Սեր, դավաճանություն և սկանդալային պատմություն. կայացել է «Հարսանեկան պինգ-պոնգ» ներկայացման պրեմիերան, որին ներկա էին մի շարք հայտնիներ (լուսանկարներ)

Երեկ Հակոբ Պարոնյանի անվան երաժշտական կոմեդիայի պետական թատրոնի բեմում կայացավ «Հարսանեկան ping-pong» ներկայացման պրեմիերան, որում հանդես էին գալիս դերասաններ Գոռ Հակոբյանը, Իննա Խոջամիրյանը, Անի Խաչիկյանը, Մանե Մխոյանը և Լևոն Հախվերդյանը:
Tert.am Life-ը ներկա է եղել պրեմիերային և ներկայացնում է լուսանկարներն ու պրեմիերայի մանրամասները:

Պրեմիերային ներկա էին շոուբիզնեսյան դաշտից մի շարք հայտնիներ, մասնավորապես՝ Խորեն Լևոնյանը, Ռաֆայել Երանոսյանը, Արփի Գաբրիելյանը, Արուսիկ Տիգրանյանը, Բաբկեն Չոբանյանը, Ներսես Ավետիսյանը, Գոշ Հակոբյանը, Մկրտիչ Արզումանյանը, Լուիզա Ներսիսյանը, Հրաչ Քեշիշյանը և այլք:

Ներկայացման ընթացքում ամենազավեշտալի դեպքերը պատահել են Իննա Խոջամիրյանի հետ, որը պետք է ոտաբոբիկ քայլեր բեմում, որտեղ մինչև դա բաժակներ էին կոտրվել:

«Պրեմիերան ինքնին շատ էմոցիոնալ ընթացք է, երբ դու գնում ես կուլիսներ, տեսնում ռեժիսորիդ դեմքն ու չես հասկանում՝ հավանե՞ց, թե ոչ, բայց այնուամենայնիվ ես շատ ուրախ եմ, էմոցիաների տեղատարափ է ինձ մոտ: Ինչ վերաբերում է զավեշտալի դեպքերին, այսօր ոտքերս մի փոքր վատ վիճակում են (խմբ. ծիծաղում է), քանի որ մի տեսարան կար, որտեղ պետք է ոտաբոբիկ լինեի բեմում, իսկ դրանից առաջ պատահաբար կոտրվեցին բաժակները: Վերջում էլ, երբ Գոռն ինձ գրկեց պատահաբար ոտքս խփեց սեղանին և բարձր ձայնից հանդիսատեսը սկսեց ծիծաղել, իսկ բեմում մենք մեզ պահեցինք այնպես, կարծես ոչինչ էլ չի պատահել»,-ասաց Իննա Խոջամիրյանը:

Դերասան Գոռ Հակոբյանն առաջին անգամ էր ներկայանում նմանօրինակ ոճի ներկայացման շրջանակում և նշում է, որ այդ փորձը ևս իր կարևորությունն ունի:
«Նախկինում երբ «Ֆուլլ Հաուսի» դերասաններով ելույթ էինք ունենում, երբեմն պատահում էր, որ տեքստերը մոռանայինք, բայց իմպրովիզացիա շատ էինք անում, իսկ այս ձևաչափում դու չես կարող իմպրովիզացիա անել, քանի որ բեմում կանգնած դերասանը սպասում է քո խոսքին, որից հետո նա պետք է շարունակի: Այսօր ևս եղան միջադեպեր, որտեղ մոռանում էի տեքստը, բայց գործընկերների հարցում բախտս բերել է»,- ասա Գոռ Հակոբյանը:

Պրոդյուսերներ Տիգրան Վիրաբյանը և Արման Միտոյանը նշում են, որ նախապատրաստական ընթացքը մի փոքր երկար է եղել:
«Մոտ երկու տարի պահանջվել է, որ «հասնենք» պրեմիերային, քանի որ սցենարային լուծումները մի փոքր բարդ էին, բայց երբ որոշեցինք՝ ինչ գործ պետք է բեմ բարձրանա, մենք դիմեցինք Արշո Հարությունյանին և սկսեցինք աշխատանքները»,- ասաց Արման Միտոյանը, իսկ Տիգրան Վիրաբյանը հավելեց. «Տարբեր պիեսերի միքս է ներկայացված, նաև հայաֆիկացված տարբերակով, իսկ բեմում են արտիստներ, որոնք լավագույնս կկարողանային արտացոլել կերպարներին և գույն տալ նրանց»:

Դերասանուհի Անի Խաչիկյանը նշում է, որ նախկինում ունեցել է թատրոնում աշխատելու փորձ, բայց ոչ նման մեծ թվով հանդիսատեսի առաջ:

«Իրականում որքան էլ փորձերը շատ են եղել, միևնույն է այլ զգացողություն է մոտ 600 հանդիսատեսի առաջ հանդես գալը: Սիրել եմ կերպարս, քանի որ, անգամ մեղքի բաժին ունենալով՝ նա փորձում էր ոչ մեկի չվնասել»,-ասաց Անի Խաչիկյանը:

Նախկինում դրամատիկ կերպարներ մարմնավորող Մանե Մխոյանն այս ներկայացման ընթացքում ներկայանում է լիովին այլ՝ հումորային և խաղարկային կերպարով:
«Սկզբում կային մտավախություններ, քանի որ նախկինում միշտ դրամատիկ, ծանր դերեր եմ մարմնավորել, իսկ այս ներկայացման մեջ ես պետք է համ ու հոտ տայի ընթացքին, սցենարային լուծումներով հումորային տարրերը շատ էին, բայց ինձ դուր է եկել այս փորձը և ուրախ եմ լսել դրական արձագանքներ և մարդկանց գնահատականը, որ այսօրվա իմ կերպարը բացահայտում էր շատերի համար»,- ասաց Մանե Մխոյանը:

Ի տարբերություն նախորդ արտիստների՝ դերասան Լևոն Հախվերդյանն իր հիմնական գործունեությունը ծավալում է թատրոնում և մեզ հետ զրույցում նշեց, որ կանխակալ վերաբերմունք է ունեցել նախնական փուլում:
«Այժմ դերասաններն ինձ համար լավ ընկերներ են, բայց սկզբնական փուլում բացարձակապես չէի պատկերացնում՝ ինչպես ենք աշխատելու, քանի որ շատ տարբեր ոլորտներից ենք, պրեմիերայի կայանալուց հետո իսկապես համոզվեցի, որ յուրաքանչյուրը լավ է կատարում իր դերը և ստացված համագործակցություն էր, իսկ դրա մասին վկայում է հանդիսատեսի արձագանքը»,- ասաց Լևոն Հախվերդյանը:

Ինչպես և դասական հարսանիքների պարագայում, այստեղ ևս պրեմիերայի ավարտին հանդիսատեսին բաժանեցին տարոսիկներ, իսկ հավատարիմ հանդիսատեսը ծաղիկներով և ծափահարություններով արտիսներին ճանապարհեց կուլիսներ:

Հեղինակ՝ Թերեզա Հովհաննիսյան

Լուսանկարները՝ Վերոնիկա Բադալյան