Ստեղծագործելու են նաև բեմում. Արտո Թունջբոյաջյանի, Վահագն Հայրապետյանի և Վահան Մարտիրոսյանի էքսպերիմենտը

«Gate of frequency» կամ «Մուտք ձայնային հաճախականություն». ապրիլի 19-ին Արամ Խաչատրյան համերգասրահում կայանալիք համերգային ծրագրի ընթացքում կլինեն միայն նոր գործեր ու էքսպերիմենտներ: Երաժշտական տարբեր հնչյունների համադրությունն ու իմպրովիզները հանդիսատեսին կներկայացնեն 2011 թվականին «Գրեմմի» մրցանակակիր, երաժիշտ Արտո Թունջբոյաջյանը, դաշնակահար, ջազմեն Վահագն Հայրապետյանը և Հայաստանի պետական կամերային նվագախմբի գեղարվեստական ղեկավար, գլխավոր դիրիժոր Վահան Մարտիրոսյանը:

Լրագրողների հետ հանդիպման ժամանակ երաժիշտները վստահեցրին՝ իրենց ներկայացրած ծրագիրը երիտասարդ կոմպոզիտորներին կտա ավելի լայն մտածելու հնարավորություն, իրենք կջնջեն ոճային սահմանները:

Արտո Թունջբոյաջյանի խոսքով՝ ամեն ինչում և գլխավորապես երաժշտության մեջ կարևորն անկեղծությունն է. «Ստեղծագործելն իմ մի մասն է: Կարևորը ճիշտ մոտեցում է, երբ մի բան զրոյից ստեղծում ես քո պատկերացմամբ: Թուրքերը, որքան էլ մեզ չեն սիրում, ասում էին՝ հայերը ստեղծագործող ազգ են: Շատ եմ ուրախանում, որ հայ երիտասարդներն արդեն ունեն ստեղծագործելու վստահություն: Չգիտենք, ուր կհանի այս ծրագիրը, բայց նորությունն իսկապես կա»:

Վահագն Հայրապետյանը կեսկատակ ասաց, որ ծրագրի ընթացքում շատ տարօրինակ ձայներ են հնչելու։ «Մտնում ենք ձայնային հաճախականության դաշտ: Աննախադեպ ու գիժ մի բան է սպասվում, որովհետև տեղում ստեղծագործած աշխատանքներ կլինեն, կհնչեն դեռ չլսված գործեր: Կան այնպիսի գործեր, որոնք անգամ մեզ համար են անակնկալ, և դա տեսնել է պետք»,- ասաց նա ու հավելեց, որ հենց բեմին հնարավոր է` նոր ու ավելի լայն ոճ ստեղծեն:

Վահան Մարտիրոսյանն էլ նշեց, որ  երաժշտության ամբողջ պատմությունն է էքսպերիմենտ: «Մեր աշխատանքն ինքնին էքսպերիմենտ է: Մենք հստակ ենք նվագում, բայց այն, ինչ այդ երեկո իրենք են նվագելու ու համադրելու՝ մինչև վերջին վայրկյանն էլ մեզ համար, կարելի է ասել, գաղտնիք է լինելու: Մենք մնում ենք դասական, միաժամանակ, միշտ հետաքրքրվում ենք նորությամբ, որովհետև մենք պետք է կարողանանք խոսել նաև այլ լեզվով: Բոլոր հանճարեղ բաները ստեղծվել են պատահաբար, անսպասելի»:

Համերգային նույն ծրագրով արտասահմանում ներկայանալու մասին հստակ որոշում դեռ չկա։ «Սա մեր առաջին փորձն է, տեսնենք ինչպես կլինի, արդեն կորոշենք՝ փորձե՞լ դրսում, թե՝ ոչ: Պետք է բոլորս էլ հաճույք ստանանք մեր արածից: Մենք ազնվորեն մեր գործն ենք անում, չենք անում, որ սիրեն մեզ: Եթե սիրեն, շատ լավ, եթե ոչ, ուրեմն այդպես էր պետք»,– ասաց Վահան Մարտիրոսյանը։ 

Լուսանկարները՝ Էլեն Գասպարյանի

Զառա Ղազարյան