«Փորձում եմ աղջկաս համար ոճային հագուստներ ընտրել»․ Աստղիկ Ալավերդյանը՝ դստեր ծննդից հետո փոխված կյանքի և իդեալական ամուսին ունենալու մասին

Դերասան-ամուսիններ Նարբե Պողոսյանն ու Աստղիկ Ալավերդյանն արդեն 5 ամիս է՝ վայելում են աղջկա ծնողներ լինելու հաճույքը: Աստղիկը շեշտում է, որ աղջիկ երեխայի մեծացնելը բոլորովին այլ հաճույք է: Դերասանուհին Tert.am Life-ին պատմել է փոքրիկի ծննդից հետո ընտանեկան կյանքի, նրա համար ոճային հագուստներ ընտրելու և Նարբեի՝ իդեալական հայր լինելու մասին:

Երջանիկ մայրիկը նշեց, որ մինչև դստեր ծնունդը չէր պատկերացնում, թե ինչ է նշանակում աղջիկ ունենալը, սակայն Շուշին իրեն տարել է այլ աշխարհ:

«Ես չգիտեի՝ ինչ է նշանակում լինել աղջկա մամա: Միայն աղջկաս ծննդից հետո հասկացա, որ դա լրիվ այլ աշխարհ է՝ ավելի սիրուն ու նուրբ: Տղայի դաստիարակությունը մի քիչ այլ է՝ աշխատում ես շատ փաղաքշական չլինել, որպեսզի «տղամարդավարի» մեծանա: Դա քեզ խանգարում է լիարժեք վայելել իր փոքր տարիքը: Աղջկա դեպքում այդ խնդիրը չկա: Այն, ինչ հոգուս խորքում ունեի, հիմա ազատ կիրառում եմ: Աղջկական խաղերն էլ ինձ ավելի շատ են դուր գալիս, քան տղայական խաղերը»,- ասաց  Աստղիկը:

Մինչև երեխայի ծնունդն իրականացրած ֆոտոշարքում Աստղիկը ցույց էր տվել փոքրիկի համար ընտրված մի քանի հագուստ: Ասում է՝ դեռ հղիության ընթացքում պատրաստվում էր աղջկա ծննդին ու տարբեր հագուստներ գնում: Մայրիկը կարևորում է, որպեսզի փոքրիկ Շուշին ոճային լինի:

«Շատ եմ կարևորում իր ոճն ու ամեն օր մի look եմ ընտրում իր համար: Ամեն ինչին ուշադրություն եմ դարձնում: Թիթիզ շորիկներ եմ ընտրում իր համար: Իրեն շատ է սազում սև գույնը: Այդ իսկ պատճառով իր համար հաճախ հենց այդ երանգի հագուստ եմ ընտրում»,- ասաց մայրիկն ու հավելեց, որ ուշադրություն չի դարձրել հանգամանքին, որ հայկական իրականության մեջ ընդունված չէ երեխաներին սև հագուստ ընտրել:

Մանկական նորաձևության մեջ սև-ն իր տեղն ունի, այնպես որ, Աստղիկը փորձում է կարծրատիպ կոտրել․ «Սև գույնն ավելի ոճային է, հատկապես, որ երեխաներին շատ չեն հագցնում: Իրեն սազում է, ինձ էլ դուր է գալիս, այլ բաների մասին չեմ մտածել: Մեծ ուշադրություն եմ դարձնում նաև գլխազարդերին: Գրեթե ամեն երանգի գլխազարդ ունենք, ամեն հագուստին համապատասխան ինչ-որ բան ընտրում եմ»:

Մայրիկը հետևում է մանկական նորաձևությանը, թեև ոչ բոլոր թրենդներն է կարողանում կիրառել: Որքան էլ կարևորի երեխայի ոճային լինելը, առաջին տեղում փոքրիկի հարմարավետությունն է․ «Այս տարիքում շատ բաներ չեմ կարողանում հագցնել, որովհետև իրեն անմարմար են կիսաշրջազգեստները, շորտերը: Փորձում եմ նորաձև հագուստն այնպես ընտրել, որ իրեն  հարմար լինի, որպեսզի երեխաս հանգիստ զգա հագուստի մեջ»:

