««Սիրո հասակի» ավարտից հետո կվերադառնամ նախկին արտաքինիս»․ Եվա Բաղդասարյանի փոփոխությունը հանուն նոր նախագծի

Դերասանուհի Եվա Բաղդասարյանն այժմ նկարահանվում է «Սիրո հասակ» հումորային նախագծում: Tert.am Life-ի հետ զրույցում նա պատմել է նախագծում իր կերպարի, հետագա ծրագրերի, արտաքին փոփոխությունների և անձնական կյանքի մասին:

 «Երկար ժամանակ բացասական կերպարներ մարմնավորելուց հետո սա իմ առաջին դրական կերպարն է, - ասաց դերասանուհին և հավելեց, որ առաջին անգամ է նկարահանվում հումորային նախագծում:-Մարմնավորում եմ մի քիչ դեբիլիկ, միամիտ ու բարի աղջնակի կերպար: Կերպարային գիծս հիմնականում Գարիկ Սեփխանյանի հետ է, որի հետ ունենք սիրային գիծ ու հետաքրքիր զարգացումներ»:

Խոսելով մարմնավորած կերպարների մասին՝ դերասանուհին շեշտեց՝ հեռուստադիտողը չի կարողանում տարանջատել մարմնավորած կերպարներին իրական Եվայից:

«Բացասական կերպարներիս արարքը միշտ վերագրվել է նաև ինձ, բայց սիթքոմի առաջին սերիայից հետո բավականին դրական արձագանքներ եմ ստացել, ինչը չի կարող չուրախացնել և չոգևորել ինձ»,- ասաց նա:

Նա նշեց, որ հումորային կերպար մարմնավորելն իրեն դուր է եկել, ընթացքն ու միջավայրը տարբերվում են դրամատիկ սյուժեյով սերիալներից: «Այլևս Ցանկություն ցչունեմ դրամատիկ կերպարներ մարմնավորել, շատ ավելի հեշտ ու թեթև ընթացք է հումորային նախագծերում նկարահանվելը, թեթև կերպարներ մարմնավորելը,- ասաց նա և հավելեց, որ այսուհետև հեռուստադիտողը հաճախ է իրեն տեսնելու հումորային նախագծերում: -Դրամատիկ նախագծերն ավելի երկարաժամկետ են, ամեն օր դրամայի մեջ ապրելն այն չէ: Հեռուստադիտողն ինձ այլևս չի տեսնի բացասական կերպարով»:

Նոր կերպարի համար դերասանուհին արտաքին փոփոխություններ է արել՝ փոխելով մազերի երանգը։ Նա ընդգծեց, որ հանուն մասնագիտության միշտ պատրաստ է արտաքին փոփոխությունների: «Սանրվածքս փոփոխել եմ նկարահանումների համար, քանի որ նախորդ նախագծից դադարը բավականին կարճ էր, փոփոխության կարիք կար: Մեկ ամիս անց, երբ ավարտվեն նկարահանումները մազերս նորից սև եմ ներկելու, քանի որ այդ գույնով ինձ ավելի հարմարավետ եմ զգում»,- ասաց Եվան:

Խոսելով իր կերպարի մասին՝ նա ընդգծեց, որ 10 տարի դերասանական ոլորտում աշխատելուց հետո ավելի թեթև է վերաբերվում բացասական եկնաբանություններին: «Ես փոքրուց էլ աչքի եմ ընկել իմ արտաքին տվյալներով: Քննադատությունները և վատ մեկնաբանությունները «կոկորդիս են հասել», բայց ժամանակի ընթացքում սկսել եմ թեթև վերաբերվել՝ հասկանալով, որ նորմալ մարդիկ չեն ծախսի իրենց ժամանակը ինձ վատ մեկնաբանություններ թողնելու համար»,- ասաց նա:

Դերասանուհին շեշտեց, որ միշտ կողմ է եղել բնական գեղեցկությանը և վստահեցրեց, որ այժմ ինքն էլ բնական տեսքին է վերադարձել: «Հիմա ես լիովին բնական եմ, հեռացրել եմ դեմքիս բոլոր ֆիլլերները, ես լիովին հեռացել եմ էսթետիկ միջամտություններից, քանի որ էկրանից շրթունքներս անճոռնի տեսք ունեին ու հասկացա, որ այդ միջամտությունները չեն, որ պետք է ինձ գեղեցկացնեն»,- ասաց նա:

Եվայի խոսքով՝ մոտեցումներն անձնական կյանքի նկատմամբ ևս փոխվել են: «Ժամանակին լիովին զբաղված էի աշխատանքով ու հիմա մտածում եմ, որ պետք է կարգավորեմ անձնական կյանքս: Հիմա մտածում եմ, որ ժամանակս պետք է հատկացնեմ անձնական կյանքիս: Այժմ միտքս ու սիրտս զբաղված են։ Կարող եմ միայն դա ասել, բայց կարելի է արդեն մտածել ամուսնանալու մասին»,- ասաց նա՝  չցանկանալով այլ մանրամասներ հայտնել:

Թերեզա Հովհաննիսյան