Հենրիխ Մխիթարյանը շնորհակալություն է հայտնել միջազգային լրատվամիջոցներին` Ռուսաստանի, Ֆրանսիայի և ԱՄՆ-ի նախագահներին ուղղված իր ուղերձը տարածելու համար

Ֆուտբոլի Հայաստանի ազգային հավաքականի ավագ և «Ռոմայի» կիսապաշտպան Հենրիխ Մխիթարյանն Ինստագրամի իր էջում հրապարակում է արել` շնորհակալություն հայտնելով միջազգային լրատվամիջոցներին և լրագրողներին` իր ուղերձը տարածելու համար: Նա լուսանկար է հրապարակել, որին կից գրել է. «Շնորհակալ եմ լրատվամիջոցներին և լրագրողներին` ուղերձս ամբողջ աշխարհում տարածելու համար»:

Ֆուտբոլիստը ուղերձ էր հղել Ռուսաստանի, Ֆրանսիայի և ԱՄՆ-ի նախագահներին նախօրեին, որում մասնավորապես գրված էր.

«Ես պրոֆեսիոնալ մարզիկ եմ, ներկայացնում եմ Հայաստանը և այս նամակը գրում եմ ծանր սրտով: Քանի որ աշխարհը տեսնում է Արցախում տեղի ունեցող այս աննախադեպ և ողբերգական պատերազմը, թույլ տվեք իմ անհանգստությունն արտահայտել և ասել` հայրենիքս գտնվում է իրական վտանգի մեջ:

Ծանր մարտերի երկրորդ շաբաթն է, իմ հայրենի Հայաստանն ու Արցախը ագրեսորներից պաշտպանում են իրենց ազգային ինքնությունը, պատմական հողում ապրելու իրավունքն ու աշխարհին հայտնի քրիստոնեական ժառանգությունը և արժեքները:

Վերջին օրերի ընթացքում ռազմական գործողությունների ուժգնացմանը զուգահեռ իսկապես սրտաճմլիկ է տեսնել, թե ինչպես Ադրբեջանն ուղղակիորեն թիրախավորում է մայրաքաղաք Ստեփանակերտի դպրոցները, մանկապարտեզները, բնակելի շենքերը, հիվանդանոցներն ու այլ քաղաքացիական ենթակառուցվածքներ, ինչպես նաև խիտ բնակեցված այլ վայրեր:

Խաղաղ բնակչության դեմ կիրառվում են կասետային հրթիռներ, ինչի արդյունքում կան բազմաթիվ զոհեր և վիրավորներ, նրանցից շատերը կմնան կոտրված կյանքերով ու ճակատագրերով: Այս ամենն այլ կերպ, քան ռազմական հանցագործություն, հնարավոր չէ անվանել: Ձեր ուշադրությանն եմ ներկայացնում, որ Արցախում տիրող իրավիճակը մարդասիրական աղետի վերջն է:

Սա պատերազմական հանցագործություն է: Ստեղծված իրավիճակը հանգեցրել է մարդասիրական աղետի: Եվ այս ողբերգության մեջ ուղղակի մասնակցություն ունեն տարածաշրջանում գործող արտաքին ուժերը: Օտար գրոհայինները մոտեցել են Ռուսաստանի և Եվրոպական միության սահմաններին, ինչն ուղիղ սպառնալիք է նաև ձեր երկրների անվտանգության համար:

Ավելին, այս ողբերգական դեպքերը կատարվում են արտաքին ուժերի ու օտարազգի զինյալների միջամտությամբ՝

Ռուսաստանի ու Եվրամիության անմիջական հարևանությամբ, ինչը Ձեր երկրների անվտանգության համար էլ սպառնալիք է: Հայաստանն ու Արցախը միայնակ են իրենց պայքարը տանում միջազգային ահաբեկչության դեմ:

Որպես Հայաստանի Հանրապետության պատմական դաշնակիցներ և ԵԱՀԿ Մինսկի խմբի համանախագահներ` դուք կարող եք միջամտել և Ադրբեջանին ստիպել կանգնեցնել այս կործանարար պատերազմը:
Մեր երիտասարդները զոհվում են առաջնագծում ու ծանր վիրավորվում՝ փոխարեն ազգի շարունակությունը դառնան: Կոչ եմ անում օգտագործել ձեր բոլոր կարողությունները, դադարեցնել այս ողբերգությունն ու կողմերին վերադարձնել խաղաղ բանակցությունների սեղանի շուրջ»: