Մենք պետք է միշտ դժգոհ լինենք մեզնից, երբ սկսենք գոհ լինել՝ ամեն ինչ ավարտված է. Սամվել Թոփալյանը՝ ներկայացումների և հետագա ծրագրերի մասին

Մենք պետք է միշտ դժգոհ լինենք մեզնից, երբ սկսենք գոհ լինել՝ ամեն ինչ ավարտված է. Սամվել Թոփալյանը՝ ներկայացումների և հետագա ծրագրերի մասին
Դերասան Սամվել Թոփալյանն այժմ խաղում է«Բռնիր ձեռքս» հեռուստասերիալում, չնայած նրան, որ դերասանը հայտնի է գեղարվեստական ֆիլմերում իր կերտած կերպարներով։ Tert.am Life-ի հետ զրույցում Սամվել Թոփալյանը պատմեց «Առաքել» ներկայացման, այս շրջանի զբաղվածության և ոլորտի մասին։
«Այս շրջանում հեռուստասերիալում ակտիվ նկարահանումների փուլ է, և հեռուստասերիալն արդեն տևական ժամանակ է, ինչ եթեր է հեռարձակվում»,– ասաց Սամվել Թոփալյանը։
Նա հավելեց, որ այս շրջանում գեղարվեստական ֆիլմերում չի նկարահանվում․«Այս փուլում չկան նմանօրինակ առաջարկներ, որպեսզի համաձայնեմ նկարահանվել»։

Հումորային նախագծերում չնկարահանվելու մասին խոսելիս Սամվել Թոփալյանը շեշտեց, որ ունեցել է նման փորձ, բայց հասկացել, որ այդ ձևաչափն իր համար չէ։
«Նկարահանվել եմ «Ընտանյոք հանդերձ» սիթքոմում, բայց նմանօրինակ նախագծերն ինձ համար չեն, ու ցավոք, մեր մոտ հումոր ասվածն այլ կերպ է մատուցվում»,– ասաց նա։ Բացի այդ, շեշտեց, որ գովազդներում և մեդիաարտադրանքում կան շատ բացթողումներ հումորային ձևաչափի վերաբերյալ։
«Գովազդներում անգամ, երբ ներկայացվում է շինարարի կերպար, նա սովորաբար մեծ ականջներով, թլիկ խոսացող, անհասկանալի մի մարդ է լինում և հենց այստեղ ամեն բան արժեզրկվում է, այն ինչ պետք է ցույց տանք, որ այդ շինարարը տուն և օջախ կառուցող, վարպետ մարդ է, ոչ թե անգրագետ մի կերպար, ինչպես ներկայացնում են»։

Սամվելի խոսքով՝ կերպարային կամ ոլորտային փոփոխությունները ռիսկային չեն։
«Շատ ավելի ռիսկային է, երբ չունես աշխատանք ու չես կարողանում պահել ընտանիքդ, այնուամենայնիվ ես փորձում եմ բարձրորակ ֆիլմերում, հեռուստասերիալներում և ներկայացումներում խաղալ»,– ասաց դերասանը և հավելեց, որ այս փուլում մեդիաարտադրանքը շատ է, բայց որակով պրոդուկտ քիչ կա։
«Մենք պետք է միշտ դժգոհ լինենք մեզնից, երբ սկսենք գոհ լինել՝ ամեն ինչ ավարտված է, քանի որ միշտ պետք է փորձենք էլ ավելի լավը լինել ու լավն անել, դա արվեստի մեջ ընթացք է, որը պետք է պահել, այլապես այն կդադարի»,– ասաց նա։

Խոսելով թատրոնի և նոր ներկայացման մասին դերասանը նշեց, որ այս ներկայացումը հոգեհարազատ է նրա համար։
««Առաքել» ներկայացումն ինձ համար շատ հոգեհարազատ է, հետպատերազմյան շրջանն ենք ներկայացնում իր խնդիրներով, բացթողումներով, հույզերով և հոգեվիճակով, որտեղ ես մարմնավորում եմ Տիգրանի՝ առաքելի կերպարը։ Հայն ամենօր նմանօրինակ վիճակում է, վերապրում է նույն հույզերն ու ապրումները, նույն խնդիրները ցանկացած հայի մեջ են, իսկ մենք դա բարձրաձայնում ենք բեմում։ Ինձ դուր է գալիս, որ կան դրական նշույլներ պիեսում, քանի որ, միևնույն է, հայը նայում է դեպի ապագան ու լույսը՝ կարողանալով առաջ գնալ»,– ասաց նա։

Թերեզա Հովհաննիսյան