250.000 դոլար` Թուրքիայում մենաhամերգի, 150.000 դոլար` «Մի գնայի» տեսահոլովակի համար. Սուպեր Սաքոն` Թուրքիայից ստացած առաջարկների մասին

Մեկ շաբաթից ավելի է` ռեփեր Սուպեր Սաքոն Հայաստանում է։ Tert.am Life-ի հետ զրույցում ռեփերը պատմեց երևանյան այցի, նոր ծրագրերի և մինչ օրս քննարկվող «Մի գնա» երգի մասին։

–Սաքո, որքա՞ն ժամանակ է Երևանում եք և ի՞նչ նպատակով եք վերադարձել։

–Արդեն մեկ շաբաթ է` այստեղ եմ։ Հայաստանին մոտ տարբեր քաղաքներում համերգային շրջագայություն ունեմ։ Այստեղից ավելի հեշտ է գնալ, մասնակցել ու հետ գալ։ Բացի այդ, Երևանում նոր տեսահոլովակ եմ նկարահանել։ Աշխատանքի հետ համատեղ նաև հանգստանում եմ ընտանիքիս հետ։ Երևան եմ եկել կնոջս և երկու երեխաներիս հետ։ Երկար ժամանակ է, ինչ նրանք Հայաստանում չէին եղել։ Հատկապես, երեխաներս անհամբեր սպասում էին, թե երբ են մեկնելու Հայաստան։ Նրանց շատ ենք պատմել Երևանի մասին, ուզում էին, անպայման, տեսնել մեր քաղաքը։

–Այս ընթացքում հասցրե՞լ եք ընտանիքի անդամների հետ շրջել Հայաստանով։

–Այո, չնայած ժամանակը շատ սուղ է և ավելի շատ տեղերում կցանկանայի լինել, կարողացել ենք մի քանի տեղ գնալ։ Երեխաներիս շատ է դուր եկել այստեղ։ Եղել ենք Արցախում, Տաթևում, Սևանում։ Շատ կցանկանայի լինել Դիլիջանում, Ալավերդիում, բայց, ցավոք, չեմ հասցնի։

–Ի՞նչ տեսահոլովակ եք նկարահանել Երևանում։

–Արգենտինացի երգչի հետ զուգերգ է։ Ինձ համար նոր ոճի աշխատանք, որով նոր շուկա եմ մտնելու։ Երգը լատինո ոճում է։ Հուսով եմ, ինչպես «Մի գնա» երգը մեծ արձագանք ստացավ, այնպես էլ սա լատինո աշխարհում կսիրվի։ Չնայած «Մի գնան» իմ ուժերից վեր բան էր։ Ես չհասկացա` ինչպես այն տարածվեց ու սիրվեց։ Չեմ կարծում, որ այս երգը գրանցի նույն հաջողությունը։

–Ինչո՞ւ որոշեցիք տեսահոլովակը Հայաստանում նկարահանել։

–Հայաստանում տեսահոլովակ նկարահանող խմբերի աշխատանքներն ինձ շատ են դուր գալիս։ Բացի այդ, ինչու այդ գումարը ծախսեմ ԱՄՆ–ում, եթե կարող եմ ծախսել այստեղ, ու հայերը գումար աշխատեն։ Նկարահանումներն իրականացրել ենք պահեստներում, նկարահանման ստուդիաներում։ Սիրում եմ, որ  իմ տեսահոլովակները լինեն վառ, գունավոր, աղջիկներով, բայց այս տեսահոլովակը ռետրո ոճի մեջ է։ 

–Այս օրերին նաև համերգային շրջագայության եք մեկնում։ Որտե՞ղ եք մենահամերգներ տալիս։

–Իրաքում, Լիբանանում, Բեյրութում, ՔուԷյթում, Դուբայում, Քաթարում, Օդեսայում։ Մենահամերգի հրավերներ նաև Թուրքիայից եմ ստացել, բայց որոշել եմ չգնալ։ Սկզբում մտածում էի գնալու մասին, քանի որ առաջին անգամ թուրքերը հայերեն լեզվով երգ են երգում, ուզում էի ինքս տեսնել, թե ինչ են անում «Մի գնա» երգի ներքո։ Ես համարում եմ, որ այս երգն էլ իմ զենքն է, որով գրավել եմ ողջ Թուրքիան։ Բայց հայերը սխալ կընդունեն ու կասեն, որ թուրքամոլ եմ և այլն։ Չնայած կարծում եմ, որ ճիշտ կլինի գնալ, բայց, ցավոք, չեմ կարող։ 20 համերգ են առաջարկել, իսկ գումարները խենթանալու թվեր են։ Հետաքրքիրն այն է, որ մեր արտիստներից շատերը Թուրքիայում համերգներ են տվել, բայց նրանց մասին ոչ մի բան չեն խոսում։ Գիտեմ, եթե ես գնամ, մեծ սկանդալ կբարձրանա, դրա համար հրաժարվել եմ և Թուրքիային հարևան քաղաքներում եմ շրջագայում, որ իմ երկրպագուները կարողանան գալ, լսել։

