«Սիրելիս նիհար, բարձրահասակ է, չէի ցանկանում նրա կողքին ավելորդ քաշ ունենալ». Լիանա Հակոբյանը՝ 26 կգ նիհարելու իր տարբերակի, ինքնուրույն մարզվելու և շրթունքները ֆիլերով ներարկելու մասին

14:36 • 25.05.21

Ժամանց

Դերասանուհի Լիանա Հակոբյանը, որը հեռուստադիտողներին հայտնի է «Ոսկե դպրոց» և «Դեպի ճամբար» նախագծերից, վերջին մեկ տարվա ընթացքում նիհարել է 26 կգ-ով: Tert.am Life-ի հետ զրույցում Լիանան խոսել է 26 կգ նիհարելու իր տարբերակի, սիրելիի աջակցության, ինքնուրույն մարզվելու և շրթունքները ֆիլերով ներարկելու մասին:

Ըստ Լիանայի՝ մանկուց մոտ 11 տարի գեղարվեստական մարմնամարզությամբ է զբաղվել, բայց հետո դա թողել է, ժամանակի ընթացքում գիրացել:

«Հիմա զբաղվում եմ իմ արտաքին տեսքով, փորձում եմ ստանալ այն քաշը, որին ձգտում եմ հասնել, գեղեցիկ տեսք ունենալ: Նախորդ տարի կարանտինի ընթացքում հասկացա, որ եթե չսկսեմ նիհարել, ավելի կգիրանամ: Տանը մարզվում էի, կարգավորում սննդակարգս, հետո սկսեցի այցելել մարզասրահ: Մինչև հիմա էլ սննդակարգս կարգավորված է՝ չնայած արդեն այնքան խիստ չէ, որքան սկզբում: Այս մեկ տարվա ընթացքում նիհարել եմ 26 կգ: Նախկինում կշռում էի 83 կգ, հասակս 168 սմ է, հիմա կշռում եմ 57 կգ: Երբ ասում էին, որ ավելորդ քաշ ունեմ, նեղսրտում էի, բայց երբ կանգնեցի կշեռքին, տեսա 83 թիվը, սթափվեցի: Հասկացա, որ ինքս ինձ դուր չեմ գալիս, շատ հագուստներ չէի կարողանում հագնել: Ծանր շրջան եմ ունեցել, հոգեբանական բարդություններ են եղել: Երբ հավաքվում եք ծանոթներով, տեսնում ես՝ նրանք կարողանում են գեղեցիկ շրջազգեստներ հագնել, դու ոչ, նեղսրտում ես»,- պատմեց նա:

Դերասանուհու խոսքով՝ ինքը միշտ սիրել է իրեն, չի եղել, որ հայելու մեջ նայի ու վատ զգա, ուղղակի հասկացել է, որ կարող է ավելի լավը լինել: «Մի պահ հասկանում ես, որ ինքդ քեզ հետ հաշտ չես, ինչ-որ բան խանգարում է: Ճանապարհը բարդ էր, բայց չի եղել, պահ, որ կոտրվեմ, մտածեմ չշարունակելու մասին: Ի վերջո, չենք ապրում ուտելու համար, այլ ուտում ենք ապրելու համար»,- ասաց նա:

Դերասանուհին շեշտեց, որ սիրելին միշտ կողքին է եղել: «Երբ պետք է երեկոյան ոչինչ չուտեի, մոտիվացիայի մեծ աղբյուր էր պետք: Սիրելիս կողքիս էր, ինչը շատ կարևոր է: Կարող էր ասել, որ պետք չէ նիհարել, գնանք ինչ-որ բան ուտելու, բայց նա ոգևորում էր ինձ, ասում էր՝ դիմացիր: Շատ զույգեր գիտեմ, որտեղ աղջիկները քաշ են հավաքում, ասում են՝ ինչպե՞ս կարող է տղան ուտել, իսկ իրենք ոչ: Այնպես որ, միայնակ չես կարող, կողքից քեզ ուժ է պետք: Սիրելիս նիհար, բարձրահասակ է, գեղեցիկ կազմվածք ունի, ինքս էլ չէի ցանկանում նրա ավելորդ քաշ ունենալ»,- նշեց նա:

Լիանան ընդգծեց, որ կլինեն մարդիկ, որոնք կմտածեն, թե առողջությունը վնասելով է նիհարել, բայց այդպես չէ:

«Իրականում, հիմա առողջականս վիճակս ավելի լավ է, քան առաջ: Երբեք սննդաբանի կամ մարզչի օգնությանը չեմ դիմել, ամեն ինչ ինքնուրույն եմ անում: Հասկանում եմ, թե ինձ ինչ է պետք, որ սնունդը պետք է ուտեմ: Շատերը մտածում են, երբ նիհարում ես, համեղ չես սնվում, բայց այդպես չէ: Բանջարեղեններով կարելի է շատ համեղ ուտեստներ պատրաստել: Ես հետևել եմ տարբեր մոդելների, բլոգերների, որոնք նիհարել են ու կիսվել իրենց փորձով: Սնվում եմ օրական 3 անգամ: Ամենահագեցածը նախաճաշս է, որը ոչ թե ժամը 12-ին է, այլ առավոտյան: Ես արթնանում եմ 7:30-8:00-ն ընկած հատվածում: Այնպես չէ, որ աշխատանքի եմ գնում այդ ժամին, ուղղակի ռեժիմս այդպիսին է: Հետո ճաշում եմ և կարող եմ միրգ ուտել: Օրվա ընթացքում շատ ջուր եմ խմում, 2 լիտրից ավելի: Հիմա կարող եմ շաբաթվա մեջ մեկ անգամ խախտել սննդակարգս, որովհետև արդեն բավականանին նիհարել եմ»,- ասաց Լիանան:

Դերասանուհին նաև նկատեց, որ փոխվել է ոչ միայն արտաքնապես, այլև ներքուստ: «Ինձ հիմա այնքան լավ եմ զգում: Դեռ մի քանի կիլոգրամ էլ կնիհարեմ և վերջ, կսկսեմ հավաքել մկանային զանգված: Փոքրիկ միջամտություն եմ արել նաև դեմքիս հետ կապված, ֆիլերի ներարկում եմ արել շրթունքներիս հատվածում: Այլ միջամտություններ չկան, ուղղակի նիհարել եմ, ինչն անդրադարձել է նաև դեմքիս վրա, ընդգծված այտոսկրեր ունեմ: Շատ են հարցնում այս թեմայով, բայց մնացածը, իսկապես, նիհարելու արդյունքն է: Ես նաև սովորել եմ, թե ինչպես պետք է դեմքի շրջանում մերսումներ անել, ինչը ևս շատ է օգնում»,- եզրափակեց նա: