Ջազային շաբաթը Երևանում ավարտված է․ լեգենդար ու նոր անունները՝ մեկ բեմում

Երևանի ջազային շաբաթն ավարտված է․ երեկ «Մոսկվա» կինոթատրոնում տեղի ունեցավ Yerevan Jazz Fest ամենամյա միջազգային ջազ փառատոնի փակման արարողությունը, որի շրջանակում ցուցադրվեց ջազին նվիրված հայկական առաջին անիմացիոն ֆիլմը, ինչին հաջորդեց համերգային ծրագիր։  Փակման արարողությանը ներկա էր վարչապետ Նիկոլ Փաշինյանը կնոջ՝ Աննա Հարությունյանի հետ։  

Tert.am Life-ը ներկա է եղել երեկոյին և առանձնացրել հետաքրքիր դրվագները։

Մինչ փառատոնի գալա համերգը՝ հանդիսատեսին ներկայացրին կարճամետրաժ անիմացիոն ֆիլմ, որը նվիրված էր ջազին։ Ֆիլմի դիտմանն անմիջապես հաջորդեց համերգային ծրագիրը Վահագն Հայրապետյանի, Ջոն Մարշալի, Գրանդ Ստյուարդի, Լյուսի Եղիազարյանի, Սիմոն Դոլմազյանի և Արման Մնացականյանի մասնակցությամբ։  

Երգչուհի Լյուսի Եղիազարյանը ծնունդով Հայաստանից է, սակայն բնակվում է Նյու Յորքում և Երևան է ժամանել փառատոնի շրջանակներում։ Երգչուհին ասաց՝ ինքն իրեն, ջազի տեսանկյունից, համարում է ավանդական երգչուհի և այդ պատճառով փակման արարողության համերգի համար որոշել է ընտրել ջազի դասական կատարողների, դասական կատարւմները՝ 60-ականների շնչով։   

«Սովորաբար ես չեմ սիրում երաժիշտներին նոտայով կարդացնել, որովհետև դրա արդյունքում ելույթն ընկճված է ստացվում։ Որոշեցինք ընտրել բավականին հայտնի ստեղծագործություններ և շատ գեղեցիկ երգեր։ Վերջին անգամ հինգ տարի առաջ եմ եղել Հայաստանում և ամեն ինչ շատ տարբեր է, եթե փորձենք համեմատել։ Խոսում եմ թե՛ նվագելու մակարդակի մասին և թե՛ մարդկանց հետաքրքրության, որովհետև երիտասարդության մեջ մի տեսակ նկատվում է ջազի հանդեպ հետաքրքրություն։ Հայաստանում հիմնականն ակումբներում եմ եղել և նկատել եմ մի շատ հետքրքիր բան, որ մարդիկ հետևի շարքերում կանգնած կատարողներին հավասար երգում են։ Սա անգամ Նյու Յորքի համար է զարմանալի»,- ժպիտով նշեց երգչուհին։  

Երաժիշտ Վահագն Հայրապետյանը ևս անդրադարձավ ջազի տարածմանն ու նշեց՝  ջազի փառատոնն ամեն տարի հասարակության մոտ մեծացնում է սերը՝ դեպի այս երաժշտությունը։

«Այս տարի, ըստ իս, բացի տեղի երատասարությունը, բացի մեր հանրությունը, շատ են նաև զբոսաշրջիկները։ Սա խոսում է այն մասին, որ  Հայաստանում ավելացել է արտասահմանցի հյուրերի հոսքը դեպի Հայաստան և դեպի այս փառատոնը։ Սա մեծ տոն է ոչ միայն երաժիշտներիս համար, քանի որ մենք ունենում ենք հնարավորություն նվագելու շատ հայտնի կատարողների հետ, այլև հենց հանրության։ Շատ կարևոր է այն, որ սա շարունակական բնույթ է կրում և կրելու։ Այս փառատոնի հիմնական նշակետը այն է, որ մենք նման որակյալ երաժշտությամբ կարողանում ենք երկիր ներկայացնել»,- ասաց Վահագն Հայրապետյանը։

Նշենք, որ այս տարի Jazz Fest-ն ընդլայնել է շրջանակը: Նոյեմբերի 3-ին Գյումրիում համերգով հանդես կգան Վահագն Հայրապետյանն ու Ջոն Մարշալը։

  Լուսանկարները՝ Էլեն Գասպարյանի