«Հայաստանի ձայնի» հաղթող Հայկ Ղուլյանն ու դերասանուհի Լուսինե Կիրակոսյանը` փեսա և զոքանչ. առաջին կադրերը` երգչի նոր տեսահոլովակից

«Հայաստանի Ձայնը» նախագծի 4-րդ եթերաշրջանի հաղթող Հայկ Ղուլյանը շուտով կներկայացնի իր երկրորդ տեսահոլովակը։ Նրա առաջին` «Ամառ է» երգի տեսահոլովակը ժամանակակից ռիթմերով ու տրամադրությամբ էր, այս անգամ Հայկն ընտրել է ստեղծագործություն հայկական երաժշտական արխիվից։ Խոսքը  «Զոքանչ» կատակերգի մասին է։

Երգիչը Tert.am Life-ին տրամադրել է տեսահոլովակի բեքսթեյջ լուսանկարներն ու պատմել ոչ միայն այս աշխատանքի, այլև հաջորդիվ սպասվող նորությունների մասին։

«Մի ընթացք, գրեթե, բոլորի երգելու թեման կորած սերն էր, սակայն Ռազմիկ Ամյանի «Չունի աշխարհը քեզ նման» երգի հաջողությունից հետո սկսեցին նմանատիպ երգեր կատարել։ Հիմա արդեն երգում են գտած սիրո մասին,– ասաց նա ու հավելեց,– Նոր տեսահոլովակիս անվանումը հուշում է, որ երգս նվիրված է զոքանչներին։ Այն ինձ հետաքրքրեց, որովհետև թեմատիկ առումով նման չէ ոչ մի ուրիշ երգի։ Համենայն դեպս, վերջին տարիների կտրվածքով ինքս զոքանչներին նվիրված կատարում չեմ լսել»։

Հայկը նկատեց, որ սովորություն ունի լսելու հին ստեղծագործություններ, հատկապես, այնպիսի կատարողների, որոնք աշուղ կամ գուսան չեն եղել, պարզապես երգել են հարսանեկան ուրախ երգեր։

«Այս ստեղծագործությունը Սուրեն Պողոսյան անունով մի երգչի է պատկանել։ Երբ լսեցի, հասկացա, որ թե՛ թեման է լավը,  թե՛ երգն է մեղեդային։ Նոր գործիքավորում անելիս էլ փորձել ենք պահպանել իր երևէջները, որովհետև այդպես համ ու հոտը չի կորչում։ Կատակերգ է, որն ունի կոլորիտային տրամադրություն, երբ մարդիկ լսենմ իրենց մոտ էլ նոստալգիկ վիճակ կստեղծվի,– ասաց Հայկն ու խոստովանեց, որ պարային, ուրախ երգ ստեղծելը նաև կոմերցիոն նպատակ է հետապնդում։ –Չեմ հերքում, որ այն կոմերցիա է հետապնդում, այսօրվա իրականությունն է` ներկայացնել կոմերցիոն գործեր Ավելին, արդեն պատկերացնում եմ, թե ինչ պարային, աշխույժ տրամադրություն կարող է ստեղծել այս երգը»։

Հայկը պատմեց, որ նկարահանել են խաղարկային տեսահոլովակ՝ երգի թեմային համապատասխան։ Տեսահոլովակում փեսայի դերում հայկն է, զոքանչին մարմնավորում է Լուսինե Կիրակոսյանը։ Տեսահոլովակի ռեժիսարը Տիգրան Ավետիսյանն է։

«Շատ հումորով գործ է ստացվել։ Շեշտադրումն արել ենք մի շատ լավ, բայց, ցավոք, մոռացված սովորույթի վրա։ Ժամանակին, երբ գնում էին աղջիկ ուզելու, զոքանչը չէր համաձայնում, չէր տալիս աղջկան։ Հիմա այդ ամենը շատ հասարակ է դարձել, այդ ամենն էլ չկա, ինչը շատ վատ է։ Երբ նայում էինք վերջնական տեսահոլովակը, հասկացանք, որ եթե զոքանչին չմարմնավորեր Լուսինե Կիրակոսյանը, չէինք կարող ստանալ կոլորիտային այն էֆեկտը, որը ունենք, հրաշք դերասանուհի է»,– ոգևորությամբ ասաց Հայկը։

Անդրադառնալով առաջիկա նորություններին` Հայկը նշեց, որ ինքն ամեն օր ստեղծագործական պայքարի մեջ է՝ ի՞նչ անել, ինչո՞վ ներկայանալ։

«Եկել եմ եզրակացության, որ պետք է անել այն, ինչ այդ պահին զգում ես։ Ինձ շրջանակների մեջ դնել չեմ կարող, հատկապես, երբ խոսքը վերաբերում է ստեղծագործելուն։ Իմ հաջորդ տեսահոլովակը, որն արդեն նկարահանել ենք Բաթումիում, ներկայիս չափանիշներով, պուպուշ, հանգիստ երգ է։ Այդ ստեղծագործությունը գրեցի այ ժամանակ, երբ հասկացա, որ կարող է լինել մի աղջիկ, որի անունը տալն ինձ համար նոր գույն լինի։ Գրեցի երգը, որպեսզի մարդիկ լսեն ու սիրահարվեն»,– ասաց Հայկը։

Նրանից հետաքրքրվեցինք՝ սիրահավե՞լ է, ինչին կատարողը փիլիսոփայական պատասխան տվեց․ «Երբ ինձ այդ մասին հարցնում են, ասում եմ` կամ միշտ եմ սիրահարված եղել, կամ իմ կյանքում եղած ոչ մի աղջկա մինչև օրս չեմ սիրել։ Այդ երգը նվիրված է մեկին, բայց ստեղծագործել եմ տվյալ պահի զգացողությամբ»։