«Ինձ գրում են, որ սիրում են իմ համեստության համար». 16-ամյա Սոֆի Ղազարյանը՝ Ինստագրամում հայտնի դառնալու և գումար աշխատելու մասին

Ինստագրամի հայտնի հայուհիների շարքն արագորեն գրավում է 16-ամյա Սոֆի Ղազարյանը, որի երազանքն է՝ հայտնվել հեռուստատեսությունում սիթքոմի գլխավոր հերոսուհու դերով։

45 հազար հետևորդ ունեցող աղջիկն իր էջը բացել է 2 տարի առաջ, ասում է՝ արտառոց ոչինչ չի արել էջն ակտիվացնելու համար, բայց տարբերվում է այնքանով, որ լսարանին չի գրավում բաց լուսանկարներով։

Tert.am Life-ը Սոֆիի հետ զրուցել է ինստագրամյան հարթակը գրավելու և նպատակների մասին։

16-ամյա աղջիկը սիրում է երգել, հետաքրքրված է մոդելինգով, իր ապագան տեսնում է մեդիա ոլորտում։ Ոգևորված է, որ Ինստագրամով շատ առաջարկներ է ստանում, 16 տարեկանում արդեն գումար է աշխատում այս հարթակով։ Ասում է՝ ժամանակին ոգեշնչվել է այս հարթակում հայտնի դարձած Ձյունիկից, ինչպես նաև Քայլի Ջեներից։

Սոֆին սովորում է ավագ դպրոցում, 11-րդ դասարան է։ Մտադիր է ուսումը շարունակել Բրյուսովում, ուզում է ավելի լավ տիրապետել լեզուներին, բայց իր ապագան տեսնում է հեռուստատեսությունում. «Ես մանկուց միայն դա եմ ցանկացել։ Ինստագրամով էլ զբաղվում եմ, որովհետև այդպես ավելի հեշտ կլինի առաջարկներ ստանալ»։

Նա փոքր տեսարաններ է ունեցել «Ոսկե դպրոցում», «Նվագախմբի երեխաներում»։ Հենց այդ ժամանակ իր մեջ նպատակ է դրել մեծանալ և սիթքոմում գլխավոր դեր ունենալ, հետո սկսել է Ինստագրամի իր էջով զբաղվել։ Հիշում է, թե ժամանակին ինչպես էր տխրել, որ չէր անցել OutDance-ի քասթինգը, բայց նպատակից չէր հրաժարվել։

«Օր օրի Ինստագրամում ավելի հետաքրքիր ու գայթակղիչ առաջարկներ եմ ստանում ավելի շատ գումար են առաջարկում։ Մանկուց եմ հետաքրքրվել նման բաներով, ցանկացել եմ լինել ուշադրության կենտրոնում։ Կարծում եմ՝ որոշ չափով ստացվել է։ 2017-ին, երբ նոր էի սկսում, չէի պատկերացնում, որ Ինստագրամում հաջողություն կունենամ։ Ես որևէ արտառոց բան չէի անում՝ իմ նկարները, Տիկ-Տոկ-ի վիդեոներն էի հրապարակում ու աուդիտորիաս աճում էր։ Կարծում եմ՝ հեշտ չէ մնալ չափի մեջ և ունենալ շատ հետևորդներ, բայց ես չեմ մոռանում արմատներիս մասին՝ ես հայ եմ, ամեն ինչ պետք է լինի չափի մեջ։ Այնպես եմ անում, որ քննադատության չարժանանամ։ Շատ եմ տեսնում աղջիկների, որոնք բաց նկարներով են առաջ գնում։ Ինձ շատ են գրում, որ սիրում են, որովհետև պահում եմ իմ համեստությունը։ Մարդկանց ուղղակի հետաքրքրում է իմ արտաքինն ու հոբբին, հավանում են իմ ճաշակը, ասում են, որ գեղեցիկ եմ պահում էջս»,- ասաց նա։

Չնայած այս հաջողությանը՝ Սոֆին նշեց, որ եղել է էտապ, երբ ցանկացել է ջնջել իր էջն ու մոռանալ այս ոլորտի մասին. «Թե՛ Ինստագրամում, թե՛ կյանքում կան մարդիկ, որոնք միշտ թերություն են գտնում։ Չգիտեմ՝ նախանձի՞ց, թե՞ այլ բանից ելնելով փորձում են ինձ նեղացնել։ Մի ժամանակ դա հասել էր այն աստիճանի, որ որոշել էի դադարեցնել այս ամենը։ Հետո հասկացա, որ պետք չէ, նրանք, չունենալով նույնը, չեն էլ կարող հասկանալ՝ ինչ եմ ես անում։ Միշտ կգտնվի մեկը, ով քեզ չի սիրի։ Ինձ ասում են՝ անիմաստ է, բայց սա ինձ համար ոչ միայն հոբբի է, այլև աշխատանք։ Նախորդ տարվանից գումար եմ աշխատում, կարծում եմ՝ հաջողություն է 16 տարեկանում այդքան գովազդի առաջարկներ ունենալը։ Ես ոչինչ չեմ անում, միայն տեսախցիկի առաջ գովազդում եմ որևէ խանութ կամ էջ ու գումար աշխատում, իսկ մարդիկ դա այլ ճանապարհներով են անում»։

Թե որքան գումար է աշխատում, Սոֆին բացահայտել չցանկացավ, սակայն նշեց, որ իր որոշ ծախսեր ինքնուրույն է հոգում։

Ասում է՝ իրականում ուշադրության կենտրունում լինել չի սիրում, ինչից շատերը զարմանում են։ «Իրականում նման չեմ Ինստագրամի աղջկան՝ փակ եմ ու ամաչկոտ։ Ինստագրամում ինքնավստահ եմ երևում, բայց այդպես չէ։ Երբեմն մտածում են՝ գոռոզ եմ, չեմ շփվում, բայց իրականում փակված եմ, ես շատ կոմպլեքսավորված եմ։ Ինձ շատ են ասում՝ բա ինչպե՞ս այդքան վիդեոներ ունես, բայց դրանք նկարահանելիս ես մենակ եմ, այլ մարդիկ ինձ չեն նայում»,- ասաց նա ու հավելեց, որ չնայած բարդույթներին՝ իր արտաքինում ինչ-որ բան փոխել չէր ցանկանա։

Սոֆիի հայրը բիզնեսմեն է, մայրը՝ տնային տնտեսուհի։ 2 կրտսեր եղբայր ունի։ Ասում է՝ Ինստագրամի բոլոր գեղեցիկ նկարները եղբայրն է անում։ Ծնողները չեն միջամտում աղջկա ինստագրամյան գործերին, ամեն բան ինքնուրույն է անում։ «Իրենք նույնիսկ տեղյակ չէին, որ առաջ եմ գնացել։ Լուրջ չէին վերաբերում դրան, մտածում էին՝ երեխա է, թող անի։ Զարմացան, երբ իմացան, որ նման արդյունք ունեմ։ Ծնողներս միշտ համամիտ էին, որ ես երգելով առաջ գնամ, բայց դեմ էին Ինստագրամին։ Ինձ պես իրենք էլ չէին հավատում, որ կարող եմ հաջողության հասնել։ Հիմա բոլորն ուրախանում են իմ հաջողությամբ»։