«Բեմադրության մեջ խաղում է մեր աստղային կազմը». «Փափլիկը» ներկայացման պրեմիերան ու հայտնի հյուրերը

Սոս Սարգսյանի անվան համազգային թատրոնը տարին սկսեց պրեմիերայիով. թատրոնի գեղարվեստական ղեկավար, ռեժիսոր Նարինե Գրիգորյանը բեմադրել է Գի դը Մոպասանի «Ճարպագունդը» ստեղծագործությունը՝ ներկայացումը վերանվանելով «Փափլիկը»:

Tert.am Life-ը ներկա է եղել բեմականացման առաջնախաղին և ներկայացնում է հետաքրքիր դրվագներն ու հյուրերին:

Վարշամ Գևորգյանի, Տաթև Ղազարյանի, Դավիթ Հակոբյանի, Ալլա Սահակյանի, Գագիկ Մադոյանի, Արմինե Անդրեասյանի, Նարեկ Բաղդասարյանի, Սերգեյ Թովմասյանի Մարիա Սեյրանյանի, Ստեփան Ղամբարյանի մասնակցությամբ նոր ներկայացումը բախման մասին է, երբ ամպագոռգոռ հայրենասիրությունը հատվում է անձնական շահի հետ և հօդս ցնդում:

«Այս թեման ինձ համար շատ ցավոտ է: Ես այսօր տեսնում եմ, թե ինչպես է ամբողջ աշխարհը ենթարկվում բիզնեսի օրենքին, անգամ, արվեստը: Ուզում էի այս ստեղծագործության միջոցով դա ցույց տալ, բայց ոչ տրագիկ ձևով: Ասելիքը հումորով, Գի դը Մոպասանին հատուկ իրոնիայով է ներկայացված: Ժամանակաշրջանը, զգեստներն էլ հետաքրքրություն է բերում,- ասաց Նարինե Գրիգորյանն ու հավելեց, որ այս ստեղծագործությունն ընտրելու մյուս շարժառիթն իրենց թատրոնի դերասանական կազմն էր,- մեր դերասանախումբը շատ հարմար էր այս ստեղծագործության համար: Քանի որ բոլորն էլ կարևոր դերեր են, իսկ մեզ մոտ մեկը մյուսից աստղ դերասաններ են խաղում: Ուզում էի բոլորի ուժը ներկայացնող դասական ստեղծագործություն բեմադրել»:

«Ճարպագունդը» «Փափլիկ» վերանվանելը խմբի որոշումն է եղել: Նարինեն նկատեց, որ աշխատանքը խմբով են իրականացրել: «Մենք  վերցրել ենք վիպակը և հենց դերասաններն են ստեղծագործել: Ես միայնակ չեմ աշխատել: Մտածեցինք, որ եթե խաղացանկում լինի «Ճարպագունդը» խորագիրը, կարող էր բացասական տպավորություն թողնել, շատերը գուցե ծանոթ չեն դասական ստեղծագործությանը: Փորձեցինք մեղմել իրավիճակը և անվանեցինք «Փափլիկը»»,- պատմեց բեմադրիչը:

Թատրոնի այս թատերաշրջանը նվիրված է Սոս Սարգսյանի 90-ամյակին: Մուտքի մոտ Նարինեն հյուրերին տալիս էր պապիկի նկարով օրացույցները, որոնք տարվա ընթացքում կուղեկցեն նրանց: Նարինեից հետաքրքրվեցինք, թե հանդիսատեսը որքանով է հետաքրքրություն ցուցաբերում թատրոնի հանդեպ: Թատրոնի գեղարվեստական ղեկավարը վստահ է՝ հանդիսատեսը թատրոն է գալիս ոչ թե գործի, այլ դերասանների շնորհիվ:

«Բացի այդ, մարդկանց գրավում է այն, թե ինչպես է թատրոնն անընդհատ թարմացվում: Հիմա թատրոնի հանդեպ հետաքրքրությունը շատ կա: Նոր ձևաչափեր ենք բերել թատրոն՝  ունենք համերգ-ներկայացում՝ «Ազնավուրին», 2 երեկոյի ներկայացում՝ շաբաթ և կիրակի մի օր «Ճշմարտությունն» է, մի օր՝ «Սուտը», վավերագրական թատրոն՝ «Հաղթանակի գենեզիսը», թատերականացված ընթերցանություններ: Դասական գործերի կողքին ներկայացնում ենք ժամանակակից ստեղծագործություններ: Մեր հանդիսատեսն էլ փոխվել է, նոր տեսակի հանդիսատես է գալիս թատրոն, ինչը շատ ուրախալի է»,- նկատեց Նարինեն:

Լուսանկարները՝ Էլեն Գասպարյանի