Մարդուն կարելի է բնորոշել նրա լսած երաժշտությամբ. Ժակ

1975թվականին ՅՈՒՆԵՍԿՈ-ի որոշմամբ հոկտեմբերի 1-ը նշանակվել է երաժշտության միջազգային օր:

Եաժշտության միջազգային օր ստեղծելու մտահաղացման հեղինակներից մեկն է նաև կոմպոզիտոր Դմիտրի Շոստակովիչը: Տոնը նշվում է ամեն տարի մեծ երաժշտական ծրագրերով:

Երաժշտության դերն ու նշանակությունը բավականին մեծ է ցանկացած մարդու կյանքում: Դժվար թե գտնվի որևէ մեկը, որը ամբողջությամբ անտարբեր կգտնվի երաժշտության նկատմամբ:

Դարերի և հարազարամյակների ընթացքում երաժշտությունը եղել է մարդականց  ստեղծագործական ինքնարտահայտման, նրանց մշակութային ավանդույթների, կրոնական ծեսերի և առօրյա գոյության մի մասը:

Տոնի առիթով Tert.am Life-ը զրուցել է հեռուստառադիոհաղորդավար Ժակի հետ, որը տարիներ շարունակ երաժշտական նախագծեր է իրականացրել ռադիոյի և հեռուստատեսության եթերում:

Ժակը կարծում է, որ տոնի պրոպագանդման խնդիր մեր երկրում չկա, քանի որ առավել առաջնային է լավ ու ճիշտ երաժշտության տարածումը: Երբ խոսեցինք մեր երկրում առկա երաժշտական խնդիրների վերաբերյալ , ապա հաղորդավարն առանձնացրեց երեք հարցեր, որոնց պատասխանները  հաղորդավարը չունի:

«Ուզում եմ հասկանալ, թե ո՞ւր ենք գնում մենք այսպիսի երաժշտություն մատուցելով: Արդյո՞ք իրավունք ունենք պաշտպանելու վատ երաժշտություն մատուցող ստեղծագործողներին: Ովքե՞ր են այն մարդիկ,  որ հայտնվել են փոքրամասնության մեջ և պայքարում են որակով, ասելիքով ու ներաշխարհով արտիստների կատարմամբ մատուցված երաժշտությունը»,- նշեց Ժակը:

Երաժշտական տենդենցների վերաբերյալ հաղորդավարն ասում է, որ այն նման է նորաձևությանը և պարբերաբար որոշակի շրջափուլեր կրկվում են: Հնի նորացումը համարում է նորմալ, եթե մատուցվում է գրագետ:

Ժակը գտնում է, որ կա երաժշտական որշակի ճգնաժամ և դա համաշխարհային տարածում ունի ու Հայաստանը բացառություն չէ: Ցածրորակ երաժշտության տարածման լավագույն հակաթույնն էլ հետևյալ բանաձևում է տեսնում:

«Յուրաքանչյուր ծնող պարտավոր է երեխայի մեջ սեր սերմանել դեպի լավ երաժշտությունը: Կյանքի ընթացքում մարդ  ամեն տեսակ երաժշտություն էլ լսում է, սակայն, երբ պատվաստանյութդ լավն է, ապա շեղվելու հավանականությունը քիչ է: Ես համոզված եմ, որ մարդուն բնորոշել  կարելի է նրա լսած երաժշտությամբ ու այն ընկալումներով որով նա վայելում է այդ երաժշտությունը»,- համոզված է Ժակը:

Հաղորդավարը կարծում է, որ Հայաստանում  երաժշտական փոփոխությունները ակնհայտ երկու բևեռների են բաժանված:

«Ծաղկում ապրեց ռեստորանային երաժշտությունը, որպես էստրադա մատուցելու  ձև, որը իսկապես այդպես էլ ընկալվում է: Ռեստորանային երաժշտությանը դեմ չեմ, քանի որ հաճախ աշխատում  եմ հրաշալի արտիստների ու երաժիշտների հետ  որոշակի միջոցառումների շրջանակում: Սակայն ուզում եմ նշել, որ մենք պետք է հասկանանք, որ քաղաքային տրանսպորտում չի կարելի մատուցել այդ ռեստորանային,  քեֆի երաժշտությունը: Նորմալ է, որ մարդիկ սկսել են շատ երգել հարսանեկան ու կոմերցիոն երգեր, քանի որ դա միջոց է, որով արտիստները իրենց «պատրաստակամությունն» են հայտնում լինել մարդկանց կողքին իրենց միջոցառումների ժամանակ:  Ցանկացած բացասական լճացման ֆոնի վրա ծաղկում է հակառակ դրական բևեռը: Ձևավորվեց մի մշակույթ, որը սկսեց մերժել «պլյուսով» երգելը»,- Tert.am Life-ի հետ զրույցը եզրափակեց ռադիոհեռուստահաղորդավար  Ժակը:

Նյութը՝ Անահիտ Կասամանյանի