Անսպասելի պրեմիերա Դրամատիկականի բեմում. «Տիկնայք և պարոնայք» ներկայացման հանձնման հայտնի հյուրերն ու հետաքրքիր դրվագները

Հետնաբեմում փոքր-ինչ լարվածություն է, դերասանները վերջին համատեղ լուսանկարն են անում ու որոշակի հուզվածությամբ շտապում բեմ. Դրամատիկական թատրոնում ներկայացումները, որպես կանոն, չեն ուշանում, թեև երեկ գլխավոր փորձն էր։ Tert.am Life-ը ֆիքսել է երեկոյի հետաքրքիր դրվագներն ու հայտնի հյուրերին և խոսել ոչ միայն բեմադրիչի, այլև թատրոնի գեղարվեստական խորհրդի անդամների հետ։

Բեմում արդեն թեթև տրամադրություն է. այսօր կատակերգություն են խաղալու։ Չնայած բեմադրիչը՝ ՀՀ ժողովրդական արտիստ Արմեն Խանդիկյանը, զգուշանում է այն կատակերգություն անվանել, ասում է՝ դրական լիցքեր փոխանցող ներկայացում։

Պատմությունը, իհարկե, ունի իր խնդիրներն ու ընտանեկան ինտրիգները, սակայն ամեն բան ներկայացված է թեթև ու հումորով. չէ՞ որ այս անգամ նպատակը հանդիսատեսին դրական ժամանցով ապահովելն է։

Բաբկեն Չոբանյանի, Նարինե Պետրոսյանի, Արտաշես Մխիթարյանի, Մարիամ Ադամյանի, Նիկոլայ Ավետիսյանի, Էվելինա Շահիրյանի, Էրիկ Սարգսյանի, Էմմա Մանուկյանի և Ալիսա Մելիքսեթյանի մասնակցությամբ նոր ներկայացումը կոչվում է «Տիկնայք և պարոնայք»՝ «Մի սիրային նամակի պատմություն» ենթավերնագրով։

«Կարծում ենք ուրախ, հսկայական դրական էներգիայով մեկուկես ժամ տևողությամբ ներկայացում է։ Մենք մեր խաղացանկում շեքսպիրյան գործեր էլ ունենք, դրամաներ էլ, ողբերգություններ էլ, չասեմ՝ սա կատակերգություն է, բայց այս շատ դրական լիցքեր հաղորդող գործով ուզում ենք մեր հանդիսատեսին պարգևել ուրախ և, ինչու ոչ, որակով, մակարդակով ժամանց,- ասաց Խանդիկյանն ու հավելեց, որ պիեսը վերջին ժամանակներում է գրվել,- երևի, 4-5 տարի առաջ է գրվել։ Անգլիացի հեղինակներ են, անգլիական հրաշալի երկխոսություններ և հումոր, սակայն ոչ էժան իմաստով»։

Հանդիսատեսի շարքերում թատրոնի գեղարվեստական խորհրդի անդամներն են, որոնք ներկայացումից հետո նիստ ունեն, անձնակազմին պետք է հայտնեն իրենց կարծիքն ու դիտարկումները։ Պրեմիերային քիչ ժամանակ է մնացել։

Արմեն Խանդիկյանն իր խոսքում նշեց, որ ներկայացումն անսպասելի է։ Իր գնահատականում նա դիպուկ էր։ Անսպասելիությունն առաջին տպավորությունն էր, որ հայտնեց նաև թատրոնի գեղարվեստական խորհրդի անդամ Հրաչյա Հարությունյանը։

«Որքան էլ կարող է զարմանալի հնչել, անսպասելի էր, որովհետև բեմադրիչին ճանաչում եմ 40 տարի, դերասանների հետ ամեն օր, ամեն ժամ բեմում ենք, կարծես, բոլորին գիտեմ, բայց նրանք ինձ համար անսպասելի, նոր տեսակով, շնչով ու եռանդով ներկայացան։ Այս ամենի մեջ նոր շունչ կար, ինչն ինձ շատ ուրախացրեց։ Մեծ զվարճանք, որն արված է մեծ ճաշակով»,- ասաց նա ու հավելեց, որ ուրախ է, որ Դրամատիկակակնի խաղացանկը համալրվել է ուրախ ու հետաքրքիր ներկայացմամբ։

Խորհրդի նիստին շտապելուց առաջ Լուիզա Ղամբարյանն էլ Tert.am Life-ի հետ խոսեց իր տպավորությունների մասին. «Սովորաբար փորձերից ինչ-որ հատված տեսած եմ լինում, բայց այդ ներկայացումն ամբողջությամբ առաջին անգամ էին դիտում։ Վառ, գունեղ, ուրախ, հանդիսատեսին դրական էներգիա տվող ներկայացում-տոն էր։ Ինքս չունեմ փոփոխության որևէ ցանկություն, դերասանական լավ աշխատանք էր կատարված։ Կատակերգություն խաղալը բնավ հեշտ չէ, որքան էլ թվում է։ Այն հեշտ է մատուցել, բայց ոչ վերարտադրել։ Դերասանները կարողացոլ էին վարպետորեն ներկայացնել ամեն բան, ինչի համար շատ ուրախ եմ»։

Արդեն այսօր, վաղը և ապրիլի 7-ին ներկայացմանն իր գնահատականը կտա նաև թատրոնի հանդիսատեսը։

Լուսանկարները՝ Էլեն Գասպարյանի