Հարսն ու փեսան նետվեցին լողավազանը, հյուրերը՝ նրանց հետևից, տորթն ընկավ մատուցողի ձեռքից․ ռեժիսոր Տիգրան Ավետիսյանի ոչ ստանդարտ հարսանիքն ու հայտնի հյուրերը

Ռեժիսոր Տիգրան Ավետիսյանն ամուսնացել է։ Նա և սիրելին՝ Լուկրեցիան, տարբերվող հարսանիք են կազմակերպել, իսկ օրվա մանրամասներն ու լուսանկարները տրամադրել են Tert.am Life–ին։

Զույգի հյուրերի թվում են եղել Կարեն Ասլանյանը, Մարիամ Ալեքսանյանը, Գևորգ Մկրտչյանը, Մաշ Իսրայելյանն ու ամուսինը՝ Գարիկը, Խոսրով Նալբանդյանն ու սիրելին՝ Մարին։

Նրանք հարսանիքի առթիվ բացօթյա միջոցառում են կազմակերպել լողավազանի մոտ։ Տիգրանն ու Լուկրեցիան իրենց ամուսնությունն ամրագրել են զագսում, այնուհետև հենց հարսանեկան հագուստով նետվել լողավազանը։

«Լողավազան նետվելը Լուկրեցիայի մտահղացումն էր։ Նա հարսի զգեստ հագել է միայն զագսի արարողության ժամանակ, իսկ հետո հագանք նախապես տպագրության տված շապիկները Love is․․․ թեմատիկայով»,– ասաց Տիգրանն ու հավելեց, որ եկեղեցում պսակադրություն ևս նախատեսում են։ Այն տեղի կունենա Իտալիայի Վենետիկ քաղաքում։

Հարսանեկան հագուստով լողավազանը նետվելուց հետո Տիգրանն ու Լուկրեցիան իրենց ընկերներին ևս հրել են լողավազանը։ «Բոլորս ընկերներ ենք և առանց քաշվելու միմյանց հրեցինք ջուրը»,– ասաց նա ու հավելեց, որ հենց այսպես էլ փչացել է դերասան, երգիչ Կարեն Ասլանյանի հեռախոսը։

Տիգրանի խոսքով՝ ունեցել են 90 հյուր՝ ամենամտերիմ ընկերներն ու ընտանիքի անդամները, ոչ ստանդարտ հարսանիք էին կազմակերպել, որպեսզի ձևական որևէ արարողակարգ չլինի։ Օրվա զարդարանքն էլ որոշել են անել կիտրոններով։

«Ուզում էինք մեր օրը լինի՝ առանց ձևականությունների։ Թամադա էլ չենք ունեցել։ Հյուրերից միայն Կարեն Ասլանյանն է մի երգ կատարել, քանի որ այդ երգը շատ սիրված է, բոլորին զգուշացրել էի, որ իրենք այդ օրը գալիս են ուրախանալու, ոչ թե երգելու, երաժշտությունն ապահովեց դիջեյը»,– ասաց ռեժիսորը։

Երեկոյի ամենաինտրիգային պահը տորթի կտրման արարողությունից առաջ էր․ երբ կրակը վառվեց ու տորթը պետք է բերեին, այն ընկավ մատուցողի ձեռքից։ «Բոլորն անհանգստացան՝ մտածելով, որ տորթը փչացավ։ Միայն երկու հոգի գիտեր, որ դա խաղարկային պահ է։ Բոլորի անհանգստության պահին ներս բերեցին իրական տորթը»,– ասաց նա ու հավելեց, որ հարսանիքի օրը վաղուց էին որոշել, սակայն նախապատրաստվելու համար 3 օր են ունեցել։

Տիգրանի խոսքով՝ ինքն ու սիրելին ընկերություն են արել 8 ամիս, հարաբերություններն արագ են զարգացել։ «Երբ մարդիկ հասկանում են, որ գտել են իրար, հարաբերությունները ձգձգելու կարիք չկա»,– եզրափակեց նա։