Նարբեի և Աստղիկի տղան՝ Մոնթեն, արդեն 5 տարեկան է: 5 տարի անց նորից մայրիկի կարգավիճակում հայտվելը Աստղիկի համար հաճելի էր․ հիմա ավելի փորձառու է, բացի այդ՝ մայրիկի պարտականությունները համատեղում է աշխատանքի հետ։

«Տղայիս շատ դժվար եմ մեծացրել, որովհետև մենակ էի պահում: Կարելի է ասել՝ 2 տարի տանից դուրս չեմ եկել, ինձանով չեմ զբաղվել, ամբողջությամբ մամայական զգացողությունների ու պարտականությունների մեջ էի: Դա ինձ շատ խանգարեց և ընկա հետծննդաբերական սթրեսի մեջ: 5 տարի անց ես ավելի հասում եմ, փորձառու, ամեն ինչ արեցի, որպեսզի շրջանցնեմ այդ փուլը և հաջողվեց: Այս անգամ շատ թեթև անցավ թե՛ հղիությունս, թե՛ ծննդաբերական, թե՛ հետծննդաբերական շրջանը: Հիմա օգնող ունեմ, մեր դայակն ինձ օգնում է երեխայի խնամքի հարցում, և ես ստիպված չեմ ամբողջ օրը տանն անցկացնել: Առօրյաս բուռն աշխատանքային է անցնում, ինչը ևս նպաստեց, որպեսզի սթրեսի մեջ չընկնեմ»,- պատմեց Աստղիկը:

Դերասանուհու խոսքով՝ Նարբեն էլ հասցնում է համապատասխան ժամանակ տրամադրել երեխաներին և ճիշտ մոտեցում ցուցաբերել նրանց: «Նարբեն իդեալական հայր է թե՛ տղայիս, թե՛ աղջկաս համար: Տղայիս դեպքում գիտի՝ ինչպես խոսի, կառավարի նրան պոռթկումների, կամակորությունների պահին, իսկ աղջկաս, երբ, օրինակ, ոչ ոք չի կարողանում քնեցնել, Նարբեն գրկում է, համբուրում, Շուշին անմիջապես հալչում է, ամուր բռնում հայրիկի ձեռքերն ու քնում: Ես հանգիստ կարող եմ երեխաներին թողնել իր խնամքին,- ասաց մայրիկն ու հավելեց, որ, որպես ամուսին, ևս  Նարբեն իդեալական է: -Որպես ամուսին էլ խոսքեր չկան: Նա փորձում է ամեն ինչ իդեալական անել, և դա իր մոտ լավ է ստացվում է»:

Այս փուլում Նարբեն ու Աստղիկը զբաղված են իրենց բիզնեսով, որը հագուստի վաճառքի ոլորտում է։ Տևական ժամանակ է՝ նրանք բացակայում են հեռուստատեսությունից: Աստղիկը հայտնեց, որ եթե ժամանակին հեռուստատեսություն վերադառնալու ցանկություն ուներ, հիմա այդ մասին չի մտածում:

«Արդեն 7 տարի է՝ չեմ նկարահանվում: Մի պահ ցանկություն ունեի եթեր վերադառնալու, ամուսնուս էլ ասում էի այդ մասին, բայց հիմա ոչ ցանկություն, ոչ էլ ժամանակ ունեմ: Կարծես թե, հասունացել եմ, հիմա սեփական բիզնես ունենք, որն այլ աշխարհայացք ու ապրելակերպ է ձևավորում: Այս պահին չեմ ուզում վերադառնալ նախկին ապրելակերպին, երբ երեկոյան ուշ կարող էին նկարահանումներ լինել, ինքդ քո ժամանակի տերը չէիր: Հիմա մենք ենք մեր առօրյայի տերը, ինչը շատ հաճելի է»,- եզրափակեց դերասանուհին։