Ի՞նչ են հագնում հայ երիտասարդները և որո՞նք են այս աշնան գլխավոր թրենդները. street style ֆոտոշարք

16:01 • 26.09.16

Անձրևային եղանակն արդեն զգացնել է տալիս, որ պետք է մեր զգեստապահարանն անհապաղ թարմացնել։

Tert.am Life-ի հետ զրույցում նկարիչ-մոդելավորող Արփինե Կոշտոյանը ներկայացրեց աշուն-ձմեռ 2016-2017 սեզոնի նորաձևության միտումները։

«2016 թվականի նորաձև ուրվագծերը կլինեն ազատ ձևվածքի։ Սա շատ լավ նորություն է, քանի որ ազատ ձևվածքի հագուստը շատ լավ է նայվում ցանկացած կազմվածքի վրա, իսկ աքսեսուարների ճիշտ ընտրության պարագայում թույլ է տալիս ընդգծել սեփական առավելությունները։ Բացի այս նորաձև են նաև «միձի» չափսի կազմվածքը ընդգծող զգեստները»,- ասաց Արփինեն։

Դիզայների խոսքով՝ այս տարի ավելի նորաձև են մինիմալիստական, պարզ զգեստները։

«Կերպարը ավելի հետաքրքիր և հարուստ կարելի է դարձնել կրելով աքսեսուարներ։ Այս տարի ակտուալ են ուսագոտով պայուսակները, որոնք կարել է համադրել դասական և գլամուր look-երի հետ։ Ակտուալ են նաև մեծ շարֆերը, որոնք մինիմալիստական զգեստների հետ համադրելիս կարող եք շատ գեղեցիկ տեսք ստանալ»,- ասաց Արփինեն։

2016 թվականի աշուն-ձմեռ հավաքածուի գույները հիացնում են իրենց բազմազանությամբ:

«Մուգ կապտականաչավուն, նարնջագույնի բոլոր երանգները, արքայական կապույտը, որն արդիական է բոլոր ժամանակներում, ազնավական կապույտն այս անգամ ևս նորաձև է: Թափանցիկ զգեստներն այս ձմռան հիթերն են և տոնական օրերի համար ամենալավ տարբերակներն են: Բաց վարդագույնը թվում է չի համապատասխանում աշնանն ու ձմռանը, սակայն կարծրատիպերը կոտրելու ժամանակն է: Բալի գույնն այս անգամ կրկին ակտուալ է: Մանուշակագույնն ու վարդագույնը մի փոքր երկրորդական են, և կարելի է այդ գույների մեջ ունենալ շարֆ, պայուսակ, գոտի»,- եզրափակեց Արփինեն։

Ինչպես ասում են նորաձևությունը թելադրում է, իսկ ոճը ստեղծում եք ինքներդ։

Tert.am Life-ը ֆոտոշարք է իրականացրել Երևանի կենտրոնում, թե ինչ են նախընտրում հագնել հայ աղջիկները։