«Ինձ շատ հետաքրքիր է խաղալ այս դերը». Էդգար Իգիթյանը՝ դաժան հերոսի և նոր թիմում աշխատելու մասին

Tert.am Life-ն իր ընթերցողներին հայտնել է, որ դերասան Էդգար Իգիթյանը նկարահանվում է Ելենա Արշակյանի նոր՝ «Սիրուն Սոնա» նախագծում: Երեկ Էդգարի առաջին նկարահանման օրն էր նոր թիմում:

Tert.am Life-ի հետ զրույցում դերասանը պատմել է նոր թիմին ինտեգրվելու, առաջին անգամ բացասական հերոսի մարմնավորելու և ոգևորությամբ նոր աշխատանքին անցնելու մասին:

Դեռ 2 ամիս առաջ, երբ հայտնի դարձավ, որ դերասանը դուրս է եկել «Երկուսով» նախագծից, նա ասաց, որ այս փուլում չի նախատեսում նկարահանվել, քանի որ հանգստի կարիք ունի: Էդգարից հետաքրքրվեցինք, թե ինչն ազդեց որոշման փոփոխման վրա. «Իրականում այդպես էի տրամադրված, բայց արդեն հասցրել եմ հանգստանալ, այս ընթացքում նաև կարգավորեցի մյուս աշխատանքներս: Առաջարկը ստանալուց հետո քննարկեցի գրաֆիկս ու հասկացա, որ այն ինձ թույլ կտա համատեղել նկարահանումներն ու իմ մյուս գործերը»,- ասաց Էդգարն ու հավելեց, որ Ելենայի հետ առաջին անգամ է աշխատելու, սակայն համագործակցելու առաջարկ նրանից նախկինում էլ է ստացել:

«Շատ ուրախ եմ, որ մեր համագործակցությունն այս անգամ ստացվեց, քանի որ նախորդ անգամ նրա նախագծում չկարողացա նկարահանվել զուտ ժամանակի առումով»,- ասաց դերասանը:

Էդգարի համար այս թիմը նոր է, թեև ռեժիսորի՝ Մհեր Խաչատրյանի հետ աշխատել է «Էլենի օրագրի» շրջանակում, անձնակազմի մյուս անդամներն ու դերասանական կազմը նրան անծանոթ են. «Դերասաններից շատերի հետ նոր եմ ծանոթացել, շատ լավ կազմ է հավաքվել: Ես շատ դրական եմ տրամադրված: Ինձ համար հետաքրքիր է աշխատել նոր մարդկանց հետ: Դա արդյունավետ է նաև նոր բաներ սովորելու առումով»:

ATV-ի նոր հեռուստասերիալում լսարանն Էդգարին կտեսնի 3 գլխավոր հերոսներից մեկի՝ Խորիկի դերով: Այս անգամ դերասանը ներկայանալու է բացասական կերպարով:

««էլենի օրագրում» Մաքսի կերպարը ևս սկզբում բացասական էր, սակայն կարճ ժամանակ անց կերպարի ուղղությունը փոխվեց դեպի դրական: Կարծում եմ՝ այս անգամ լսարանն ինձ նորովի կտեսնի, որովհետև եթե Մաքսը դպրոցահասակ էր, այս հերոսս հասուն տղամարդ է, որն արդեն ընտանիք ունի: Այս կերպարը շատ ավելի բացասական է, ես կասեի՝ դաժան, սակայն ունի իր խորքային պատմությունը: Կերպարն ինձ շատ-շատ է դուր եկել, ես այն կկերտեմ՝ հաշվի առնելով իր պատմությունն ու հոգեբանությունը: Աշխատելու շատ տեղ ունեմ»,- ոգևորությամբ պատմեց դերասանը:

Բացասական կերպարով ներկայանալու մտավախություն Էդգարը չունի: Ասում է՝ դերասանը պետք է կարողանա կերտել և՛ բացասական, և՛ դրական հերոսների: Չնայած լսարանը հաճախ նույնացնում է կերպարի գործողությունները դերասանի հետ, Էդգարը կարծում է, որ իրեն դա չի սպառնում: «Հանդիսատեսն ինձ արդեն տեսել և ճանաչում է դրական կերպարներով: Կարծում եմ՝ ինձ բացասական հերոսի հետ նույնացնելու խնդիր չի լինի, այն կընկալեն որպես կերպար: Ես այն մարդկանցից չեմ, որոնք միշտ միայն բացասական դեր են խաղացել և ասոցացվում են հերոսի հետ»,- կարծում է նա: