«2 ամիս շարունակ ճիշտ սննդակարգ, մարզումներ և կապի խզում արտաքին աշխարհի հետ, իսկ այդ դեպքում կոնֆլիկտներն անխուսափելի են». Լիլիթ Բասյանը՝ «2XL» ռեալիթի շոուի մասին

14:53 • 08.10.22

ATV-ի Նոր հեռուստանախագիծը՝ «2XL» Ռեալիթի շոուն, առողջ ապրելակերպի և մոտիվացիայի մասին է: Ռեալիթի շոուի հաղորդավարուհին և նախագծի հեղինակն է սննդաբան Լիլիթ Բասյանը, որը Tert.am Life-ի հետ զրույցում պատմել է նախագծի ստեղծման, դժվարությունների և գաղափարի մասին:

«Իմ կյանքում ցանկացած նախագիծ սկսվում է սպոնտան: Ամիսներ առաջ ես և Ելենա Արշակյանը մեկնեցինք հանգստի և ես խոսեցի իմ երազանքներից մեկի՝ նման նախագիծ ստեղծելու մասին, որը դեռևս չի եղել հայկական հեռուստաեթերում: Մենք վերադարձանք Հայաստան, տուն վարձեցինք, որտեղ 2 ամիս շարունակ պետք է իրականացվեին նկարահանումները, հայտարարեցինք քաստինգ և մեկնարկեցինք նախագիծը»,- պատմեց Լիլիթը:

Նա նաև հավելեց, որ նախագծի ամեն մասնակցին ընտրել է անձամբ՝ կարևորելով մի շարք հանգամանքներ:

«Ես անձամբ խոսել եմ ամեն մասնակցի հետ, փորձել եմ հասկանալ՝ ինչ պատմություն ունի ինքը, ինչու է ցանկանում ազատվել ավելորդ քաշից, ինչ հոգեբանական խնդիրներ ունի: Ես ներկա եմ եղել ոչ միայն նկարահանման հրապարակում, այլև կադրից դուրս շատ հաճախ այցելել եմ մասնակիցների մոտ, խոսել, ճաշել նրանց հետ և մշտապես ցուցաբերել ե անկեղծ մոտեցում,- ասաց Լիլիթը և հավելեց, որ այդքանով հանդերձ նա բավականին խստապահանջ է: -Իմ տեսակով ես բավականին խստապահանջ եմ: Ես շատ ռեսուրս եմ ներդրել ամբողջ նախագծի վրա, վերջին ամիսների ամենածավալուն աշխատանքներից մեկը հենց այս նախագիծն է: Ես անհատապես աշխատում եմ մասնակիցների հետ և պահանջում եմ նրանցից պատշաճ վերաբերմունք նախագծի և աշխատանքի նկատմամբ»:

Նախագծի շրջանակներում մասնակիցները 24/7 վրա տեսախցիկների առաջ են: Ռեալիթի շոուի ընթացքում նաև լուսաբանվում են վեճերը, կոնֆլիկտները և միջանձնային հարաբերությունները:

«Դեռևս քաստինգի շրջանակներում մասնակիցներին զգուշացվել է, որ 24/7 նրանք լինելու են տեսախցիկների վերահսկողության ներքո, բացառապես չի հրապարակվում և նկարահանվում լողավազանում ժամանակ անցկացնելը և հագուստը փոխելու տեսարանները: Շատերը նաև մեկնաբանություններում գրում են, որ որոշակի կոնֆլիկտները սցենարով բեմադրված են, բայց վստահեցնում եմ՝ դա այպես չէ, որոշակի խնդիրներ ունեցող կանայք և աղջիկներ շաբաթներ շարունակ մասնակցում են նախագծի, չունեն արտաքին աշխարհի հետ կապ, պահում են սննդակարգ և վարում այնպիսի ապրելակերպ, որը նախկինում նրանց համար եղել է անսովոր, իսկ այդ պարագայում կոնֆլիկտներն անխուսափելի են, ես էլ այնտեղ եմ նաև այդ խնդիրների շտկման համար»,- նշեց նա:

Լիլիթ Բասյանը նաև ընդգծեց՝ նիհարելու գործընթացն ունի նաև լուրջ հոգեբանական բարդույթներ:
«Գործընթացն իսկապես բարդ է, քանի որ գալիս է այն գիտակցումը, որ պետք է կյանքը փոխել դեպի լավը, վարել առողջ ապրելակերպ՝ առաջ շարժվելով: Մարդու մեջ բախման մեջ են երկու ես՝ մեկն ասում է, որ պետք է սննդակարգ պահել, ճիշտ սնվել, իսկ մյուսը՝ կեր այն, ինչ ցանկանում ես և որքան ցանկանում ես: Միանշանակ մենք աշխատում ենք նաև հոգեբանական խնդիրների շրջանակներում»,- ասաց հաղորդավարուհին:

Հեռուստաեթերում սա Լիլիթ Բասյանի առաջին փորձն է․ նա նաև պատմել է դժվարությունների մասին, որոնց բախվել է անձամբ:

«Առաջին հերթին բարդ է աշխատել նկարահանման հրապարակում, երբ ընթացքը չի ղեկավարվում քո կողմից, դու չգիտես՝ երբ կավարտվի նկարահանումը: Դժվարություններից մեկը նաև եղել է լեզվամտածողությունը․ ինձ համար շատ ավելի հեշտ է հաղորդակցվել ռուսերեն, բայց առաջին սերիաների ընթացքում ես փորձել եմ խոսել հայերեն և ակնհայտ էր իմ կաշկանդվածությունը, դրանով պայմանավորված՝ հետագայում սկսել եմ հաղորդակցվել ռուսերեն, իսկ միտքը թարգմանվում է: Նաև նշեմ, որ այս շրջանում ես պարապում եմ հայերեն՝ գրագետ հաղորդակցվելու համար»,- ասաց Լիլիթ Բասյանը: