Արցախցի աշակերտների համերգն ու միջազգային ասպարեզում գրանցած հաջողությունները

Շուշիի ազատագրումից անմիջապես հետո՝ 1992 թվականին, դեռ քարուքանդ եղած հետպատերազմական քաղաքում որոշվեց, որ շուշեցի փոքրիկներին ապահովելու են երաժշտական մասնագիտացված կրթությամբ։ Որոշում կայացնողն այդ օրերին Շուշի այցելած ամերիկահայ երգիչ ու գեղանկարիչ Կարեն Ղարիբյանն էր։ Հինգ տարի անց՝ 1997-98 թվականների ուսումնական տարին տեղի փոքրիկներն ու պատանիները դիմավորեցին երաժշտական ուղղվածության նոր՝ «Դանիել Ղազարյանի անվան երաժշտական մասնագիտացված բարեգործական գիշերօթիկ դպրոցում»։

Ճանապարհը սկսել են 30 աշակերտով, այսօր դպրոցում սովորում է 200 աշակերտ։ Tert.am Life-ը ներկա է եղել երաժշտական դպրոցի դափնեկիր սաների երևանյան համերգին։ Հետնաբեմի համեստ, ամաչկոտ, աշակերտական հագուստով և սանրվածքով երեխաներն ու պատանիները բեմում իրենց  երաժշտական գործիքներով դարձան համարձակ ու հասուն երաժիշտներ։

Մասնագիտացված դպրոցի տնօրենը՝ Գոհար Մկրտչյանը, հպարտությամբ է խոսում դպրոցի սաների միջազգային ձեռքբերումների մասին. Նրա խոսքով՝ տարբեր մրցույթներից երեխաները բերում են մրցանակներ ու, գրեթե, միշտ արժանանում հանդիսատեսի բուռն արձագանքին։ «Մեր աշակերտներն իրենց ունակությունները ցուցադրել են բազմաթիվ մրցույթների շրջանակում՝ միջազգային տարբեր բեմերին, մասնավորապես «Վերածնունդ» մրցույցթ-փառատոնին։ Ամեն անգամ նրանք Շուշի են վերադարձել լավ ավարով՝ մրցանակիների և գրաված անվանակարգերի տեսքով, արժանացել են բարձր գնահատականների ու ծափահարությունների»,- ասաց Գոհար Մկրտչյանը։

Դպրոցում առայժմ մեկ աշակերտ կա, որ երաժշտության ոլորտում մասնագիտական կրթություն ստանալու համար Մարտակերտի շրջանի Վանք գյուղից տեղափոխվել է Շուշի՝ 16-ամյա Բորիս Ավանեսյանը, մյուսները շուշեցի են, չնայած, ըստ տնօրենի, դպրոցն ունի բոլոր պայմանները, որ երեխաները գան սովորելու ոչ միայն Արցախից, այլև Հայաստանի մարզերից։

«Մեր դպրոցը  կոչված է նրա համար, որպեսզի և՛ Արցախի, և՛ դրսի երեխաները գան կրթություն ստանալու։ Դպրոցը գիշերօթիկ է։ Նպատակ ունենք ընդլայնվելու և ավելի շատ աշակերտների ներգրավելու։ Նրանք կարող են գալ Շուշի, ապրել մեր դպրոցում և սովորել։ Մենք ապահովում ենք 12-ամյա միջնակարգ կրթության ծրագիր, պարզապես երաժշտական ուղղվածություն ունենք,- ասաց հաստատության գործադիր տնօրենն ու շարունակեց՝ դպրոցը դեռ շատ երիտասարդ է,- մեր դպրոցը շատ երիտասարդ է՝ նախորդ տարի նշեցինք դպրոցի 20-ամյակը, հետո որոշեցինք այդ տարիների կատարած աշխատանքը ցուցադրել ոչ միայն Արցախում, այլև սահմաններից դուրս։ Երևանում համերգային տարբեր ծրագրերով երկու անգամ ելույթ ունեցել ենք՝ սա մեր երրորդ այցելությունն է։ Այսօր մեր աշակերտները ներկայացել են ժողովրդական և դասական գործիքային կատարումներով։ Ընտրել ենք հայ և արտասահմանցի հեղինակավոր կոմպոզիտորների գործեր»։

Տնօրենի խոսքով`  արդեն մի քանի տարի է, ինչ դպրոցը դարձել է կիսապետական, կիսաբարեգործական։ Բացման օրվանից այն կրել է բարեգործական բնույթ և ֆինանսավորվում է ԱՄՆ-ում գտնվող «Շուշիի Դանիել Ղազարյան երաժշտանոց ընկերակցության» կողմից։

Լուսանկարները՝ Էլեն Գասպարյանի 

Զառա Ղազարյան