Նոր բացահայտումներ «Ազիզյաններ»-ի ընտանիքից հենց նկարահանման հրապարակում. այսօր կմեկնարկի սիթքոմի առաջին սերիան

Այսօր երեկոյան «Ucom»-ի ցանցում գործող «Արմենիա Պրեմիում» հեռուստաալիքով կցուցադրվի  «Ազիզյաններ» սիթքոմը, որը հայկական ընտանիքի մասին է:

Tert.am Life-ի հետ զրույցում դերասան Հայկ Մարությանը նշեց, որ երկար են պատրաստվել մինչ նկարահանումներին անցնելը: Յուրաքանչյուր մասնիկի վրա նրանք մանրակրկիտ աշխատել են:

«Սովորաբար, մենք ամեն մի գործ ներկայացնելուց հետո, հաջորդը ձգտում ենք էլ ավելին անել: Տաղավարի վրա շատ երկար ենք աշխատել և ստացել ենք այն, ինչ-որ ուզում էինք: Բավականին մեծ ներդրում է արվել:  Շատ գոհ ենք նաև քասթինգից։ Բոլոր հիմնական դերասաններն արդարացրել են իրենց։ Ստացել ենք այն կերպարները, որոնք ուզում էինք»,- ասաց Հայկը:

Նշենք, որ վերջինս մարմնավորում է Գառնիկ Ազիզյանի կերպարը՝ հագուստի խանութի վաճառող, ընտանիքում միակ աշխատողը: 

Դերասանի խոսքով՝ «Սիթքոմը նաև հետաքրքիր կլինի 30-անց մարդկանց համար, բայց դա չի նշանակում, որ անհետաքրքիր կլինի թինեյջերներին»:

Հատուկ իր կերպարի համար դերասանը բեղեր է պահել: Չնայած իրական կյանքում դա անհարմարություններ է պատճառում:

«Դա նաև իմ հարմարավետության  համար է, որովհետև նկարահանման հրապարակում բեղերը, երբեմն, պոկվում են ու շեղում։ Մի փոքր անհարմար է իրական կյանքում։ Մարդիկ չեն ճանաչում կամ ասում են՝ մեծացել ես, ծերացել։ Սիթքոմում մեզ հենց դա էլ պետք էր: Շատ եմ աշխատել ու ծերացել եմ (ծիծաղում է)»,- ավելացրեց Հայկը:

Ընտանեկան դիտման համար նախատեսված իրավիճակային կատակերգության հերոսներին մարմնավորել են Անի Լուպեն, Սաթենիկ Հազարյանը, Իշխան Ղարիբյանը, Սուրեն Առուստամյանը և այլ հայտնի դերասաններ:

Դերասանուհի Անի Լուպեն մարմնավորում է Գառնիկ Ազիզյանի կնոջ կերպարը:

«Ազիզյաններն  իրարից շատ տարբեր են, բայց մենք շատ ենք սիրում իրար։ Տանը մենք անընդհատ վիճում ենք, իսկ դրսում պաշտպանում միմյանց: Իմ կերպարը զարգացող է: Հեռուստադիտողն ամեն անգամ նոր ձևով է բացահայտելու նրան»,- ասաց Անին:

Ազիզյանների հարևանուհուն մարմնավորող դերասանուհի Սաթենիկ Հազարյանը նշեց, որ հերոսուհին շատ ուժեղ կին է։ «Այս կինն այնքան ուժեղ է, որ որոշումներն ինքն է կայացնում։ Ամուսինը լրիվ իր ազդեցության տակ է»:

Վերջինս հավելեց, որ կերպարը բացարձակ իրեն նման չի:

«Ես չեմ սիրում, երբ կինն է ընտանիքում իշխում: Բայց սա դեր է, իսկ դերասանի համար պետք է դերը կերտելու դժվարություն չլինի»,- նշեց դերասանուհին:

Սիթքոմի ամենափոքր դերասանը 11-ամյա Ստեփան Հովհաննիսյանը, որը Ազիզյանների տան փոքրն է: Մեզ հետ զրույցում նա պատմեց իր կերպարի մասին. «Լևոնը խելացի երեխա է։ Երևի, ընտանիքի անդամներից ամենախելացին է: Ամենաշատը եղբորն է սիրում։ Երբեմն, հիմարություններ է անում, որ ջղայնացնում է մամային ու պապային»:

Նյութը՝ Մելինե Տոնոյանի

Լուսանկարները՝ Կարեն Հովհաննիսյանի