Սենիկ Բարսեղյան, Սաթենիկ Հախնազարյան. «Լավագույնը» դարձած դերասաններ, որոնք չեն նկարահանվել հեռուստասերիալներում

11:10 • 29.03.19

Մշակույթ

«Արտավազդ» ամենամյա թատերական մրցանակաբաշխության շրջանակում իր առաջին «Արտավազդ»-ը ստացավ Կամերային թատրոնի դերասան Սենիկ Բարսեղյանը՝ որպես «Տարվա լավագույն երիտասարդ դերասան»։ Դերասանուհի Սաթենիկ Հախնազարյանն էլ, որը տարիներ առաջ ստացել էր մրցանակ, որպես «Տարվա լավագույն դերասանուհի», այս տարի մրցանակ ստացավ «Երկրորդ պլանի լավագույն դերասանուհի» անվանակարգում։

Tert.am Life-ը զրուցել է մրցանակակիր դերասանների հետ՝ մինչև այս սերիալներում նկարահանվելու առաջարկները մերժելու և թատրոնի աշխատավարձի մասին։

Սաթենիկ Հախնազարյանի նկատեց, որ գեղարվեստական ֆիլմերում նկարահանվում է, բայց հեռուստասերիալներում չնկարահանվելու հետ կապված ունի սկզբունքային մոտեցում։

«Ես երբեք չեմ համաձայնի խաղալ ուղղակի խաղալու համար, երևալ երևալու համար։ Տարիների իմ փորձը, իմ աշխատանքը և թատրոնի նկատմամբ վերաբերմունքը պարտավորեցնում է այդպես մոտենալ հարցին։ Դերասանի մասնագիտությունը շատ բարձր եմ գնահատում՝ բացարձակ չնվաստացնելով կոլեգաներիս արած աշխատանքը հեռուստասերիալներում։ Իմ դեպքում պարզապես չի եղել այն առաջարկը, որ հասկանամ` այդ հեռուստասերիալում նկարահանվելու առաջարկը կարող եմ ընդունել,- ասաց Սաթենիկն ու ավելացրեց, որ եթե անգամ դերասաններն ընդունում են նկարահանման առաջարկը, պետք է դրան մոտենան պատասխանատվությամբ և աշխատանքն անեն հնարավորինս լավ,- Քանի որ արդեն համաձայնել են, պարտավոր են շատ լուրջ վերաբերվել գործին։ Ես փայլուն կոլեգաներ ու խաղընկերներ ունեմ, ովքեր նկարահանվում են հեռուստասերիալներում և լավ են նկարահանվում»։

Հեռուստասերիալներում նկարահանվելու առաջարկները մերժելու իր սկզբունքներն ունի Սաթենիկ Հախնազարյանը։ Դերասանուհին նշեց՝ առաջարկներ շատ է ստանում։ «Շատ բազմապրոֆիլ միասնություն է պետք՝ ռեժիսորի, խաղընկերների, սցենարի, դինամիկայի։ Երկարաշո՜ւնչ չեմ կարող նկարահանվել։ Ես պետք է լինեմ բեմում կամ նկարահանման հրապարակում, ոչ թե երևամ, որ օրինակ ինձ փողոցում տեսնեն, ցույց տան և ասեն սա այն մարդն է։ Դերը, որը ես կխաղամ պետք է ասելիք ունենա՝ հանուն ինչի՞ խաղամ և ի՞նչ ասելիքով։ Եթե սիրեմ, պատրաստ եմ շատ բաների»,- ասաց Սաթենիկն ու ավելացրեց՝ հույս ունի, որ դեռ կստանա այն առաջարկը, որը սիրով կընդունի։

«Տարվա լավագույն երիտասարդ դերասան»-ի տիտղոսակրին նույնպես հեռուստասերիալներում առայժմ չենք տեսել։ Ասում է` կնկարահանվի, եթե լավ առաջարկ լինի։ Ըստ Սենիկի` դերասանի համար շատ կարևոր է թեկուզ մի ընթացք լինել միայն թատրոնում. «Թատրոնը և՛ տուն է, և՛ հոգևոր սնունդ. ամեն ինչ է։ Հաճախ եմ սիրում ասել, որ ամենաճշմարիտ կրոնը թատրոնն է։ Եվ երբ հավատն ինչ-որ բանի նկատմամբ պակասում է, այն միշտ փորձում է ձգտել նոր բաների»։

Եթե նախկինում դերասանը մերժել է նկարահավելու բոլոր առաջարկները, ներկայումս բաց է առաջարկների համար։ «Երբ սկսեցին հեռուստասերիալներ նկարահանել և մեր հեռուստաընկերություններով սկսվեց սերիալների հորձանուտը, ինչ-ինչ պատճառներով նկարահանման մերժում էի առաջարկները։ Դրա հետ մեկտեղ չունեմ չնկարահանվելու կոնկրետ մի սկզբունք։ Ես ցանկություն չունեմ նկարահանվելու այնտեղ, որտեղ կրթություն չունեցողներն են նկարահանվում։ Տեսակով պերֆեկցիոնիստ եմ և իմ արած աշխատանքն էլ, արդյունքն էլ պետք է շատ լավը լինի։ Շատ առաջարկներ մերժելուց հետո ռեժիսորների մոտ կարծիք ձևավորվեց, որ ես չեմ նկարահանվում,- ասաց Սենիկն ու ծիծաղելով հավելեց,- Այնքան եմ մերժել առաջարկները, որ հիմա ոչ մի առաջարկ չունեմ»։ Ըստ Սենիկի` տեսակետը փոխվել է, որովհետև որակն է բարձրացել։

Թատրոնի դերասաններից շատերը հեռուստասերիալներում նկարահանվելը հիմնավորում են ցածր աշխատավարձով։ Սաթենիկը նշեց, որ աշխատավարձն իսկապես ցածր է, բայց եթե դերասանը համաձայնում և ընտրում է նաև հեռոսւտասերիալի ճանապարհը, դա պետք է անի լավ ու անի ամենայն պատասխանատվությամբ. «Թատրոնի աշխատավարձը շատ-շատ ծիծաղելի գումար է ապրելու համար։ Իսկ հեռուստասերիալներում էլ ո՞վ նկարահանվի, եթե ոչ դերասանները»։

Սենիկը էլ նկատեց, որ թատրոնի դերասանն այսօր երկրորդ աշխատանք էլ պետք ունենա։ «Այն, որ դերասանը բացի թատրոնից պետք է ունենա այլ աշխատանք, թատրոնի մեղավորությամբ չէ, մեղավորությունն ուրիշ տեղ է պետք փնտրել։ Երբեք չեմ ասել «սերիալը փիսն է, չեմ ուզում նկարահանվել»։ Ուղղակի դեռ այն ժամանակ որոշում կայացրի՝ ռեսուրսը, որը ես պետք է «մաշեի» հեռուստասերիալներում նկարահանվելիս, մի քանի անգամ ավելի հաճույքով ներդնել թատրոնում և երգելու մեջ։ Այդպես էլ ես վաստակում էի նույն գումարը, որը պետք է վաստակեի նկարահանվելով հեռուստասերիալում։ Չնայած իմ Կամերային թատրոնն ինձ լավ է վճարում իմ արած աշխատանքի համար, և ես չեմ բողոքում»,– ասաց նա։