Տիգրան Մանսուրյանը, Լիլիթ Պիպոյանը, Ռուդոլֆ Խառատյանը և այլ մտավորականներ հավաքվել են Հովհաննես Թումանյանի Թբիլիսիի տանը

Տիգրան Մանսուրյանը, Լիլիթ Պիպոյանը, Ռուդոլֆ Խառատյանը, Ռուբեն Բաբայանը, Նիկոլայ Ծատուրյանը, Ռոբերտ Մլքեյանը, Անահիտ Քոչարյանը, Վահե Շահվերդյանը, Լևոն Թոքմաջյանը, Հակոբ Ղազանչյանն ու  այլ հայ և վրացի մտավորականներ Թումանյանի ծննդյան 150-ամյակին նվիրված մշակութային ծրագրի շրջանակում երեկ հավաքվել էին Թբիլիսում գտնվող «Հովհաննես Թումանյանի տուն» մշակութային կենտրոնում։ Չնայած «Վերնատուն» գրական խմբակն այլ հասցեում է եղել, բանաստեղծն այստեղ ևս հաճախ հյուրընկալել է ժամանակի մտավորականներին։ Այս մասին Tert.am Life-ի հետ զրույցում պատմեց Երևանի փոխքաղաքապետ Տիգրան Վիրաբյանը՝ տրամադրելով նաև հանդիպման լուսանկարները։

«Երբ հայ մտավորականների հետ քննարկում էինք հանդիպման այս ձևաչափը, նրանց մոտ մեծ ոգևորություն կար։ Բոլորն էլ Թբիլիսիի հետ կապված լավ հիշողություններ, հետաքրքիր պատմություններ, ուսանողական ընկերներ, գործընկերներ ունեն։ Սովետական  ժամանակահատվածում երկու երկրների մտավորականության կապը  շատ ավելի ակտիվ է եղել՝ միասին ստեղծագործել են, շատերը սովորել են իրար հետ։ Սա հնարավորություն էր, որպեսզի  երբեմնի մտերիմ ընկերները, որոնք երկար տարիներ հանդիպելու առիթ չէին ունեցել, հանդիպեին։ Այն ջերմ մթնոլորտը, որը կար, ուղղակի ֆանտաստիկ էր»,- ասաց Տիգրան Վիրաբյանը։

Հարցին, թե բովանդակային ի՞նչ քննարկումներ են ունեցել մտավորականները՝,փոխքաղաքապետն պատասխանեց․ «Քննարկումները բազմազան ու բազմաշերտ էին, օրինակ,  Վրաստանում հայկական մշակութային ժառանգության պահպանումը, Երևանում Թբիլիսիի օրեր և Թբիլիսում Երևանի օրեր անցկացնելու  միտքը։ Քանդակագործ Լևոն Թոքմաջյանն առաջարկեց արձանախումբ պատրաստել և նվիրել Թբիլիսիին։  Տիկին Պիպոյանը պայմանավորվեց Թբիլիսում համերգային ծրագիր ներկայացնել։ «Թբիլիսի Բիգ-Բենդ» ջազ խմբի ներկայացուցիչը պատրաստակամություն հայտնեց Երևանում ջազային որևէ համերգ ունենալ։ Ռոբերտ Մլքյանը խոսեց Գորիում կայացող երգչախմբային արվեստի փառատոնի մասին՝ ցանկություն հայտնելով որոշ օրեր այն տեղափոխել Երևան, այստեղից էլ երգչախմբեր տանել Գորիի փառատոնին, որը, ի դեպ, իր մասշտաբով  ամենամեծն է տարածաշրջանում»։

Փոխքաղաքապետի խոսքով՝ անդրադարձել են նաև Թբիլիսիում հայկական թատերական կյանքին։ Բեմադրիչները խոստացել են Պետրոս Ադամյանի անվան հայկական թատրոնի շենքի վերակառուցման ավարտից հետո մի շարք բեմադրություններ անել այնտեղ։

«Հանդիպմանը ներկա էր նաև Թբիլիսիի՝ Պետրոս Ադամյանի անվան հայկական թատրոնի գեղարվեստական ղեկավար Արմեն Բայանդուրյանը։ Խոսվեց Թբիլիսիի թատրոնի շենքի վերակառուցման,  ստեղծագործական առումով հայկական կողմի անելիքների մասին, որպեսզի Թբիլիսիի  հայկական թատերական կյանքն ավելի ակտիվանա։ Քննարկումների կենտրոնում էր գրականությունը, որովհետև ներկա էին Թբիլիսիի գրողների միության անդամներ, որոնք խոսում էին գրողների միության անունից: Նրանք կարևորոցին Հովհաննես Թումանյանի գրքերը, քառյակները վրացերեն թողարկելը, ինչը, ի դեպ, արդեն արված է»,- նշեց նա։

Քննարկված առաջնային հարցերից է եղել Թբիլիսում Փարաջանովի թանգարան ունենալը․ «Երևանն ու Թբիլիսին պետք է կարողանան տարբերակներ գտնել, միջոցներ ձեռնարկել, որպեսզի Թբիլիսում ունենանք Փարաջանովի թանգարան։ Մինչև տարեվերջ Թբիլիսիի փոխքաղաքապետը կժամանի Երևան, և մենք կքննարկենք, թե Երևանն ինչ կարող է անել այդ ծրագիրը համատեղ իրականացնելու համար»։

Տիգրան Վիրաբյանն ասաց, որ  երիտասարդներին այս ձևաչափում ներգրավելու տարբերակներ ևս փնտրում են:

«Քննարկել ենք նաև այս ձևաչափը երիտասարդացնելը, որպեսզի հաջորդ տարի Երևանում հայ և վրացի ստեղծագործողների նմանատիպ հանդիպում կազմակերպենք։ Այս հանդիպումն ավելի շատ հուշերի փոխանակում էր, հին պատմությունների քննարկում՝ վաղեմի ընկերների  հանդիպում։ Նոր ձևաչափով Երևանում սպասվող հանդիպումը կլինի նոր մտքերի, նախագծերի քննարկումների հանդիպում»,- եզրափակեց նա: