Ազնավուրի կյանքի հայտնի ու անհայտ փաստերը․ շանսոնյեին նվիրված թատերական ներկայացում՝ Գարի Քյոսայանի նվագակցությամբ

Այսօր մեծանուն շանսոնյե Շառլ Ազնավուրի մահվան առաջին տարելիցն է: Արտիստի կյանքը լի էր արկածներով, դժվարություններով, ստեղծագործական վայրիվերումներով և, իհարկե, հաղթանակով:

Սոս Սարգսյանի անվան համազգային թատրոնի բեմում երեկ պրեմիերա էր․ Ազնավուրի կյանքի մասին պատմում էին դերասաններ Ալլա Սահակյանը, Ստեփան Ղամբարյանն ու Նարեկ Բաղդասարյանը, իսկ պատմություններն ուղեկցվում էին Գարի Քյոսայանի ջազ քառյակի նվագակցությամբ: Դերասանները նաև երգում էին շանսոնյեի ստեղծագործությունները։

Tert.am Life-ը ներկա է եղել միջոցառմանն ու ներկայացնում է հետաքրքիր դրվագները:

Ալլա Սահակյանի մտահղացմամբ այս բեմականացումը նորություն է Համազգային թատրոնում: Նոր ձևաչափի աշխատանքները հեշտ չեն եղել, բայց դերասանները վստահեցնում են՝ հաճույքով են աշխատել:

«Երազանքս էր երաժշտական ներկայացում անել, քանի որ ես նաև երգում եմ, մյուզիքլի ժանրն ինձ շատ հոգեհարազատ է: Որպես մարդ-լեգենդ՝ Ազնավուրը միշտ առանձնահատուկ տեղ է ունեցել ինձ համար, միշտ հետաքրքրվել եմ իր արվեստով, սակայն մահվանից հետո ավելի շատ սկսեցի կարդալ իր մասին: Ներկայացման հիմքում «Ազնավուրը Ազնավուրի մասին» ինքնակենսագրական գիրքն է,- ասաց բեմադրության հեղինակն ու հավելեց, որ ամենաբարդն ամբողջ ինֆորմացիայից ամենակարևորը զատելն էր,- Ազնավուրն այնքան հետաքրքիր կյանք, բուռն ստեղծագործական ուղի է ունեցել, որ նյութը շատ մեծ էր: Մեծ ցավով էի անում կրճատումները»:

Ամուսինը՝ Գարի Քյոսայանը, ոգևորությամբ է ընդունել կնոջ առաջարկը: Ազնավուրի երգերը փոքր-ինչ փոփոխել են՝ հարմարեցնելով քառյակի նվագակցությանը, քառյակում էլ փոփոխություն են արել՝  առաջին անգամ որպես փողային գործիքը կլառնետն է ընտրվել:

«Բեմականացումն անելիս պատկերացնում էի երաժշտական լուծուները: Սկսեցի մտածել, թե ինչպես կարելի է համադրել ջազն ու թատրոնը: Քյոսայանը շատ ոգևորվեց առաջարկիցս, թատրոնի գեղարվեստական ղեկավար Նարինե Գրիգորյանը ևս խանդավառվեց ու ինձ շատ օգնեց բեմականացման հարցում: Վերջում էլ գեղարվեստական ղեկավարի աչքով նայեց ու օգնեց մեզ»,- պատմեց Ալլան:

Ստեփան Ղամբարյանն էլ նկատեց, որ իրենց թատրոնում առաջին անգամ են նման փորձառություն ունենում․ «3 դերասան բեմում պատմում են Ազնավուրի կյանքի մասին՝ իր  վերելքներով և վայրէջքներով մինչև հաղթանակած համերգ, որի ժամանակ նա գրավեց Փարիզը: Բարդ էր կենդանի նվագակցությամբ աշխատելը, մենք պատմում էինք երգում, պարում, կարծում եմ՝ պատվով հաղթահարեցինք մեր նոր փորձառությունը»:

Դերասան Նարեկ Բաղդասարյանի համար ևս միակ բարդությունը կենդանի նվագակցությամբ աշխատելն է եղել, բայց շեշտում է՝ նախապատրաստական 4 ամիսն իր համար հաճելի են եղել․ «Երբ աշխատանքը հաճելի է լինում, բարդությունների մասին առանձնապես չես մտածում: Պարզապես մեզ համար նոր ձևաչափ էր՝ իրենից բխող իր խնդիրներով: Երաժիշտներն ուղղակի բեմում չեն, մենք անմիջական կապի մեջ ենք նրանց հետ»:

Դերասանների պարերը բեմադրել է Ինեսա Արզաքանցյանը, ով, ինչպես շեշտեց Ալլան, ստիպված է եղել հրաժարվել ամռանն արձակուրդ գնալու մտքից, որպեսզի աշխատանքը չտուժի:

Լուսանկարները՝ Էլեն Գասպարյանի