Այն, ինչ կմնա կադրից դուրս. Women's club-ի բեքսթեյջն ու կուլիսային քննարկումները

17:01 • 15.10.19

Շոուբիզնես

7 աղջիկ, որոնցից յուրաքանչյուրն իր տեսակն ու գույնն ունի Women's club-ում: Իրենց բաժին հասած դերերն աղջիկներն ընդունում են հումորով՝ առանց կոմպլեքսավորվելու եթերում հումորի առարկա դարձնելով անձնական թեմաներ:

Լիլիի պլաստիկ վիրահատությունները, Լուիզայի տարիքը, Տոմայի նիհարութունն ու Մաշայի գիրությունը շարունակում են մնալ հումորների կենտրոնում, իսկ ահա անձնակազմի նորեկը՝ Սիրունը իր հանդեպ աղջիկների տրամադրվածությունը ստուգելու իր մեթոդն ունի: Թե ինչպես է նա դա անում, կիմանաք առաջիկա թողարկմանը, մինչ այդ Tert.am Life-ը ներկայացնում է Women's club-ի նոր թողարկման բեքսթեյջ լուսանկարները, որոնցում աղջիկները նաև ժպտում են իրար:)

Աղջիկների ակումբում ի սկզբանե իրենց դերակատարումն ունեին նաև տղաները, սակայն ժամանակի հետ ավելի ու ավելի շատացան աղջիկների դերերը:

Women's club-ի աղջիկները հերթով սկսում են ներկայանալ «սթենդ-ափ»-երով: Այս անգամ հերթը Զառայինն էր: Չնայած դերասանուհին երկար տարիներ է, ինչ ներկայանում է հումորային ձևաչափում, «սթենդ-ափ»-ով առաջին անգամ էր բեմին: Նկարահանումից առաջ նա լարված էր, շտապում էր ամեն բան կարգավորել հետնաբեմում, որպեսզի պարից ու ընդհանուր ելույթից հետո հասցնի արագ զգեստափոխվել ու վերադառնալ բեմ: Փոքր-ինչ վատառողջ, մի քիչ հուզված, բայց Զառան կարողացավ իր «սթենդ-ափ»-ով ծիծաղեցնել հանդիսատեսին: Նրա ընտրած թեման էլ արդիական էր. 5 տարեկան տղայի մայրիկը խոսում էր 21-րդ դարի երեխաների ու նրանց՝ ծնողներին փակուղի տանող հարցերի մասին:

Մյուս աղջիկներն էլ բեմելից առաջ փոքր-ինչ լարված էին, ինչպես ամեն անգամ: Մինչ հանդիսատեսը տեղավորվում էր, նրանք վերջին փորձն էին անում հանդերձարանում: Բեմում իրար «միս կրծող» աղջկական կոլեկտիվը հետնաբեմում ավելի թեթև է իրար մասին կատակում են, բայց արդեն ժպիտով:

Երբ, օրինակ, Լիլի Մորտոն իր դժգոհությունն էր հայտնում աղջիկների հանդերձարանի դուռը փակ չպահելու մասին, քանի որ ուզում էր զգեստափոխվեր, Մաշան նկատեց, որ նրա Ինստագրամում բաց լուսանկարների պակաս չկա, կարող է հանգիստ զգեստափոխվել:

Արդեն բեմում ակումբի անդամները ոչ միշտ են կարողանում զսպել իրենց ծիծաղը: Այսպես, օրինակ, Պոնչը ստիպված եղավ մի քանի անգամ բեմ գալ, քանի որ սկսում էր ծիծաղել, հենց տեսնում էր Զիրոյանին՝ մարզակոշիկների խանութի վաճառողի կարգավիճակում: Լիլին էլ մի պահ չկարողացավ զսպել ծիծաղը իր մասնակցությամբ համարում՝ վարակելով նաև գործընկերներին՝ Պոնչին, Սոնային և Մաշային: