«Ոսկե ծիրանի» փակումն ու բոլոր մրցանակակիրները

«Ոսկե ծիրան» 16-րդ փառատոնն արդեն պատմույթուն է․ մեկ շաբաթ փառատոնը Երևանում պահեց կինոյի տրամադրությունն ու ցուցադրեց ֆիլմեր Կաննի, Բեռլինի, Ռոտերդամի կինոփառատոների խաղացանկերից: Դե իսկ շաբաթվա վերջին ամփոփեց արդյունքները, հանձնեց մրցանակներն ու ազդարարեց փառատոնի փակումը:

Tert.am Life-ը ներկա է եղել միջազգային կինոփառատոնի փակման արարողությանն ու ներկայացնում է մանրամասները: Փակմանը ևս հյուրերը նախ անցան կարմիր գորգով, ապա մասնակցեցին մրցանակաբաշխությանն ու դրան հաջորդած կինոդիտմանը: Այսպիսով՝ «Ոսկե ծիրանի» այս տարվա մրցանակակիրներն են․

Լիամետրաժ ֆիլմերի միջազգային մրցույթում «Ոսկե ծիրան» մրցանակ ստացավ Ռիչարդ Բիլինգհեմի «Ռեյ և Լիզ» ֆիլմը, «Արծաթե ծիրան»-ի արժանացավ Կանտեմիր Բալագովի «Լողլողը»: Ժյուրիի հատուկ հիշատակմանն արժանացավ Հասան Ֆազիլիի «Կեսգիշերային ճամփորդը»:

Կարճամետրաժ ֆիլմերի տարածաշրջանային մրցույթում «Ոսկե ծիրան» մրցանակ ստացավ Մարզիե Ռիահիի «Վարորդական դասեր» ֆիլմը, «Արծաթե ծիրան»-ի արժանացավ Ռատի Ցիտելաձեի «Հասարակության գերին»: Գենադի Մելքոնյանի անվան հատուկ մրցանակին արժանացավ Լիլիթ Պետրոսյանի «Բայինան»:

Տարածաշրջանային համայնապատկեր մրցույթում FIPRESCI մրցանակին արժանացավ Թինաթին Քաջրիշվիլի «Հորիզոնը»:

Վարչապետի մրցանակ (GAIFF Pro-ի կինոյի զարգացման հարթակ) տրվեց Տաթև Հակոբյանի «Թակարդը» ֆիլմին:

16-րդ «Ոսկե ծիրանի» լիամետրաժ մրցույթի ժյուրին նախագահում էր ճանաչված կինոռեժիսոր Ալեքսանդր Մինդաձեն: Վերջինս նշեց, որ փառատոնի համար շատ որակյալ ֆիլմեր են ընտրված: Իր համար պատիվ էր նախագահել ժյուրին:

Կարճամետրաժ ֆիլմերի տարածաշրջանային մրցույթի ժյուրիի անդամ, օպերատոր Նորայր Կասպերն էլ ասաց․ «Իսկապես շատ հաճելի էր այստեղ լինել, աշխատել շատ լավ ընտրված ժյուրիի կազմի հետ: Հետաքրքիր էր նաև հասկանալ տարածաշրջանի խնդիրներն ու մտահոգությունները, դիտել այդ ֆիլմերը»:

«Ոսկե ծիրան» փառատոնի գործադիր տնօրեն Հասմիկ Հովհաննիսյանը կարևորեց փառատոնի շրջանակում իրականացված կրթական ծրագրերն ու փառատոնային ավան նախաձեռնությունը: Նա ասաց, որ փառատոնից հետո թիմով վերլուծելու են կատարած աշխատանքը:

Նշենք, որ միջազգային լիամետրաժ մրցույթային ծրագրի ժյուրիի կազմում ընդգրկված էին ռեժիսոր Նիկոլաս Վադիմոֆը (Շվեյցարիա), ռեժիսոր, Թեհրանի միջազգային կինոփառատոնի նախագահ Ռեզա Միրքարիմին (Իրան), պրոդյուսեր, Թրայբեկայի կինոփառատոնի գործադիր տնօրեն Էմի Հոբին (ԱՄՆ), պրոդյուսեր Էլիզաբեթ Կառլսենը (Մեծ Բրիտանիա), կինոքննադատ Պաոլո Բերտոլինը (Իտալիա), դերասանուհի, ռեժիսոր Նինո Կիրտաձեն (Ֆրանսիա):

Կարճամետրաժ ֆիլմերի տարածաշրջանային մրցույթի ժյուրիի նախագահը ռեժիսոր Պիպո Մեցապեսան էր (Իտալիա): Ժյուրիի կազմում ընդգրկված էին նաև օպերատոր Նորայր Կասպերը (Կանադա) և Կլերմոն Ֆերան կինոփառատոնի ծրագրերի տնօրեն Ժորժ Բոլոնը:

Լուսանկարները՝ Անդրանիկ Հարությունյանի