Հայտնիությունն ինձ չի հետաքրքրում, ինձ համար կարևոր է ստեղծագործել այնպես, ինչպես ճիշտ եմ գտնում․ Տաթև Հովակիմյանը՝ նախագծերի և արտաքին փոփոխությունների մասին

Օրեր առաջ հեռուստաէկրաններին է ցուցադրել Արման Նշանյանի «Սողոմոնի երգերը» ֆիլմը, որը պատմում է Համիդյան ջարդերի մասին։ Հայ կնոջ կերպարի՝ Սոնայի դերը մարմնավորում է Տաթև Հովակիմյանը , ով Tert.am Life-ի հետ զրույցում խոսեց իր մարմնավորած կերպարի, թատրոնում աշխատանքի, հեռուստասերիալներում չնկարահանվելու պատճառների և արտաքին փոփոխությունների մասին:
«Ֆիլմը նկարահանել ենք 2018 թվականին և երկար է ժամանակ է անցել, բայց վստահ կարող եմ ասել, որ այսօր ես լիովին այլ կերպ կխաղայի իմ դերը, քանի որ գիտակցումը, թե ինչպիսին է հայերին ցեղասպանելու թուրքի մղումը մենք զգացինք սեփական մաշկի վրա 44–օրյա պատերազմի ժամանակ։ Ինքներս զգացինք, ոչ թե պատմություններ լսելով, երբ մեզ ուղղակի պատմում էին դրա մասին կամ կադրեր էինք տեսնում այդ ժամանակաշրջանից»,- ասաց դերասանուհին և հավելեց, որ դժվար է ներկայացնել ցավ, որը չես զգացել:

«Քեզ պատմել են այդ շրջանի մասին ու դու տեսել ես կադրեր, իսկ հիմա ես կկարողանայի ավելի խորը դա ներկայացնել, քանի որ սեփական աչքերով տեսա, թե ինչպես են ցանկանում կոտորել հայերիս»,–ասաց նա:
Դերասանուհու խոսքով՝ դժվար է մտաբերում անգամ այն դերերը, որոնք մեկ տարի առաջ է մարմնավորել:
«Այն ինչ խաղում եմ այդ պահին, փորձում եմ բաց թողնել, դա պահի զգացմունք է, պահի աշխատանք ռեժիսորի ու խաղընկերների հետ, դա զգայական մի մակարդակի վրա է, որը պետք է զգաս ու բաց թողնես»,- ասաց նա:

Տաթև Հովակիմյանն այժմ չի նկարահանվում և հիմնական մասնագիտական զբաղվածությունը ծավալում է թատրոնում, շուտով ներկայանալու է Գյումրու Դրամատիկական թատրոնում, նաև նոր ձևաչափով են ներկայացնելու «պոեմԷ» նախագիծը, որը փորձում են ստանալ կինոյի տրամաբանությամբ ու ավելի հետաքրքիր կերպով, որը դերասանուհին կկարողանա ներկայացնել ծրագրի հաստատումից հետո։

«Հետպխատերազմյան շրջանը մեր երկրի համար շատ ծանր էր բոլոր ոլորտներում: Բնականաբար, կինոարտադրությունը ևս տուժեց այս ամենում, բայց հիմա փորձում ենք նոր նախագծեր ստեղծել և շուտով կփորձեմ նաև մանրամասներ ներկայացնել մի շարք այլ նախագծերից»,–ասաց նա։

Դերասանուհին նաև խոսեց հեռուստասերիալներում և սիթքոմներում չնկարահանվելու մասին:
«Հայտնիությունն ինձ չի հետաքրքրում, ինձ համար կարևոր է ստեղծագործել այնպես, ինչպես ճիշտ եմ զգում: Ես ինձ հանգիստ եմ զգում, երբ մատուցում եմ մի բան, որը արժե մատուցել հանրությանը: Ինձ համար շատ ցավալի է տեսնել մի շարք հեռուստասերիալների որակ, երբ օրինակ ունենք հիասքանչ երաժշտություն, լավ որակյալ խմբեր, բայց հեռուստասերիալներն օգտագործում են թուրքակական կլկլոց: Կան նաև բարձրորակ հեռուստասերիալներ, օրինակ կար մի նախագիծ 16 մասից բաղկացած, որը պետք է նկարահանեինք, բայց պատերազմով պայմանավորված դադար կա այդ նախագծի աշխատանքների շուրջ, բայց նմանօրինակ արտադրանքում ես սիրով կցանկանամ իմ ներդրումն ունենալ»,- նշեց նա:

Տաթև Հովակիմյանը վստահեցրեց, որ արտաքին որևէ փոփոխություններ չի արել և ներկա տենդենցները նրա համար հոգեհարազատ չեն:
« Ես սիրում եմ չլինել մի ալիքի մեջ, միշտ սիրում եմ դուրս մնալ այդ ալիքից: Չեմ արել արտաքին որևէ փոփոխություն ու ինքնաբավ եմ: Մերօրյա գեղեցկության ստանդարտները չեմ ընկալում և չեմ հասկանում ՝ ով է դա ներմուծում և ինչու է դա, ըստ նրանց, գեղեցիկ: Միշտ նախընտրում եմ լինել խնամված և էսթետիկ: Երբ ուզում ես քեզ վիրահատել պետք է փորձես վերցնել հետաքրքիր գիրք, կամ հետաքրքիր ֆիլմ նայել ու բացահայտել մարդուն, որպես անհատ: Չեմ խոսում իհարկե էսթետիկ որոշակի փոփոխությունների մասին, երբ հատկապես հանրային դեմք ես, բայց բարեբախտաբար մինչ այժմ որևէ փոփոխություն չեմ արել»,- ասաց Տաթև Հովակիմյանը:

Թերեզա Հովհաննիսյան