–Ուզում եմ հարց տալ հայերին` գնա՞մ Թուրքիա համերգ տալու, թե՞ ոչ։

–Որքա՞ն հոնորար են առաջարկում թուրքերը մենահամերգի համար։ Ի՞նչ խենթանալու թվի մասին է խոսքը։

–10 համերգի համար պատրաստ են քառորդ միլիոն (250 հազար) դոլար տալ։ Բայց անկախ ամեն ինչից, ես չեմ գնալու։

—Հայաստանում մենահամերգ կազմակերպելո՞ւ եք։

–Այո, շատ եմ ուզում, որովհետև երկար ժամանակ է, ինչ այստեղ ոչ մի համերգ չեմ տվել։ Ուզում եմ Կ. Դեմիրճյանի անվան մարզահամերգային համալիրում մեծ շոու անել։

–Անդրադառնանք «Մի գնա» երգին, որը մինչ օրս քննարկվում է համացանցում, յութուբյան դիտումներն էլ օր օրի ավելանում են։ Ինչո՞վ է պայմանավորված երգի մեծ արձագանքը։

–Երգն իրականում այսպես է տարածվել`ես զանգ ստացա Թուրքիայի ռադիոներից մեկի տնօրենից։ Նա ինձ ասաց, որ պատահական լսել է երգը և իրեն շատ է դուր եկել։ Խնդրեց իրեն ուղարկել երգի որակյալ տարբերակը, որպեսզի ռադիոյով թողարկի։ Ես ուղարկեցի և այդտեղից սկսվեց ամեն ինչ։ Այն սկսեց տարածվել,  օր օրի անսպասելի դիտումներ էին ավելանում։ Հետո թուրք երգիչ Օզջան Դենիզն Ինստագրամի իր էջում հատված էր հրապարակել իր կատարմամբ «Մի գնա» երգից։ Դա մեծ իրարանցում առաջացրեց ադրբեջանցիների և թուրքերի միջև։ Այդ երգիչը պատրաստվում էր Ադրբեջանում համերգ տալ, բայց ադրբեջանցիները չեղարկեցին համերգը։ Օզջանը հայտարարությամբ է հանդես եկավ` ասելով` մշակույթը ազգ ու կրոն չի ճանաչում։

–Շատերն ասում են, որ «Մի գնա» երգի երաժշտությունը թուրքական է, հենց դա է պատճառը, որ մեծ տարածում է գտավ հարևան երկրում։

–Թուրքական ոճի շատ երգեր կան, ինչո՞ւ դրանք չտարածվեցին ու «Մի գնան» տարածվեց։  Մեկը կա՞, որ կարող է ինձ բացատրել։ Շատ երգիչներ կան, որ թուրքական ոճի երգեր են երգում։

Եթե պատմաբաններով քննարկես հարցը, թուրքական երգերն էլ են մերը եղել և գողացվել են։ Թուրքը օրիգինալ ի՞նչ ունի, ո՞վ ինձ կբացատրի. երաժտությունն էլ է մերը եղել, խալիներն էլ, կերակուրներն էլ, Թուրքիան էլ է մերը եղել։ Սրանք չվերջացող թեմաներ են, որոնց մասին միշտ կարող ենք խոսել։

—Պատրաստվո՞ւմ եք տեսահոլովակ նկարահանել «Մի գնա» երգի հիման վրա։

–Շատերն են սպասում, որ տեսահոլովակ նկարահանեմ, հենց դրա համար էլ չեմ ուզում նկարահանել։ Ես շոու բիզնեսից շատ լավ եմ հասկանում։ Հենց տեսահոլովակ նկարահանեմ այս երգը կկորցնի իր հետաքրքրությունը։ Արդեն ուշ է տեսահոլովակի համար։ Այն նույն հաջողությունը չի գրանցի։ Թող այս երգն էլ այսպես մնա։

–Ըստ մեզ հասած տեղեկությունների` Ձեզ գումար են առաջարկել Թուրքիայից, որպեսզի տեսահոլովակ նկարահանեք «Մի գնայի» հիման վրա։

–Այո, Թուրքիայի երաժշտական ալիքներից առաջարկներ եմ ստացել տեսահոլովակ նկարահանելու։ Նաև առաջարկեցին, որ գնանք Մոնակո և հենց այնտեղ իրականացնենք նկարահանումները։ Բոլորին մերժել եմ։ Տեսահոլովակի համար նրանք պատրաստ էին ինձ տալ 150.000 դոլար, բայց ինձ համար փողը կապ չունի։ Ես Ամերիկայում մեծացած, փող տեսած, կյանք տեսած մարդ եմ։ Եթե ես ցանկանամ նկարել տեսահոլովակ, կնկարեմ։ Ինձ պետք չեն այդ գումարները։ Իմ փոխարեն, հնարավոր է, շատ արտիստներ գայթակղվեին և ընդունեին առաջարկը, բայց ես նման բան չեմ անի։ Շատերին գիտեմ, որ ամեն մի առաջարկ ընդունում են կամ մրցանակաբաշխություններում փող են տալիս, որ իրենց մրցանակ տան։ Ես քծնվող մարդ չեմ և ամեն առաջարկ չէ, որ ընդունում եմ։