«Պայմաններն ինձ համար մի քիչ անհամապատասխան էին». Ֆելիքս Խաչատրյանը` երկարատև դադարի և եթեր վերադառնալու մասին

Հաղորդավար, ռեփեր Ֆելիքս Խաչատրյանը վերադառնում է հեռուստաեթեր. այս նորությունը շատերին ուրախացրեց` հաշվի առնելով այն հանգամանքը, որ Ֆելիքսը մի քանի տարի է` չի ներկայացել որպես հաղորդավար և երկրպագուները հասցրել են կարոտել նրան։

Ֆելիքսին հատուկ հումորը, սուր խոսքն ու անսպասելի հարցերը իրենց տեղը կգտնեն «Սիրո բանաձև» հաղորդման շրջանակներում։ Այն կմեկնարկի սեպտեմբերի 15–ին` Հանրայինի եթերում։ Հարցազրույցներ տալ Ֆելիքսը չի սիրում, սակայն Tert.am Life–ի համար բացառություն է արել։ Հաղորդավարի հետ զրուցել ենք մի քանի տարվա դադարից հետո եթեր վերադառնալու մասին։

–Ֆելիքս, տևական ժամանակ հեռուստաեթերում չէիք։ Այս ընթացքում տված հարցազրույցում նշել եք, որ կվերադառնաք եթեր, երբ լավ նախագծի առաջարկ ստանաք, ոչ թե ֆինանսական, այլ գաղափարաական մասով։ «Սիրո բանաձևը» այն նախագի՞ծն էր, որին այսքան տարի սպասում էիք, թե՞ հեռուստատեսային աշխատանքն էիք կարոտել։

–Պետք է խոստովանեմ, որ հեռուստատեսային աշխատանքը շատ էի կարոտել:

Ինչ վերաբերում է Հանրային իմ վերադարձին, ապա շատ լավ, փայլուն զգացողություններ ունեմ: Առավել ևս, որ եկա ու տեսա, որ տունը վերանորոգել են, ամեն ինչ պատրաստ է իմ գալու համար:

– Որո՞նք են «Սիրո բանաձև»–ի գաղափարական առանձնահատկությունները, որոնց սպասում էիք։

–«Սիրո բանաձև»-ն ավելի թեթև ու հանգիստ վիճակի մեջ է պետք պատկերացնել: Գաղափարական և բարոյահոգեբանական տվայտանքներ չկան: Մեր եթերում կլինեն ընտանեկան զույգեր, ովքեր հնարավորություն կտան իրենց նորովի ճանաչելու, մի քիչ ուրախանալու և ծիծաղելու:

Ինչ վերաբերում է ինձ, ես կլինեմ սև մորուքով, սիրուն սանրած մազերով, սմոքինգով, այդպես անսպասելի:

–Հաղորդման հյուրերը զույգեր են։ Ինչո՞վ է տարբերվելու Ձեր նախագիծը, բացի այն, որ եթերում կհնչեն հարցեր, որոնք հատուկ են Ֆելիքս Խաչատրյանին։

-Հաղորդման շրջանակում սցենարային իմ փոքրիկ չափաբաժինն ունեմ: Պարբերաբար կտեսնեք Ձեզ ծանոթ Ֆելիքս Խաչատրյանին:  

-Մի առիթով խոստովանել եք, որ տասը տարի ամեն օր եթերում լինելու ընթացքում սպառվում է ասելիքը։ Ի՞նչ ասելիք եք կուտակել այս ընթացքում։

–Ես իմ ասելիքներն աշխատում եմ ավելի շատ երաժշտական գործունեության մասում տեղավորել: Ինձ ճանաչողները գիտեն, թե որտեղից իմանան իմ ասելիքների մասին:

-3.33 նախագիծը հանդիսատեսի առաջ բացահայտեց ուրիշ Ֆելիքս Խաչատրյանի։ Թեև հիմա շատ ավելի փակ եք հասարակության առաջ, քան տարիներ առաջ, երբ ամեն օր եթերում էիք, ավելի հաճախ էիք հարցազրույցներ տալիս, ձեր երգերի միջոցով ավելի հասանելի եք լսարանի համար։ Ինչո՞ւ հենց այս տարիներին որոշեցիք լռել։

-Ես ոչ թե որոշեցի լռել, այլ ուղղակի դուրս եկա աշխատանքից: Պայմաններն արդեն ինձ համար մի քիչ անհամապատասխան էին: Իսկ հեռանալուց հետո հասկացա, որ ավելի լավ է մի որոշ ժամանակ հանգստանալ ու դա շատ լավ ազդեց ինձ վրա: Հանգստանալու ընթացքում էլ երաժշտությունը բավականին շատացավ իմ կյանքում: