«Ես ունեմ գեղեցիկ կազմվածք և չեմ վախենում ներկայանալ համարձակ look-ով». Լիա Զախարյանը` եթերային դադարի, բաց տեսարանների ու իր սեքսուալության մասին

Երիտասարդ դերասանուհի Լիա Զախարյանի մոտ հիմա եթերային դադար է։ Նրա խոսքով՝ ավելի քան չորս տարի անընդմեջ նկարահանումներից հետո արդարացված հանգստի է գնացել՝ այն համատեղելով ինքնակրթության հետ։

Tert.am Life-ը դերասանուհու հետ զրուցել է ներկայիս զբաղվածության, Ինստագրամում առավել համարձակ կերպարներով ներկայանալու, ռեժիսորներից սպասելիքների, կազմվածքի փոփոխությունների և բաց տեսարաններում նկարահանվելուն իր վերաբերմունքի մասին։  

«Ներկայումս ժամանակս տրամադրում եմ որպես դերասանուհի վերապատրաստվելուն, մասնակցում եմ  դերասանի վարպետության պրոֆեսիոնալ կուրսերի։ Դրան զուգահեռ նկարահանվում եմ գովազդային հոլովակներում, ներկայացնում եմ բրենդային տարբեր հագուստներ։ Կարծում եմ՝ այս դադարը հնարավորություն կտա ներկայանալ նորովի, նոր շնչով, ինչու չէ, հեռուստադիտողն էլ ինձ կկարոտի։ Էկրան կվերադառնամ նոր գիտելիքներով և իմ տեսակը կներկայացնեմ նորովի»,- ասաց դերասանուհին՝ հավելելով, որ եթերային դադարը կապված չէ ոչ հատուկ միտումների, ոչ էլ առաջարկների պակասի հետ։ Բացի նորովի ներկայանալը Լիան ռեժիսորներից ակնկալիք ունի՝ ուզում է մարտական ֆիլմի համարձակ հերոսուհու կերպարում ներկայանալ։

«Շատ եմ սպասում, որ ռեժիսորներն ինձ առաջարկեն խիզախությամբ աչքի ընկնող հերուսուհու կերպար։ Շատ եմ սիրում հետաքննական ժանրի ֆիլմեր, սերիալներ և կցանկանայի մասնակցել, օրինակ, մարտաֆիլմի նկարահանումների, որտեղ կմարմնավորեի լուրջ, համարձակ, պայքարող որևէ կերպար։ Առհասարակ, նկարահանումների առաջարկներն ընդունելիս պահանջկոտ սկզբունքներ ու կամակորություններ չունեմ, ուղղակի կարևորում եմ որակն ու ինքս ինձ հարց եմ տալիս՝ արդյոք ես կցանկանամ ինձ տեսնել այդ կերպարով»,- ասաց նա։

Դերասանուհին առաջարկների հանդեպ պահանջկոտ չէ, քանի դեռ խոսքը չի հասել բաց տեսարաններին։ Ըստ Լիայի` այս մասով ունի և՛ սկզբունքներ, և՛ պահանջներ, դա է պատճառը, որ մինչև օրս խուսափել է հանդես գալ նման տեսարաններում. «Եթե մեր ֆիլմարտադրությունում կարողանան արվեստի մեջ գեղեցիկ ներկայացնել բաց տեսարանները, հնարավոր է, նկարահանվեմ։ Սակայն մեզ մոտ դեռ չեմ տեսել բաց տեսարանի գեղեցիկ ներկայացում, այնպես որ, նախընտրում եմ դեռևս չնկարահանվել»։

Չնայած բաց տեսարաններից խուսափելուն, դերասանուհու խոսքով, սիրում է համարձակ լինել, երբ խոսքը հագուստի մասին է։ Լիան համոզված է՝ գեղեցիկը պետք է տեսանելի դարձնել։

