«Թատրոնում «կադրային ջարդ» չի լինելու» . Յուրի Իգիթխանյանը՝ Ստանիսլավսկու թատրոնի տնօրենի ԺՊ նշանակվելու և կառավարման իր մոդելի մասին

 Դերասան Յուրի Իգիթխանյանի համար այսօր առաջին աշխատանքային օրն է Կոնստանտին Ստանիսլավսկու անվան ռուսական դրամատիկական թատրոնում` որպես տնօրեն: Ասում է՝ առավոտյան 9-ից աշխատավայրում է ու սկսել է մանրամասն ծանոթանալ հարազատ թատրոնի իրեն հայտնի ու անծանոթ խնդիրներին, շփվել աշխատակիցների հետ ու հասկանալ ՝ ինչի՞ց է պետք սկսել աշխատանքը:

Tert.am Life-ի հետ զրույցում Յուրին խոսել է թատրոնի կառավարման իր տեսլականի, ծրագրային հիմնական դրույթների և կադրային հնարավոր փոփոխությունների մասին:

5 տարի բացակայությունից հետո դերասանը նոյեմբերից զբաղվում էր թատրոնի հանրային կապերի մենեջերի աշխատանքով, իսկ հունվարի 9-ին ՀՀ Մշակույթի  նախարարության որոշմամբ ստանձնել է թատրոնի տնօրենի ժամանակավոր պաշտոնակատարի պաշտոնը: Նշանակումն արվել է 6 ամսով, որից հետո, ըստ օրենքի, կհայտարարվի մրցույթ տնօրենի թափուր պաշտոնի համար։

2018 թվականի դեկտեմբերի 30-ին լրացել էր թատրոնի նախկին տնօրեն Ֆրեդերիկ Դավթյանի պաշտոնավարման պայմանագրի ժամկետը: Յուրին նշեց, որ նշանակումն իր համար էլ էր անակնկալ, շատ լավ գիտակցում է իր ուսերին դրված պատասխանատվությունը: Նրա խոսքով, թատրոնի դերասանական կազմը, որոնց թվում է նաև իր կինը՝ Անուշ Սարգսյանը, դրական են արձագանքել այդ պաշտոնում իր նշանակմանը:

«Կինս որոշակի մտավախությամբ արձագանքեց այս որոշմանը, բայց ոչ այն պատճառով, որ ինչ-որ բան կարող է չստացվել: Ինքը վստահ է, որ ամեն բան լավ է լինելու և հավատում է իմ ուժերին, բայց այդ պաշտոնում լինելը պատասխանատու գործ է, բնականաբար, նաև հասկանում ենք, որ ընտանիքիս ուղղված ժամանակի չափաբաժինը կպակասի և ուղղված կլինի թատրոնին»,- ասաց նա:

Յուրիի խոսքով, ամեն բան պետք է անեն, որպեսզի Ստանիսլավսկու անվան թատրոնն իր անունն է՛լ ավելի բարձր պահի. «Պետք է հանդիսատեսի մոտ թատրոն գալու ցանկություն առաջացնենք, ստեղծենք լավ, բարենպաստ պայմաններ, որպեսզի մարդիկ մտնեն թատրոն և ջերմ մթնոլորտում դիտեն ներկայացումը: Դերասանների համար ստեղծենք այդ նույն բարեկեցիկ պայմանները, որպեսզի առանց այլ խնդիրների մասին մտածելու անեն իրենց գործը: Կարևոր առաջնահերթություն է նաև թատրոնի տեխնիկական վերազինումը: Դա ամենաբարդ և ծախսատար խնդիրն է, որ պետք է փորձենք լուծել, որովհետև 21-րդ դարի թատրոնը չի կարող աշխատել 20-րդ դարի տեխնիկայով: Բնականաբար, առանց ֆինանսական հոսքերի ներգրավման դա հնարավոր չի լինի, բայց դա արդեն մարքեթինգային գաղտնիք է:  Պետք է փորձենք գտնել թատրոնը սիրող գործընկերներ և միասին աշխատել»:

Յուրին կարծում է, որ վաղուց ժամանակն է հրաժարվել թատրոնների կառավարման սովետական համակարգից, հավատացնում է` ինքն այդ ուղղությամբ է շարժվելու։ «Այդ իմաստով փոփոխությունները չեն կարող լինել վաղը կամ մեկ ամսից: Դրան պետք է աստիճանաբար հասնել: Թատրոնին պետք է վերաբերվել որպես ժամանակակից բիզնեսի, լինելով պետական կառույց, չմոռանալ մարքեթինգի մասին: Այսօր գովազդն է ամեն բան անում, բայց բնականաբար, նաև լավ պրոդուկտներ ունենալն է կարևոր: Ես վստահ եմ, որ մեր թատրոնը կունենա լավ պրոդուկտներ, հետաքրքիր ներկայացումներ, իսկ կառավարման մեթոդիկան, իհարկե, պետք  է փոխել, ինչ-որ տեղ նույնիսկ փորձել որոշ բաժիններ վերանվանել»,- ասաց նա:

Տնօրենի նոր պաշտոնակատարը նշեց, որ հակված չէ կադրային փոփոխություններ անել, «կադրային ջարդ» չի լինելու. «Դա մոդայիկ արտահայտություն է դարձել:  Ես նման մտադրություն չունեմ, բայց եթե թիմը միասին չաշխատեց, բնականաբար ինչ-որ կադրային փոփոխություններ կլինեն: Դերասանական կազմի կադրային փոփոխություններն արդեն գեղարվեստական ղեկավարի գործն է: Որդեգրել ենք այնպիսի քաղաքականություն, որ մենք նայում ենք մեկ ուղղությամբ»:

Տնօրենի ժամանակավոր պաշտոնակատարը նշեց, որ Ստանիսլավսկու անվան թատրոնում ամիսներ առաջ ձևավորված լարված մթնոլորտն ու դերասանական կազմի միջև հակասությունները՝ կապված գեղարվեստական ղեկավարի ընտրության հետ, արդեն անցյալում է, թատրոնն անցել է բնականոն աշխատանքին:

«Այդ խնդիրները կարծես արդեն հաղթահարված են և թատրոնը հրաշալի աշխատանքային փուլում է: Մեր նորանշանակ գեղարվեստական ղեկավար Կարեն Ներսիսյանն աշխատում է Շեքսպիրի՝ «Ռոմեո և Ջուլիետ» պիեսի վրա: Դերասաններն ակտիվ աշխատանքի մեջ են: Ներկայացման պրեմիերան, հավանաբար, կլինի մայիսին»,- եզրափակեց նա: