«Փայլուն ռեալիզմը» նկարչուհի Սոնա Հակոբյանի ստեղծագործություններում

Մարդու դիմանկարը լավագույնս պատմում է նրա տեսակի մասին․ նկարչուհի Սոնա Հակոբյանը շատ լավ գիտի այս կանոնն ու դիմանկարներ անելիս ուշադրություն է դարձնում յուրաքանչյուր մանրուքի: Նրա նկարների մեծ մասը հենց դիմանկարներ են, թեև տրամադրությունն ու հոգեվիճակը կարող են թելադրել նկարել ցանկացած բան:

24-ամյա նկարչուհին իր տարեդարձի նախօրեին նվեր էր պատրաստել իր համար ու կազմակերպել նկարների ցուցահանդես-վաճառքը: Tert.am Life-ը ներկա է եղել ցուցահանդեսին ու ներկայացնում է նկարչուհու աշխատանքներն ու անցած ճանապարհը:

«Որքան ինձ հիշում եմ, նկարել եմ: 14 տարեկանում ընդունվեցի Թերլեմեզյանի անվան գեղարվեստի պետական քոլեջ, 2013-ին ավարտեցի ու հրավեր ստացա սովորելու Ստավրոպոլի գեղարվեստի ակադեմիայում: Այնտեղի դեկանը եկել էր Թերլեմեզյան 1 ուսանող ընտրելու համար: Նկարներս տեսնելուց հետո ինձ ընտրեց, սակայն հայրս թույլ չտվեց մենակ մեկնել երկրից: Դրանից հետո կտրականապես հրաժարվեցի նկարել: 4 տարվա դադարից հետո 2017-ին նորից սկսեցի նկարել»,- պատմեց Սոնան ու հավելեց, որ դիմանկարներ նկարում էր դեռ վաղ տարիքում: Ժպիտով հիշեց, որ տարիներ առաջ Ջոկերի դիմանկարն Ինստագրամում հավանել էր դերակատարը՝ Ջարեդ Լետոն։

Նկարչուհին ասում է՝ ի սկզբանե ընտրել էր ռեալիզմի ուղղությունը, հետո նկարներում սկսել է իմպրովիզներ անել ու հիմա դժվարանում է ասել, թե ինչպես է կոչվում իր ոճը:

«Երբ դադարից հետո սկսեցի նկարել, որոշեցի անել մի բան, որն ուրիշները չեն անում: Երբ ինձ ասում են՝ ինչպե՞ս է կոչվում ոճդ, ասում եմ՝ չգիտեմ, ես ինչ-որ մեկի ոճը չեմ վերցրել: Ես դեռ չեմ տեսել, որ մարդիկ միքսեն ռեալիզմը իլյուստրացիայի հետ: Ես վերցրել եմ ռեալիզմը, որի հիման վրա ստեղծել եմ իմ ոճը»,- ասաց Սոնան, ով շատ է սիրում իր նկարներում օգտագործել փայլեր, միաժամանակ շեշտում է փայլերի կիրառման սահմանը շատ նուրբ է՝ պետք է կարողանաս ընտրել ճիշտ չափը:

«Փայլն այնպիսի բան է, որը գեղեցիկ չօգտագործելու դեպքում հակառակ ազդեցություն կունենա՝ կդառնա աշխարհի ամենատգեղ նկարը: Մայրս մատնահարդար է, մի օր վերցրեցի իր փայլերն ու օգտագործեցի նկարներիս մեջ: Տեսա, որ շատ գեղեցիկ ստացվեց: Սկսեցի ավելի շատ ուշադրություն դարձնել որակին: Նկարներիս մեծ մասում  սվարովսկի քարեր եմ օգտագործում: Էժան նյութերով չեմ նկարում, քանի որ որակն առաջնային է: Թեև Հայաստանում փայլերի կիրառությունը շատ չեն ընդունում: Այստեղ ինձ ասում են՝ փայլը լցրել ես, որպեսզի նկարներիդ թերությունները շտկես, իսկ արտերկրի մրցույթներին նկարներս ուղարկելիս կամ ինչ-որ հարթակներում տեղադրելիս շատ դրական արձագանքներ եմ ստանում: Ժամանակին ամեն կարծիք հաշվի էի առնում, հիմա մեծացել եմ ու ունեմ իմ մոտեցումը»,- ասաց Սոնան: Ի դեպ, նկարների փայլերն արտացոլվում են լազերային լույսի ներքո:

Նկարչուհին նկատեց, որ շատ կարևոր է նաև գունային ճիշտ համադրությունը․ «Գույների համադրության սահմանն  իմ նկարներում շատ նուրբ է: Այդ ճաշակը ժամանակին դասախոսս է ներդրել իմ մեջ:

Սոնան նկատեց, որ նկարչությունը Հայաստանում մեծ պահանջարկ չունի: «Հայաստանում համարում են, որ եթե դու ցուցահանդես չես ունեցել, ուրեմն համարվում ես պադվալային նկարչուհի,- ժպտալով ասաց նա, հետո հավելեց, որ նկարչությունը մեր երկրում գնահատված չէ,- Շատերը համարում են, եթե դու դարձել ես նկարչուհի, ուրեմն չես կարողացել այլ հաստատություն ընդունվել: Մինչդեռ սա ապրելակերպ է:

Սոնան ունենում է նկարների վաճառքներ և պատվերներ, բայց նկատեց, որ պահանջարկ են վայելում այն նկարները, որոնք ինքը չի սիրում: «Հետաքրքիր է, բայց հիմնականում լավ վաճառվում են այն նկարները, որոնք ես ատել եմ»,- ասաց նա ու հավելեց, որ սիրելի նկարների շրջանում ունի մի քանիսը, որոնք չի վաճառի, օրինակ, իր ինքնակարը, մայրիկի սիրելի ստեղծագործությունը՝ տղայի դիմանկար, որը բոլոր կողմերից դիտողին է նայում ու ևս մի քանիսը:

Լուսանկարները՝ Էլեն Գասպարյանի