World Next Top Model 2017–ում 2–րդ տեղը զբաղեցրած 17-ամյա հայ մոդելը` մրցույթի սկանդալային պատմության մասին

Tert.am Life–ն իր ընթերցողներին պատմել է, որ World Next Top Model 2017 մրցույթում հայազգի Սուսաննա Եգորյանը զբաղեցրել է երկրորդ տեղը։ 17–ամյա աղջիկը ծնվել և մեծացել է Ղրղըզստանում, սակայն նրա ծնողները հայ են։ Սուսաննայի անվան շուրջ աղմուկ է հասունացել, քանի որ նա ներկայացրել է ոչ միայն Ղրղըզստանը, այլև Հայաստանը։ Tert.am Life–ը կապ է հաստատել մոդելի հետ և աղմկահարույց թեմայի մասին հարցազրույց արել նրա հետ։

–Սուսաննա, քո մասնակցությունը World Next Top Model 2017 մրցույթին սկանդալային դարձավ։ Իրականում ի՞նչ էր տեղի ունեցել։

–Երբ մասնակցեցի «Միսս Ղրղըզստան» մրցույթին, ստացա լավ տիտղոս, թեև չհաղթեցի, քանի որ այդ մրցույթում կարող է հաղթել միայն ղրղըզուհին։ Կազմակերպիչներն ասացին, որ ինձ կուղարկեն համաշխարհային մասշտաբի մրցույթի։ Ես համաձայնեցի, սակայն ինձանից 1500 եվրո էին ուզում` ինչ–որ լիցենզիայի համար։ Ես այդ մասին ասացի քրոջս` Ադրիանային։ Նա իմացավ, որ նման բան չկա, պարզապես փորձել են իմ հաշվին գումար աշխատել։ Քույրս գտավ World Next Top Model–ի կազմակերպչին, և ես մասնակցեցի մրցույթին միայն քրոջս հովանավորությամբ։

Մրցույթում ես ի սկզբանե ներկայացրել եմ Ղրղըզստանը։ Քանի որ ես ազգությամբ հայուհի եմ, ասացին, որ կարող եմ ներկայացնել երկու պետություն` իմ ապրելու երկիրն ու ազգությունը։

Երբ ինձ պարգևատրում էին «Վիցե միսս» տիտղոսով, ինձ վրա Հայաստանի ժապավենն էր, որովհետև ես չէի հասցրել կրել նաև երկրորդ ժապավենը։ Ղրղըզստանում ես շատ հայտնի մոդել եմ։ Սկզբում բոլորն ասում էին` ղրղըզստանցի մոդել Սուսաննա Եգորյանը մասնակցում է World Next Top Model 2017–ին, ստացել է մրցանակ։ Երկրորդ օրը բոլորը սկսեցին խոսել ժապավենի մասին և սկսվեց խառնաշփոթ։ «Միսս Ղրղըզստանի» կազմակերպիչն էլ ասել է, որ ոչինչ չի իմացել այդ մասին, իբր ես դավաճանել եմ իրեն և Ղրղըզստանը։ Իրականում նա նախապես իմացել է, որ ես երկու երկիր եմ ներկայացնելու։ Այդ ամենը վկայող նամակագրություն կա։ Ես Ղրղըզստանից չեմ հրաժարվել, ուղղակի որպես երկրորդ երկիր ներկայացրել եմ Հայաստանը։ Ես կարող էի, ընդհանրապես, հրաժարվել Ղրղըզստանը ներկայացնելուց, որովհետև ես ազգությամբ հայուհի եմ և իմ հաշվին եմ մեկնել մրցույթին։

Ես Ինստագրամի իմ էջում բացատրեցի` ինչն ինչպես է եղել։ World Next Top Model 2017 մրցույթի կազմակերպիչն էլ է հարցազրույց տվել և նշել, որ երկու երկիր ներկայացնելը մրցույթի կանոնադրության սահմաններում է։ Սակայն կան մարդիկ, որոնք, միևնույն է, վատն են խոսում։ Կարծում եմ` դա նախանձից է, վատը գրում են մարդիկ, որոնք լավ արտաքին չունեն։

