««Պրադա», «Շանել», «Դիոր», «Ֆենդի» բրենդներից պայուսակներ ունեմ, հագուստը գնում եմ մեկ-երկու անգամ հագնելու համար». Անատի Սաքանյանը՝ իր ոճի, հագուստի գների և ոսկյա զարդեր նախընտրելու մասին

Հայտնի մարդկանց ոճն ու սիրելի իրերը ներկայացնող շարքի շրջանակում Tert.am Life-ն այս անգամ ներկայացնում է դերասանուհի Անատի Սաքանյանին: Անատիից հետաքրքրվել ենք, թե ի՞նչ ոճի հագուստ է ընտրում առօրյայում: Նրա խոսքով՝ սպորտային ոճն իր առօրյայի մի մասն է:

«Այս սեզոնին արդեն ավելի թեթև եմ հագնվում, առհասարակ, առօրյայում նախընտրում եմ սպորտային ոճի հագուստ, բայց երբ ինչ-որ հատուկ տեղ եմ գնում, դասական ոճի հագուստ եմ ընտրում: Մինչև մեքենա ունենալս քաղաքի անգամ ամենաքանդված փողոցներով բարձրակրունկներով վազում էի, հիմա ոտքիս հետ կապված փոքրիկ խնդիր ունեմ, մեքենա վարելիս էլ հարմար չէ կրունկներով: Բայց դպրոցն ավարտելուց հետո բարձրակրունկներ շատ եմ հագել, կապ չունի, թե ուր եմ գնացել: Կարծում եմ՝ առանց դրանց կանացի տեսք ունենալը բացառվում է, սպորտային հագուստով, կոշիկներով քայլվածքդ արդեն փոխվում է, քեզ ավելի ազատ ես զգում»,- ասաց նա:

Անատիի խոսքով՝ հագուստն առանց փորձելու է ձեռք բերում, անգամ, երբ խանութ է գնում: «Արդեն գիտեմ, թե ինձ ինչ է սազում, փորձելու կարիք չկա: Նաև օնլայն գնումներ եմ անում, բայց ոչ թե հագուստ, այլ «թիթիզ» ինչ-որ բան եմ պատվիրում: Հագուստի գինն ինձ համար կարևոր չէ, որովհետև 10-րդ դասարանից հետո սկսել եմ ինքս աշխատել, գնումներ անել: Բրենդամոլ չեմ, բայց բրենդային իրեր շատ ունեմ: Օրինակ, պայուսակներ ունեմ «Պրադա», «Շանել», «Դիոր», «Ֆենդի» բրենդներից: Դրանք ուղարկում են արտերկրում ապրող հարազատներս։ Հագուստը գնում եմ մեկ-երկու անգամ հագնելու նպատակով, իսկ երեկոյան զգեստները, հիմնականում, մեկ անգամ եմ հագնում: Այդ պատճառով ավելի լավ է բրենդային հագուստ չգնեմ: Տարիներ առաջ ԱՄՆ-ից «Գուչի» բրենդի բլուզ գնեցի, բնականաբար թանկ էր, բայց արժեքը չեմ հիշում: Այդ բլուզը հագնում էի Հայաստանում, որտեղ կեղծն ու օրիգինալը չէին տարբերվում, հիմա էլ այլևս ոճային չէ: Եթե Հայաստանում ամսական 50. 000 դոլար աշխատեի, ինձ շատ բան թույլ կտայի, բայց հիմա չեմ կարող»,- նշեց նա:

Անատին խոստովանեց, որ կոսմետիկայի վրա ավելի շատ գումար է ծախսում, քան հագուստի: «Վերջին տարիներին ինձ աշխատանքին եմ նվիրել: Կոսմետիկայի մեկ տուփը կարող է 40.000 դրամ արժենալ, իսկ մեկ բլուզը՝ 20.000 դրամ: Կարող եմ նոր պայուսակ չգնել, բայց չեմ կարող իմ պրոդուկտները չգնել: Վերջին տարիներին այդ պատճառով հագուստին այնքան էլ շատ ուշադրություն չեմ դարձնում»,- ասաց նա:

Դերասանուհին ընդգծեց, որ իր զգեստապահարանում գերակշռող կոնկրետ իր չունի․ բոլոր տեսակներին էլ կարևորություն է տալիս: «Կոշիկ ունեմ, որի բոլոր գույները գնել եմ արտերկրից մեծ զեղչով, ուզում եմ մեծ պահարան ունենալ, որտեղ գեղեցիկ, տեսանելի կդասավորեմ դրանք: Ունեմ այնպիսի իրեր, որոնք ընդհանրապես չեմ հագել, պահարանում կախված են: Ունեմ նաև իրեր, որոնք հաճախ եմ հագնում, քանի որ սիրում եմ: Օրինակ, կանաչ սպորտային հագուստս արդեն 3 տարվա է, բայց դեռ երկար կհագնեմ: Ունեմ պայուսակ, որը ձեռքի աշխատանք է, փայտից է, ընկերուհիս է նվիրել, գինը 45-65. 000 դրամի սահմաններում է: Առհասարակ, ձեռքի աշխատանքներ սիրում եմ, բայց նայած, թե ինչ, պետք է իմ ոճը լինի: Կաշվե տաբատս գնել եմ 20.000 դրամով Հայաստանից, ունեմ տարբեր գույները»,- ասաց Անատին:

Խոսելով աքսեսուարների մասին՝ դերասանուհին ասաց, որ հաճախ չի օգտագործում, որովհետև մաշկը դրանք չի ընդունում: «Հիմա նախընտրում եմ ոսկյա զարդեր, կրում եմ խաչս, որն ադամանդներով է զարդարված և բարակ շղթա ունի: Երբեմն էլ մայրիկիս, տատիկիս ու մորաքրոջս նվիրած շղթան եմ կրում: Առաջ մայրս թույլ չէր տալիս, վախենում էր, որ կարող են պարանոցիցս պոկել, բայց երբ մեքենայով եմ լինում, կրում եմ»,- եզրափակեց նա: