրադառնում ես քո արմատներին, բազմաշերտ, հարուստ մշակույթին, կարողանում ես օտարերկրացու համար լինել հետաքրքիր ու նոր շունչ ասող մարդ»:

Հատկանշական է, որ Հայաստանում շատ քիչ դիզայներներ են, որ նորաձևոթյան ցուցադրություն են կազմակերպում: Արամի Նիկոլյանը այդ քչերից է, որի կածիքով. «Եթե հաշվի առնենք, որ ցուցադրությունը շահավետ չի և չանենք, ապա այս ոլորտը չի զարգանա Հայաստանում: Համաշխարհային նորաձևության տներն էլ միշտ ավելի շատ ծախսում են ցուցադրության վրա, քան ստանում են հավաքածուի վաճառքից: Ես չեմ կարող մեջս պահել այն, ինչ ստեղծում եմ»:

Ոճաբանը նշեց, որ սովորաբար ցուցադրությունից հետո գրեթե բոլոր զգեստները վաճառվում են:

«Իմ նպատակներից մեկն այն է, որ ցանկացած հավաքածու պոդյումից հետո կյանք ունենա մարդկանց մեջ: Իհարկե, ձեռքի աշխատանքը մի քիչ թանկ կլինի, իսկ ընդհանուր հավաքածուն՝ միջին գնային կատեգորիայի»:

Նյութը` Մելինե Տոնոյանի

Լուսանկարները` Կարեն Հովհաննիսյանի