«Համաշխարհային առումով նորաձևության ոլորտը հավասար է նարկոբիզնեսի». Արամ Նիկոլյան

15:26 • 15.11.16

Հայաստանում նորաձևության ոլորտում մի շարք խնդիրներ կան, որի մասին այսօր լրագրողների հետ հանդիպման ժամանակ բարձրաձայնեցին դիզայներ Արամ Նիկոլյանը և ոճաբան-բլոգեր Սիրափի Ադամյանը: Վերջիններս, դեռևս 1999 թվականից նորաձևության ոլորտում են և համեմատելով նախորդ տարիների հետ, այսօր չեն տեսնում ոլորտի այն զարգացած աստիճանը, որը պատկերացնում էին տարիներ առաջ: Մասնագետների կարծիքով խնդիրները շատ են:

«Մենք անընդհատ հայկական նորաձևությունը համեմատում ենք վրացականի հետ և կարծում եմ, որ դա նորմալ է: Դրանից պետք չի խուսափել, քանի որ նույն տարածաշրջանում ենք գտնվում և հարևան երկրներ ենք: Մի շատ կարևոր տարբերություն կա մեր և վրացիների միջև՝ այն ինչ-որ հիմա տեղի է ունենում հայկական նորաձևության ոլորտում, դա Վրաստանում եղել է 6-7 տարի առաջ: Պատճառը աշխարհագրական դիրքը, քաղաքատնտեսական և կրթական վիճակն է»,- ասաց Սիրարփին:

Արամը, վերջինիս հետ համակարծիք լինելով, հավելեց. «Գիտելիքը մեր ոլորտում ամենակարևոր տարրերից է և ամեն ինչ սկսվում է հենց դրանից: Կրթական համակարգը շատ է կաղում: Մեզ մոտ տարբեր բուհերում դեռ դասավանդում են սովետական ծրագրերով, որի արդյունքում մենք չունենք լավ մասնագետներ: Բացի այդ նոր սերնդի մեջ նկատվում է ծուլությունն ու ալարկոտությունը: Իհարկե, չեմ բացառում, որ կան երիտասարդներ, որոնք հետաքրքիր մտածելակերպ ունեն, բայց իրենք շատ քիչ են: Մյուս խնդիրը այն է, որ յուրաքանչյուրի մեջ կա լիդերությունը: Նույն այդ երիտասարդները երբևէ չեն ցանկանում գալ կայացած դիզայների մոտ պրակտիկայի, կամ եթե անգամ գալիս են դրանից հետո,ասում են, որ դիզայների հաջողությունը կախված է իրենցից: Մեր երկրում պակասում է նաև միջին մասնագիտությունների կրթության բացակայությունը»:

Սիրարփիի կարծիքով՝ հայ ազգը տաղանդավոր և շնորհալի ազգ է, բայց այդ տաղանդը պետք է օգտագործել սովորելով և նորը ստեղծելով:

«Նկատելի է, որ եթե մեկը մեզ մոտ մի լավ աշխատանք է կատարում սահմանափակվում է միայն դրանով և չի շարունակում ինքն իրեն գերազանցել: Մի շատ լավ ասացվածք կա՝ «բոլորն են կարող են լավ գիրք գրել, սակայն ոչ բոլորի մոտ է հաջողվում երկրորդը»: Սա նաև վերաբերվում է նորաձևության ոլորտին»,-նշեց ոճաբանը:

Արամ Նիկոլյան էլ հավաստեց, որ այսօր շատ հեշտ է սոցցանցերի միջոցով կայանալ. «Այսօր տեխնոլոգիաների դարաշրջանում շատ հեշտությամբ սոցցանցերի միջոցով կարող են դառնալ դիզայներներ: Շապիկի վրա ինչ-որ մի բան են տպագրում, ասում են, որ իրենք դիզայներ են և «լայք»-երով փորձում են ինքնահաստատվել: Ցավալի է, բայց դա մեր իրականությունն է»:

Վերջինս իր անցած փորձով երիտասարդներին հորդորեց, որ աշխատասեր ու նպատակասլաց լինեն:

«Երբ նոր էի այս ոլորտում, երբևէ չի եղել մարդ, որը ինչ-որ մեծ գումարներ ներդներ իմ աշխատանքի մեջ կամ օգտակար լիներ: 1999-ից սկսած հաճախակի էին կազմակերպվում նորաձևության շաբաթ, հրավերներ էինք ստանում դրսից և մասնակցում էինք տարբեր մրցույթների: Իսկ այդ ամենն այսօր բացակայում է: Ես շատ եվրոպական երկրներում եմ սովորել և յուրաքանչյուր մասնագետից վերցրել եմ այն, ինչը ստեղծում էր իմ տեսակը»,- նշեց Արամը:

Դիզայները հավաստեց, որ մենք բազում հնարավորություններ ունենք նորաձևության ոլորտը զարգացնելու. «Առհասարակ, նորաձևության ոլորտը համաշխարհային առումով հավասար է նարկոբիզնեսի, զենքի առևտրի հետ, քանի որ նորաձևության ոլորտնն էլ այդչափ եկամտաբեր է: Մենք ունենք բազմաշերտ հարուստ մշակույթ, ինչով կարող ենք մենք հետաքրքիր լինել Եվրոպայի և առհասարակ աշխարհի համար: Ցավոք սրտի այդ օղակը բաց է: Արտադրողները շատ քիչ են և ամեն մեկն առանձին իր խնդիրներով փորձում է իր բիզնեսն առաջ տանել»:

Չնայած նրան, որ Արամը այն աշխատասեր դիզայներներից է, որոնք ամեն սեզոն ներկայացնում է նոր հավաքածուներ, նա համեստորեն իրեն լիարժեք կայացած մասնագետ չհամարեց:

«Երբ ես կունենամ մասսայական արտադրված միջին գնային կատեգորիայի իմ բրենդը, որը հաջողված կլիներ և մեր քաղաքում կտեսնեմ մարդկանց, որոնք հագնում են այդ բրենդի հագուստներ, ապա այդ ժամանակ ինձ կհամարեմ լիարժեք կայացած: Բայց ես այսօր աշխատում եմ անհատ մարդկանց համար, որոնք ինձ դիմում են»,- եզրափակեց Արամը:

Մելինե Տոնոյան