–Այս ամենից օգտվեց նաև ադրբեջանական մամուլը, որը ողողված է նյութերով, իբր խարդախությամբ ես ստացել մրցանակը։

–Այդ մասին ոչինչ չգիտեմ։ Հիմա ամբողջ համացանցն իմ մասին ինչ–որ բան է գրում։ Ես միայն գիտեմ, թե ինչ է կատարվում Ղրղըզստանում։

–Ի՞նչ գործունեություն ես  ծավալում Ղրղըզստանում։

–Ես շատ հայտնի մոդել եմ Ղրղըզստանում։ Շատ մրցույթների եմ մասնակցել, 9 տիտղոս ունեմ։ Համաշխարհային մրցույթի առաջին անգամ էի մասնակցում։ Առհասարակ, Ղրղըզստանի պատմության մեջ առաջին անգամ է աղջիկը, որը մեկնել է միջազգային մրցույթի, ստանում «Վիցե միսս» տիտղոսը։ Ինքս էլ չէի սպասում այսպիսի հաղթանակի։

Այս տարի ավարտեցի դպրոցն ու ընդունվեցի Ղրղըզստանի իրավաբանական ակադեմիա։ Ապագա իրավաբան եմ։ Նաև «դեֆիլե» եմ դասավանդում Ղրղըզստանի մոդելային գործակալություններից մեկում։

–Բա՞րձր հոնորարներ ես ստանում։

–Ոչ, ես այդպես չէի ասի։ Կարող եմ նույնիսկ ասել, որ ինձ գումար չեն վճարում։ Ես դրանով զբաղվում եմ որպես հոբբի։ Ինձ դուր է գալիս իմ աշխատանքը։

–Հայաստանում հաճա՞խ ես լինում։

–Այո, ես այնտեղ եմ ապրում, սովորում, սակայն ամեն տարի գալիս եմ Հայաստան, քանի որ իմ բոլոր բարեկամներն այստեղ են ապրում։

–Այստեղ առաջին անգամ այսօր իմացան քո մասին։ Երբևէ չես ներկայացել Հայաստանում։ Ինչո՞ւ։

–Ես այստեղ միայն հյուր եմ գալիս, իսկ Ղրղըզստանում ապրում և սովորում եմ, դրա համար էլ այնտեղ եմ գործունեություն ծավալում։

Հիմա մտածում եմ մասնակցել «Միսս Արմենիա» մրցույթին։ Ես արդեն ունեմ համաշխարհային տիտղոս և մրցակից ընդհանրապես չեմ ունենա։ Իմ նպատակն է` մասնակցել «Միսս աշխարհ» մրցույթին։ Որպեսզի մեկնեմ այդ մրցույթին, պիտի հաղթեմ ազգային մրցույթ` «Միսս Հայաստան», «Միսս Ղրղըզստան» կամ «Միսս Ռուսաստան»։

–Ինչո՞ւ ես վստահ, որ Հայաստանի ազգային մրցույթում դու մրցակցությունից դուրս կլինես։

–Որովհետև ես մեծ փորձ ունեմ այս ոլորտում։ Ես կարծում եմ, որ ինձ հավասարը չկա։ Ես դա ապացուցել եմ միջազգային մրցույթում։ Այնտեղ 50 երկրի ներկայացուցիչ կար, բոլորը բարձրահասակ, գեղեցիկ մոդելներ էին, որոնք հայտնի էին իրենց երկրներում, բայց ես անցա իրենց։

Այս ասպարեզում աշխատում եմ արդեն 2 տարի և պրոֆեսիոնալ եմ իմ գործում։ Եթե այս տարի չստացվի, հաջորդ տարի կգամ և կպայքարեմ այդ տիտղոսի համար։

–Ո՞րն ես համարում քո գլխավոր արժանիքը։

–Բոլորն ասում են` կարևորը հոգին է, բայց ոչ։ Մարդու, հատկապես, մոդելի մեջ գլխավորն արտաքինն է, կեցվածքը և խարիզման։ Բացի այդ ամենը, ես նաև երգում և պարում եմ։ Շատ տաղանդներ ունեմ։