«Ես ունեմ գեղեցիկ կազմվածք և համարձակ look-ով ներկայանալուց չեմ վախենում։ Եթե դա գռեհիկ, գլամուր ու վուլգար չէ, հակառակը, հաճելի ու գեղեցիկ է, սիրում եմ ներկայացնել։ Երբ ես համարձակ կերպարով եմ ներկայանում, չի նշանակում, որ ուզում եմ ցույց տալ այն, ինչ ունեմ, ուղղակի առաջինն ինձ է հաճելի ու հարմարավետ այդպես։ Կարծում եմ, եթե մի բանը գեղեցիկ է, պետք է լինի տեսանելի և օրինակելի»,– ասաց նա։

Լիան համոզված է, որ իր կերպարներով կարողանում է լավ ու մոտիվացնող օրինակ դառնալ իրեն հետևողների համար. «Հասկացել եմ, որ շատ մարդկանց համար շարժառիթ եմ, կարող եմ շատերին ոգեշնչել։ Իմ հետևորդներն ինձ հաճախ են հարցնում թե՛ սննդակարգիս մասին, թե՛ ինքս ինձ մոտիվացնելու տարբերակի և ակտիվ կենսակերպ ունենալու մասին։ Ինձ դուր է գալիս, որ ես ապրում եմ կյանքի այնպիսի ոճով, որը մարդկանց համար օրինակ է ծառայում։ Ինստագրամով էլ հաճախ խորհուրդ եմ տալիս հետևորդներիս, ասում եմ, որ յուրաքանչյուր մարդ մեծ ցանկության դեպքում կարող է նման կենսակերպ ունենալ, ուժ գտնել իր մեջ և ստանալ ավելին, օրինակ, այն մարմինը, որը երազում է ունենալ»։

Անդրադառնալով սեքսուալ լինելու միտմանը` դերասանուհին նշեց, որ յուրաքանչյուր կին իրեն սեքսուալ է համարում, հարցն այն է` արդյոք կարողանում է ճիշտ գնահատել իր սեքսուալության աստիճանը։

«Բնականաբար, ես ինձ համարում եմ սեքսուալ։ Այդպիսին լինելու հստակ բանաձև չկա։ Պետք է ուղղակի անկեղծ լինես ինքդ քեզ հետ։ Նայելով հայելու մեջ` պետք է վերահսկես, թե ինչպես ես քայլում, հետևում արտաքինիդ, հագուստիդ, մարմնիդ, ձայնային ինչ տեմբրով ես խոսում, ինչ շարժուձև ունես, որքանով ես կանացի։ Առհասարակ, ես շատ եմ կարևորում կանացիությունը և վստահ եմ, որ երբեք պետք չէ դա կորցնել։ Ըստ իս` կարելի է ասել, որ սեքսուալությունը նույն կանացիությունն է։ Սեքսուալությունը մարմնի մասերի մեծության կամ փոքրության մեջ չէ, հագուստիդ բացվածք ավելացնելով սեքսուալ չես դառնում։ Սեքսուալությունը նաև կանացի խելացիությունն է, դատարկ կինը երբեք սեքսուալ լինել չի կարող»,- ասաց Լիան ու ավելացրեց, որ հոգեպես ու արտաքնապես կին մնալով՝ յուրաքանչյուրն էլ տղամարդու աչքերում հաճելի կդառնա։  

Իր կերպարները ստեղծելիս դերասանուհին շեշտում է մինիմալիզմը։ Վստահ է՝ ոճային լինելու համար ավելորդություններ պետք չեն։

«Ըստ իս` ամեն ինչում գեղեցիկ են մինիմալիստական լուծումները՝ կլինի հագուստի բաց լինելը, թե դիմահարդարումը։ Ես հաճախ եմ  հանդես եկել վառ դիմահարդարմամբ, բայց դրանք եղել են կամ կերպարային, կամ ֆոտոշարքերի համար։ Առօրյայում մինիմալի մեջ եմ՝ սանրվածքով էլ, դիմահարդարմամբ էլ, նուրբ ու ճիշտ համադրություններով եմ։ Կարողանում եմ տարանջատել գեղեցիկը համարձակությունից, բացը գռեհկությունից։ Իրականում սիրում եմ, երբեմն, այնպես ներկայանալ, որ շատերի համար ինձ այդպիսին տեսնելը անակնկալ լինի»։