«Դրախտի դարպասը» ֆիլմի պրեմիերան և հայտնի հյուրերը

Ռեժիսոր Ջիվան Ավետիսյանի «Դրախտի դարպասը» ֆիլմն արդեն մեծ էկրաններին է։ Tert.am Life-ը ներկա է եղել ֆիլմի պրեմիերային և ներկայացնում է հայտնի հյուրերին ու հետաքրքիր դրվագները։ Միջոցառմանը ներկա էին ՀՀ վարչապետ Նիկոլ Փաշինյանը, ԱԺ նախագահ Արարատ Միրզոյանը, Երևանի քաղաքապետ Հայկ Մարությանը, ՀՀ գլխավոր դատախազ Արթուր Դավթյանը։

Ջիվան Ավետիսյանը հայտնել է, որ ֆիլմի ստեղծման վրա աշխատել են մոտ 40 ամիս: Նրա խոսքով՝ դժվարություններ շատ են եղել, սակայն ստեղծագործական թիմը ճգնաժամերը հաղթահարել է աշխատանքով:

«Դրախտն այն վայրն է, որտեղ անձն իրեն լիարժեք է զգում: Մարդը կարող է ունենալ ամեն ինչ, բայց թերի զգալ իրեն, բայց և կարող է ունենալ ժառանգություն ստացած մի ընկուզենի ու լիարժեք երջանիկ լինել, ինչպես դրախտում: Յուրաքանչյուրի համար գոյություն ունի դրախտ երկրի վրա, ինձ համար դրախտն Արցախն է, առհասարակ, հայության համար դրախտի դարպասներն Արցախում են: Առաջին հերթին փորձել ենք ստեղծել արվեստի բարձրարժեք գործ: Հիմա պրոդյուսերական միջազգային կազմով թևակոխել ենք նոր փուլ՝ շատ կարևոր շրջան, որն է՝ ֆիլմի տարածումն ամբողջ աշխարհում: Ֆիլմն ունի անհրաժեշտ նախադրյալները միջազգային հարթակներում ցուցադրվելու համար: Մենք հանդիպել ենք Ադրբեջանի կողմից  առաջացրած խոչընդոտների, բայց կրկնակի, եռակի անգամ հանդիպել ենք լուսավոր մարդկանց, որոնք աջակցել են մեզ: Ես հավատում եմ, որ ֆիլմը դիտելու են միլիոնավոր մարդիկ»,- նշեց Ջիվանը:

«Դրախտի դարպասը» ֆիլմը պատմում է գերմանացի լրագրողի՝ 50-ամյա Ռոբերտ Ստերնվալի մասին, որը 2016-ին վերադարձել է Արցախ՝ լուսաբանելու քսաներկու տարվա ընդմիջումից հետո վերսկսված պատերազմը։ Լրագրողական հետաքննության արդյունքում նա ծանոթանում է երիտասարդ օպերային երգչուհի 35-ամյա Սոֆյա Մարտիի հետ: Նրանք սիրահարվում են, սակայն պարզվում է, որ Սոֆյան անհայտ կորած ֆոտոլրագրող Էդգար Մարտիրոսյանի աղջիկն է, ում 1992-ին՝ Թալիշի անկման օրը, Ռոբերտը թողել է գյուղում գերեվարության մեջ՝ յուրացնելով նրա՝ մարտի դաշտում արած լուսանկարները:

Ըստ ստեղծագործական անձնակազմի՝ ֆիլմում կարևորագույն պատգամը մարդ մնալն է: Կարևոր չէ, թե ինչ ազգություն ունես, որ պետությունում ես ծնվել, կարևոր է, թե ինչքան արդար և ազնիվ ես քո խղճի նկատմամբ:

Ֆիլմում խաղում են Ռիխարդ Զամելը, Տատյանա Սպիվակովան, Սոս Ջանիբեկյանը, Նաիրա Զաքարյանը, Նինա Կրոնյագերը, Բենեդիկտ Ֆրեյթագը և այլք: Ֆիլմի գլխավոր դերակատարներից մեկը հայտնի դերասան Ռիխարդ Զամելն է: Վերջինս ասաց, որ մինչև սցենարին ծանոթանալը չէր լսել Արցախի մասին, հակամարտության մասին էլ աղոտ ինֆորմացիայի էր տիրապետում:

«Արտասահմանյան մամուլում դրա մասին չի խոսվում: Մեզ վրա ճնշում կար ադրբեջանական կողմից, որպեսզի չմասնակցենք ֆիլմի նկարահանումներին, բայց կա հակամարտություն, կա պատմություն և ես ուզում եմ մասնակցել այս պատմությունը պատմելու գործընթացին: Աշխարհը չգիտի, թե ինչ է կատարվել և կատարվում Արցախում, բայց պետք է իմանա: Երբ գնացի Արցախ, իսկապես զարմացած էի, թե որքան սրտաբաց և աջակցող էին տեղացիները: Ինձ համար բացահայտեցի տեղի մշակույթը և ղարաբաղյան հակամարտության հիմքերը: «Դրախտի դարպասը» ֆիլմն ինձ համար հնարավորություն է՝ աշխարհին պատմելու, թե ինչ է կատարվել»,- ասաց գերմանացի դերասանը:

Լուսանկարները՝ Անդրանիկ Հարությունյանի