«Հնարավոր է՝ հարսանիք չլինի». Մարիամ Ալեքսանյանը 2019-ի բարդության և 2020-ից սպասման մասին

13:34 • 11.01.20

Շոուբիզնես

Դերասանուհի Մարիամ Ալեքսանյանը 2019-ին ուրախությամբ է մնաս բարով ասել: Նախորդ տարին նրա համար բարդ էր: Tert.am Life-ի հետ զրույցում Մարիամը պատմել է 2020-ից հրաշքի սպասման, թատրոնում խաղալու երազանքի իրականացման և գլխավոր նպատակի մասին:

«2019-ը շատ բարդ տարի էր համար: Էմոցիոնալ շատ բուռն տարի էր թե՛ լավ, թե՛ վատ առումով։ Անցած տարին ինձ համար 2 մասի է բաժանվում՝ տոկոսային հարաբերությամբ կարող եմ ասել, որ տարվա 40 տոկոսը երջանիկ եմ եղել, 60 տոկոսը չասեմ դժբախտ եմ եղել, բայց ինձ երջանիկ չեմ զգացել։ Գործնականում լավ տարի էր, ձեռքբերումների տարի էր։ Ես սիրում եմ նկարահանումների ընթացքում ընդմիջումներ ունենալ և անընդհատ էկրաններին չլինել: 2019-ին լավ նախագծերում եմ նկարահանվել։ Գործնականում ձեռք եմ բերել լավ ընկերներ, որոնց շատ եմ սիրում։ Անկախ նրանից՝ հետո կհամագործակցե՞նք, թե՞ ուղղակի կշփվենք իրար հետ, ուզում եմ նրանց հետ նույն դրական նոտայի վրա մնանք»,- ասաց Մարիամը:

Թե ինչու է 2019-ը բարդ բնորոշում, Մարիամը մանրամասնել չցանկացավ: «Շնորհակալ եմ 2019-ին նրա համար, ինչ խլել է և նրա համար, ինչ տվել է։ Ես ուղղակի փակեցի նախորդ տարվա էջն ու բացեցի այս տարվա էջը։ Այս տարին շատ լավ եմ սկսել ու ուզում եմ այդպես էլ շարունակել, թեև արդեն չեմ հավատում, որ եթե տարիդ լավ ես սկսում, ուրեմն լավ կանցնի։ 2019-ը շատ լավ էի սկսել: 2020-ից ակնկալիքներ չունեմ: Ես սովորել եմ ակնկալիքներ չունենալ ոչ սկսվող տարուց, ոչ կյանքից։ Սովորել եմ ուղղակի ապրել ու երջանկանալ ամենափոքր բանով,- ասաց նա, բայց փոքրիկ դադարից հետո անկեղծացավ,- Այսպես խոսում եմ, բայց ինչքան էլ ասեմ, որ սպասելիքներ չունեմ, մի տեսակ մեջս մանուկ կա, որը սպասում է հրաշքի։ Երբ մարդու ուղեղը կառավարում է նրան ու ասում՝ ոչնչի չսպասես, ներսի մանուկը, միևնույն է, հրաշքի է սպասում։ Որքան ռեալիստ եմ, նույնքան ռոմանտիկ եմ՝ փոքրիկ երեխա, որը հավատում է հրաշքների։ Նույնիսկ մանկական խոսելաձև ունեմ։ Ինձ թվում է՝ որքան էլ մեծանամ, իմ միջի մանուկը չի մեծանալու»։

2020-ի իր անելիքները Մարիամը դեռ չի հստակացրել, սակայն առանձնացրեց 3 բան, որ, անպայման, պետք է անի այս տարում՝ մի քանի օր է՝ սկսել է յոգայի հաճախել, պատրաստվում է մարզվել և ուժերը կենտրոնացնել թատրոնում:

«Թատրոնում նոր դեր եմ ստացել, շնորհակալ եմ 2019-ին նաև դրա համար, որովհետև դա իմ երազանքն էր: Շնորհակալ եմ մեր ռեժիսորին՝ Սոնա Քանքանյանին, Պատանի հանդիսատեսի թատրոնի գեղարվեստական ղեկավար Դավիթ Հարությունյանին և տնօրեն Էմին Թորոսյանին։ Ինձ համար երազանք էր թատրոնում խաղալը, որովհետև որքան էլ ներկայանամ տարբեր հեռուստանախագծերում, ես ինձ թատրոնի դերասանուհի եմ համարում։ Ուժերս չեմ խնայում, որ հաջողություն ունենամ։ Հուսով եմ՝ ամեն ինչ լավ կլինի, իսկ եթե լավ չլինի, ես երբեք չեմ կոտրվում»,- ասաց նա:

2020-ի հետ կապված Մարիամի գլխավոր նպատակը անձնական է, մանրամասնել չի ցանկանում: Այս տարի շատերը սպասում են Մարիամի և դերասան Գոռ Համբարձումյանի հարսանիքին: Դերասանուհին նշեց, որ ինքն էլ դեռ չգիտի՝ հարսանիք կանե՞ն, թե՞ ոչ: «Հնարավոր է՝ հարսանիք չլինի։ Իհարկե, մենք ցանկանում ենք, բայց դեռ ոչինչ չենք պլանավորել»,- ասաց նա: