«Այս նախագծում ես հանդես եմ եկել որոշակի էպատաժային էլեմենտներով». Սյուզաննա Մելքոնյանը՝ արտաքին փոփոխությունների, «Ну-ка, все вместе!»-ի հոբելյանական եթերաշրջանի և Անահիտ Ադամյանի ելույթի մասին

Այս տարի ռուսական «Ну-ка, все вместе!» նախագծի 5-րդ տարին է. ընթանում է հոբելյանական եթերաշրջանը՝ բաղկացած 5 հաղորդումից: Նախագծի ժուրիի կազմում է 3-րդ եթերաշրջանի հաղթող Սյուզաննա Մելքոնյանը, որը Tert.am Life-ի հետ զրույցում պատմել է նկարահանումների, արտաքին փոփոխությունների և նախագծի շրջանակում երիտասարդ երգչուհի Անահիտ Ադամյանի ելույթի մասին:
«Այս եթերաշրջանում ընդգրկված էին մասնակիցներ, որոնք մասնակցել էին նախորդ եթերաշրջաններին: Այս եթերաշրջանում ընդգրկված էր 36 մասնակից և յուրաքանչյուր եթերաշրջանից երկուական մասնակից անցնում էր հաջորդ փուլ: Քանի որ անցած եթերաշրջանում ևս ժուրիի կազմում էի, այդ փորձը տվեց իր պտուղները. այս տարի ավել հղկված էի այս գործում: Դեռևս մասնակից լինելու ժամանակաշրջանից սկսած գիտեի՝ եթե հաղթեմ, ապա հայտնվելու եմ «պատին» (նկատի ունի նշյալ նախագծում ժյուրիի անդամների նստելու վայրը-Խմբ.)»,- ասել է Սյուզաննա Մելքոնյանը:

Երգչուհու խոսքով՝ այս եթերաշրջանի նկարահանումներն իսկապես բարդ են եղել. Նրանք ժամեր շարունակ լսել են մասնակիցներին:
«Այս տարի առավել ծանրաբեռնված էին աշխատանքները, քանի որ ծավալուն աշխատանք էր տարվում թե՛ կադրում, թե՛ կադրից դուրս: Ունեցել ենք օր, երբ երկու նկարահանում իրականացրել ենք իրար հետևից և օրվա ավարտին ֆիզիկապես սպառված էինք, բայց աշխատում էինք, քանի որ այդպիսին է այդտեղ գտնվող փորձագետի կյանքը: Պետք է, թե՛ ֆիզիկապես, թե՛ հոգեպես պատրաստ լինես յուրաքանչյուր ծանրաբեռնվածության, նաև 6-7 ժամ անդադար նկարահանումներին»,- նշել է նա:
Սյուզաննա Մելքոնյանը նաև ելույթ է ունեցել եթերաշրջանի բացման արարողությանը:
«Մենք երգել ենք բացման արարողության ժամանակ, իսկ ընտրված երգը պրոդյուսերական թիմի կողմից էր, բայց նկարահանելը բավականին բարդ էր, քանի որ ո՛չ ելույթ էր, ո՛չ տեսահոլովակ, իսկ տեխնիկապես նմանօրինակ ելույթ ստանալը դժվար էր:Ուզում եմ նաև տեղեկացնել, որ հետագայում համերգային շրջագայության ընթացքում ելույթներ են լինելու ՌԴ-ի 10-ը քաղաքում:

Երգչուհին հանդիսատեսի առաջ միշտ ներկայացել է դասական կերպարներով, բայց այս նախագծի շրջանակում Սյուզաննա Մելքոնյանը դիմել է արտաքին փափոխությունների և պարզաբանել՝ ինչով էին դրանք պայմանավորված:
«Այս տարի հոբելյանական եթերաշրջան է և յուրաքանչյուր հաղորդմանը մեզանից յուրաքանչյուրը պետք է պահեր այդ տոնական տրամադրությունը: Ունենալով որոշակի փորձ և ծանոթ լինելով նախագծին՝ ես ևս հագուստի առումով այլ կերպ եմ ներկայացել: Ես դասական, էլեգանտ և մինիմալիստական ոճի սիրահար եմ, բայց այս անգամ արվել են որոշակի էպատաժային էլեմենտներ: Հագուստիս հեղինակներն են Ֆաինան, Արայիկ Գաբաջյան, Կարինա Խաչատրյանը, որոնք դիպուկ, ճիշտ և մանրակրկիտ աշխատանք են իրականացրել»,- մանրամասնել է երգչուհին:

Նշենք, որ նախագծի այս եթերաշրջանին մասնակցել է նաև երիտասարդ հայ երգչուհի Անահիտ Ադամյանը, որը բավարար բալեր չհավաքելու պատճառով, չի անցել հաջորդ փուլ: Սյուզաննա Մելքոնյանը այս առնչությամբ նշել է, որ Անահիտը երիտասարդ և տաղանդավոր երգչուհի է, և ամեն բան առջևում է:
«Միանշանակ, որպես հայուհի, որը պետք է գնահատի իր հայրենակցուհուն, հուզիչ պահ էր Անահիտի բեմելը, հատկապես, երբ օտար երկրում ես, բայց ցավոք այս անգամ նրա կողմից ընտրված երգը ճիշտ չէր և բոլորն էին ցավում, քանի որ ելույթն այնպիսին չէր, ինչպիսին կարող էր լինել: Շատ նրբություններ կան թեկուզ երգի ընտրության հարցում, քանի որ լինում են դեպքեր, երբ մասնակիցը չի ընտրում՝ ինչ պետք է կատարի, նրան պարզապես կարող են տալ երգը և վերջ: Անահիտն իր հերթին փորձել է անել ամեն ինչ, որպեսզի լավ ներկայանա, բայց հուզական վիճակն իրենն արեց, իսկ ես ամբողջ էությամբ մտնում էի իր դրության մեջ: Ես իմ անցած ճանապարհին ունեցել եմ դեպքեր, երբ սխալ երգ է տրվել, բայց փորձել եմ ամեն բան անել, որ գոնե այդ շրջանակում կարողանամ լավ ելույթ ունենալ: Չկարողացանք հանդիպել հաղորդումից հետո, բայց իր մայրիկի հետ անընդհատ կապի մեջ եմ և նախագծի շրջանակում փորձում եմ օգնել ինչով կկարողանամ. մենք հայրենակիցներ ենք և պետք է իրար կողքի լինենք»,- եզրափակել է երգչուհին:

Հեղինակ՝ Թերեզա Հովհաննիսյան