Եթե լավ վճարեն՝ կիսամերկ կնկարահանվեմ, որքան վատ մեկնաբանություն գրեն, ես այդքան ուրախ եմ. Ջուսը՝ նոր երգերի, սև PR-ի և նոր դաջվածքների մասին

20:51 • 06.05.22

Շոուբիզնես

Երգչուհի Ջուսը լսարանին հայտնի է իր վառ և էպատաժային կերպարներով, բայց երգչուհին հավաստիացնում է, որ առօրյայում բոլորովին այլ մարդ է: Tert.am Life-ի հետ զրույցում խոսել է այս շրջանի գործունեության, նոր դաջվածնքերի, սև PR-ի և հոնորարի մասին, որի դիմաց պատրաստ է կիսամերկ լուսանկարվել:

«Հենց վաղը նոր երգիս ձայնագրությանը պետք է գնամ, նոր ու հետաքրքիր ոճով եմ ներկայանալու ու բավականին էպատաժային: Երգը լինելու է երկու լեզվով, բայց դեռևս չեմ ուզում շատ բացել փակագծերն ու ուզում եմ, որ անակնկալ լինի հետևորդներիս համար»,- ասաց նա:
Երգչուհին վերջերս է դիմել արտաքին փոփոխությունների՝ ներկելով մազերը: «Ես միշտ սիրում եմ տարբերվել, ես հոգնում եմ անգամ ինքս ինձնից, միշտ պետք է փոփոխություն անեմ՝ մազերիս գույնը փոխեմ, դաջվածքներ անեմ: Օրեր առաջ ուզում էի շատ կարճ կտրել մազերս, բայց ասեցի՝ լավ մի փոքր էլ սպասեմ, բայց նման խենթություն անելու եմ»:

Ջուսը մոտ մեկ տարի առաջ տարբեր պատկերներով դաջվածքներ էր արել, նշեց, որ նոր դաջվածքներ անելու ցանկություն ունի: «Ամբողջ մարմնից դաջվածք եմ արել, իսկ հիմա մտածում եմ նորի մասին, չնայած շրջապատումս դեմ են և ասում են, որ բավական է այսքանը, բայց, միևնույն է, անելու եմ և երևացող տեղ, քանի որ չունեմ որևէ սահմանափակումներ ինքս ինձ համար»,- նշեց նա:
Երգչուհու խոսքով՝ իրական կյանքում լիովին այլ մարդ է․ « Ես իրական կյանքում լիովին այլ եմ, գրեթե չեմ շպարվում առօրյայում, բայց բեմն ինձ համար լիովին ուրիշ աշխարհ է, եթե լինեմ նույնը՝ կդառնամ անհետաքրքիր: Բայց առօրյայում սիրում եմ ընդգծել մարմինս, չեմ սիրում լայն շորեր, գոնե մի բան պետք է բաց լինի»,- ասաց Ջուսը:

Վերջերս երգչուհին ելույթ էր ունեցել Պատանի հանդիսատես թատրոնում, որտեղ նրա արտաքին տեքսն արժանացել էր քննադատությունների և երգչուհին մեկնաբանեց այդ դրվագը: « Հագել էի կարճ շորտ ու երկարաճիթ կոշիկներ և ինչ ասես չէին գրել այդ հոլովակի մեկնաբանություններում, բայց այն ունի 200 հազար դիտում, փաստորեն դա լավ PR էր, ինչքան վատ մեկնաբանություններ գրեն, այդքան էլ հոլովակս տարածվում է, իսկ ես դրա համար ուրախ եմ»,- նշեց նա:
Դեռևս 2014 թվականին երգչուհին ասել էր, որ հստակ հոնորարի դիմաց պատրաստ է կիսամերկ լուսանկարվել.« Անգամ այն ժամանակ չէին կարողանա 10.000 դոլար վճարել, հիմա ընդհանրապես չեն վճարի, կիսամերկ գեղեցիկ ֆոտոշարքի պատրաստ եմ, նույն 10.000 թող վճարեն կիսամերկ ու շատ գեղեցիկ ֆոտոշարք կլինի, ու բավականին էսթետիկ: Եթե լավ վճարեն՝ կիսամերկ կնկարահանվեմ»,- ասաց Ջուսը: