«Դեմքիս արտահայտությունը ծնված օրվանից, գրեթե, չի փոխվել». Մհեր Խաչատրյան

Առավոտյան  ուղիղ եթերից մեզ բարի լույս և լավ օր մաղթող մարդկանցից է հաղորդավար և դերասան Մհեր Խաչատրյանը, ով տեսակով գիշերային, գործի բնույթով` առավոտյան մարդ է: Tert.am Life–ի զրուցակիցն այս անգամ Մհերն է:

-Գրեթե ամեն առավոտ հեռուստադիտողին ասում եք` բարի լույս, իսկ ո՞վ է Ձեզ առաջինը ասում բարի լույս, ինչպե՞ս է սկսվում Ձեր առավոտը:

-Ինձ ամեն առավոտ բարի լույս է ասում այդ պահին արթուն տանեցիներիցս մեկը, իսկ օրս սկսվում է ցնցուղով, սուրճով ու երաժշտությամբ: Առավոտյան լսում եմ հիմնականում հիփ-հոփ՝ Biggie, Wu Tang Clan, Kanye West, JAY-Z և այլն... Իսկ ինչու հիփ-հոփ, որովհետև լավ էներգիա է տալիս եթերի համար: Առավոտյան ծրագիր վարելով հանդերձ՝  ես տեսակով գիշերային մարդ եմ: 

- Լինելով երաժշտասեր ՝ վերջերս փորձում եք բացահայտել տարբեր ոլորտների հետաքրքիր մարդկանց սիրելի 5 երգը, իսկ ինչպիսի՞ն է Ձեր թոփ 5-ը:

- Բարդ հարց է իրականում: Մտածել եմ, բայց այդպես էլ չեմ կարողացել հստակորեն առանձնացնել 5 երգ: Եթե մի օր նման հաղորդման հյուր լինեմ, գուցե և առանձնացնեմ իմ թոփ 5 երգերը:

- Ի սկզբանե, մարդիկ Ձեզ ճանաչեցին հումորային նախագծից, այնուամենայնիվ, շատ հաճախ մելանխոլիկ մարդու տպավորություն եք թողնում, ինչո՞վ է սա պայմանավորված:

-Չգիտեմ, երևի դեմքիս արտահայտությունից, որը ծնված օրվանից, գրեթե, չի փոխվել: Մեկ-մեկ այդ պատճառով մարդիկ ինձ սխալ են հասկանում: Երբեմն, ավելի կոպիտ կամ տխուր եմ թվում, քան իրականում կամ:

-Իսկ առօրյայում հումորով ու կատակասե՞ր եք, ո՞ր դեպքում կարող եք կոպիտ մարդ լինել:

- Ոչ միշտ, բայց փորձում եմ լինել հումորով: Ժամանակ առ ժամանակ լինում եմ նաև կոպիտ, երբ լինում են անտակտ կամ անձնական տարածք են ներխուժում:

-Պատահե՞լ է, որ մարդիկ նեղացել են Ձեր արած որևէ հումորից, նման դեպքում ինչպե՞ս եք վարվում։

-Այո, պատահել է, որ նեղանան. նման դեպքերում ներողություն եմ խնդրում... սև հումորներ անում  եմ:

-Ձեր կարծիքի վրա մարդկանց դիմագծերը կարո՞ղ են ազդել, երբևէ փորձե՞լ եք դիմագծերով ճանաչել մարդուն:

-Ոչ միշտ, բայց պատահում է, երբ մարդու արտաքինը հենց առաջին հայացքից վանող է լինում, հատկապես, աչքերի արտահայտությունը: Գերադասում եմ շփվել պարզ, դաստիարակված ու հումորով մարդկանց հետ: Իսկ պարզ ասելով՝  նկատի ունեմ, որ մարդն այնպիսին է, ինչպիսին կա, չի փորձում ձևացնել:

-Մհեր, պատկերացնենք, որ Դուք ունեք հնարավորություն մեկ օր այլ մարդու կյանք ապրել, ո՞վ կլիներ այդ մարդը։

-Մեկ օրով կուզեի լինել որևէ աշխարհակալ կամ մեծ երկրի առաջնորդ, օրինակ` Ալեքսանդր Մակեդոնացին: Ինձ միշտ հետաքրքրել է, թե նման մարդկանց ինչ մոտիվացիա է առաջ շարժում, ինչպես են կայացնում իրենց որոշումները, ինչն են կարևորում ավելի շատ՝ նյութակա՞ն, թե՞ ոչ նյութական արժեքները: Հետաքրքիր է՝ ի՞նչ վախեր են ունեցել:

- Ձեր բնավորության ո՞ր գիծն է, որի պատճառով երբևէ տուժել եք և կուզեիք փոխել այն:

-Բնավորությամբ սովորականից մի փոքր ավելի էմոցիոնալ եմ, կուզեի դա փոխել: Էմոցիոնալ լինելս որոշ դեպքերում բեկումնային է եղել: