«Հիմա ամեն ինչ դստերս շուրջն է պտտվում, բայց ես փորձում եմ չմոռանալ նաև ինձ»․ Սիմա Բաղդասարյանը՝ մայրանալուց հետո նախկին քաշը վերականգնելու և աշխատանքի մասին

Հաղորդավարուհի Սիմա Բաղդասարյանը չնայած մայրացել է ընդամենը հինգ ամիս առաջ, սակայն արդեն ավելի քան երկու ամիս է, ինչ եթերում է։ Սիմայի դուստրը՝ Վիկտորյան հինգ ամսական է։ Հաղորդավարուհին Tert.am Life-ի հետ զրուցել է մայրությունը՝ հեռուստատեսային կյանքի հետ համատեղելու, մայրանալուց հետո նախկին քաշը վերադարձնելու և դստեր հետ հնարավորինս շատ ժամանակ անցկացնելու մասին։

«Ես նախապես էի պլանավորել, որ բալիկի ծնունդից հետո շատ արագ վերադառնալու եմ աշխատանքի և  նույնիսկ ավելի շուտ էի մտածում, որ եթեր դուրս գամ, ուղղակի մի փոքր խոչընդոտ եղավ։ Բայց, ամեն դեպքում, կարողացա եթերում լինել արդեն մայիս ամսից։ Իրականում որևէ բարդություն չի եղել համատեղելու հետ կապված, որովհետև իմ աշխատանքն այնպիսին է, որ զբաղվածությունս ընդամենը  երեք  ժամ է և տանից շատ քիչ ժամանակով եմ բացակայում»,- ասաց հաղորդավարուհին ու ավելացրեց, որ այն ընթացքում, երբ ինքը տանը տանը չէ բալիկը մնում է տատիկի՝ Սիմայի մայրիկի մոտ։

Չնայած շատ արագ եթերում հայտնվելուն, ամեն դեպքում, հաղորդավարուհու խոսքով իր մոտ կարճ, սակայն եղել է հետծննդաբերական ընկճախտ․ «Ինձ մոտ եղավ հետծննդաբերական այն շրջանը, երբ մի փոքր ավելի զգայուն էի դարձել, ինչ-որ բաներից ավելի նյարդային էի և ես այդ փուլը վերագրեցի հետծննդաբերական ընկճախտ ասվածին։ Իսկ դրանից հետո արդեն ամեն ինչ  իր հունով գնում է, ինչպես  մինչ այդ ապրել, շարժվել եմ, նույն կերպ էլ հիմա եմ շարունակում ապրել։ Այսինքն մայրանալուց հետո կենսկերպի հետ կապված զգալի փոփոխություններ չեն եղել և իմ կյանքում ավելացել է իմ բալիկը։ Իրականում հիմա ամեն ինչ դստերս շուրջն է պտտվում, բայց ես աշխատում եմ չմոռանալ նաև ինձ։  Այն  ամենով ինչով մինչ մայրանալս զբաղվել եմ, հիմա էլ այդ ամենը փորձում եմ նույն կերպ անել» ։

Վերջինիս հաջողվել է կարճ ժամանակում հետ բերել նաև իր կազմվածքն ու ազատվել հղիության հետևանքով ավելացած կիլոգրամներից։  

«Անկեղծ ասած հղիության ողջ ընթացքում՝ մինչև վերջին ամիսը, մարզվել եմ, այնպես, ինչպես մարզվել եմ ամբողջ կյանքիս ընթացքում։ Ծննդաբերությունիցս 10 օր անց ես կրկին վերադարձել եմ իմ մարզումներին, սակայն այնպես էլ չէր, որ ես հղիության ընթացքում շատ էի գիրացել, ընդամենը 9-10 կիլոգրամ։ Շատ արագ հետ եմ վերադարձել իմ նախկին քաշին և ոչ մի  դժվարություն չի եղել քաշիս հետ կապված այդ անցումը կատարելիս։ Ինքս էլ չեմ զգացել, որովհետև  միանգամից կարողացել եմ կրել այն ամենն, ինչը կրում էի մինչև հղիությունը»,- ասաց Սիման։

Բալիկի հետ ժամանակ անցկացնելու մասին խոսելիս հաղորդավարուհին նշեց՝ փոքրիկ Վիկտորյան խելացի ու հանգիստ երեխա է։

«Իհարկե բալիկս դեռ շատ-շատ փոքրիկ է, բայց այնքան խելացի է, որ  ուր էլ գնում եմ  ինքն ինձ հետ է լինում։ Չնայած փոքրիկ լինելուն, ամեն դեպքում, երբ միասին դուրս ենք գալիս, ես չեմ զգում, որ խանգարում է կամ նեղվում։ Միասին միշտ էլ հարմարավետության մեջ ենք գտնվում։ Շատ եմ կարևորում և աշխատում եմ հնարավորինս երկար ժամանակ անցկացնել փոքրիկիս հետ։ Երբ ես գնալու որևէ տեղ եմ ունենում, օրինակ քաղաքում մի տեղ հանդիպման պետք է լինեմ, անպայման իրեն հետս տանում եմ, որովհետև իսկապես շատ հանգիստ երեխա է»,- նշեց հաղորդավարուհին։